Lefatshe le Lesha le Gaufi!

GO NA le dikakantsho tse dintsi tsa kafa mathata a lefatshe leno a ka rarabololwang ka gone. Ka kakaretso fela, a batla kamego le tirisanommogo, mmogo le maiteko a magolo a a rulagantsweng sentle a dirwa ke merafe yotlhe lefatshe ka bophara. Bangwe ba ikutlwa gore fa maemo a ntse a senyegela kwa pele, merafe e tla patelesega gore e sekaseke gore dilo tse di leng botlhokwa thata ke dife mme e dirisane mmogo go bopa lefatshe je lesha le je le kgonang go sirelediwa gore e se ka ya nyelela yotlhe. Go akanngwa gore madi a a beetsweng kwa thoko go dirisiwa mo bosoleng a tla fokodiwa thata mme a dirisediwe dilo tse di tshosetsang tikologo le gore jaaka go boletswe mo go State of the World 1990, “go na le gore dipuso di tswelele ka ditsamaiso tsa tsone tsa itshireletso, di ka nna tsa ikaega ka setlhopha sa kagiso se se nang le maloko a le mantsi le se se nonofileng thata sa U.N., seo se tla bong se na le maatla le thata ya go sireletsa naga epe fela e e leng leloko la yone kgatlhanong le motlhasedi ope fela.”

Mme dithulaganyo tse di ntseng jalo ga di kake tsa tlisa maemo a a elediwang thata a a leng mo tsebeng ya rona e e simololang. Maano ape fela a a logilweng ke motho ga a kake a tlosa boleo jwa motho le bogagapa jwa gagwe ka tsela epe; ga a kake a tlosa letlhoo le dintwa tsa semorafe; ga a dire gore go nne le lorato le le senang bogagapa mo bathong botlhe; lefa e le gone go tlhomamisa gore bolwetsi le loso di tla fela. Bothubaki ga bo rarabololwe ka tsela e e ka bo nyeletsang, ebile ga go umakiwe sepe sa gore kgogakgogano ya bodumedi le letlhoo di ka fenngwa jang. Ebile go thibela matlhotlhapelo a tlholego ga go kake ga akanngwa ka gone le eseng. Go itseela kwa godimo ga semorafe, le mathata a a bakiwang ke gone, ga go thibelwe ka gope. Ka maswabi, he, re tshwanetse go konela ka gore batho ba paletswe go ntsha tharabololo e e mosola.

Lefa go le jalo, go na le tharabololo! Eleruri batho ba ile ba solofediwa dilo tsotlhe tseno tse ba di eletsang mme ba solofeditswe jalo ke Modimo “o o sa kakeñ oa aka.” (Tito 1:2) O itse ka tlhomamo se tota se tshwanetseng go dirwa, ebile o botlhale, o na le maatla le nonofo ya go fitlhelela maikaelelo a gagwe.—Tshenolō 7:12; 19:1.

Modimo o solofetsa jaana: “Gonne e tla re kwa pelenyana, moikepi a bo a sa tlhole a le gōna: E, u tla sekaseka helō ga gagwè ka tlhōahalō, me èna o tla ba a seeō. Me bapelonomi ba tla rua lehatshe; ba tla inatehisa mo letlotloñ ya kagishō.”—Pesalema 37:10, 11.

Seno se tla fitlhelelwa jang? Isaia 11:9 e araba jaana: “Ga di ketla di utlwisa botlhoko leha e le go senya mo thabeñ eotlhe ea me e e boitshèpō: gonne lehatshe le tla bo le tletse kicō ea go itse Yehofa, yaka metse a khurumeditse lewatlè.” Ee, batho botlhe ba tla bo ba rutiwa “kicō ea go itse Yehofa,” mme batho bape fela ba ba ganang go dira tumalanong le yone ga ba kitla ba letlwa go nna gone le go kgoreletsa ba bangwe go nna le kagiso. Lefatshe la rona le lentle ga le kitla le senngwa gape.

“Tlañ, lo bōnè ditihō tsa ga Yehofa . . . O khutlisa ditlhabanō le kwa bokhutloñ yoa lehatshe,” go solofetsa jalo Pesalema 46:8, 9. (Bona gape le Mika 4:3, 4) Selo se segolo se se ka dirwang go lere kagiso mo lefatsheng lotlhe ke go fedisa go sa utlwaneng ga merafe. Go tlhomamisiwa gore go tla nna le tirisanommogo ka gonne go tla bo go na le puso e le nngwe fela mo lefatsheng ka bophara—eleng ya Modimo. Mme puso ya gagwe ke Bogosi “yo bo se ketlañ bo señwa gopè.” (Daniele 2:44) Mo godimo ga moo, Kgosi ya jone ke Jesu Keresete yo o tsositsweng, yo o sa sweng, yoo a tla busang ka tshiamiso le tshiamo.—Isaia 9:6, 7; 32:1.

Mme a seno se tla senngwa ke go sa itekanelang ga motho le go tswelela ga botlhoko, bolwetsi, kutlobotlhoko, le loso? Nnyaa, gonne tseno le tsone e tla nna dilo tsa nako e e fetileng. Tshenolō 21:4 e re tlhomamisetsa jaana: “Me o tla phimola dikeledi cotlhe mo matlhoñ a bōnè; me ga go ketla go tlhōla go le losho; le gōna ga go ketla go tlhōla go le bohutsana, leha e le selelō, leha e le botlhoko: dilō tsa pele di hetetse rure.” Boleo jo re bo ruileng bo tla itshwarelwa ka setlhabelo sa thekololo sa ga Jesu, mme batho ba tla dirwa gore ba itekanele gape. (Baroma 6:23; Baefesia 1:7) Mme ke mang yo a ka laolang maatla a tlholego mme a dira gore a se ka a gobatsa batho go na le Mmopi wa one?—Pesalema 148:5-8; Isaia 30:30.

Modimo o tla tlisa dilo tseo sa motho eleng go di solofela fela le go di eletsa. Mme leng? Boperofeti jwa Bibela bo bontsha gore diphetogo tseno di tla tla ka nako ya fa merafe e tla bo e ‘tletse bogale’ le ya fa motho a tla bo a ‘senya lefatshe.’ (Tshenolō 11:18) Metlha ya bofelo ya lefatshe le legologolo leno e tla nna le “dipaka tse di tlhokohatsañ”—tseo di tla felelang ka maemo a a senyegelang kwa pele jaaka a re a bonang go re dikologa jaanong. (2 Timotheo 3:1-5, 13) Jesu o ne a bolelela pele gape gore kokomana e e tla bonang dilo tseno ke yone e e tla bonang fa ditsholofetso tsa Modimo di diragadiwa.—Mathaio 24:3-14, 32-34.

Tsaya nako mme o tlhatlhobe ditsholofetso tseo tse di kwadilweng mo Bibeleng. Ka go bo batho ba ba nang le kitso mmogo le Modimo ba a dumalana mo ntlheng eno: Jaanong ke nako ya lefatshe le lesha!