Botshelo le Bodihedi tsa ga Jesu

Go Utlwa Botlhoko Thata kwa Tshimong

FA Jesu a fetsa go rapela, ene le baaposetoloi ba gagwe ba ba 11 ba ba ikanyegang ba opela dipina go baka Jehofa. Morago ba fologa ba tswa kwa kamoreng e e kwa godimo, ba tsena mo lefifing le le tsiditsana la bosigo, ba bo ba boela morago kwa Mokgats̆heng wa Kiderona go ela kwa ntlheng ya Bethania. Mme fa ba le mo tseleng ba ema fa lefelong le le rategang thata, tshimo ya Gethesemane. Yone e kwa Thoteng ya Motlhware kana mo tikologong ya yone. Jesu o ne a tlhola a kopana le baaposetoloi ba gagwe fano mo ditlhareng tsa motlhware.

O tlogela barutwa ba gagwe—gongwe gaufi le kgoro ya tshimo—a bo a ba laela jaana: “Lona lo dulè ha, ka nna ke ea hale, ke ea go rapèla.” Jaanong o tsaya ba bangwe ba bararo—Petere, Jakobe, le Johane—a bo a tsenelela kwa teng ga tshimo. Jesu o a hutsafala ebile o tshwenyega thata. “Mōea oa me o hutsahetse thata, e le mo go isañ loshuñ hèla,” o ba bolelela jalo. “Nnañ ha, lo lebèlèlè le nna.”

A katogela kwa pelenyana, Jesu o wela fa fatshe mme a digile sefatlhego sa gagwe o simolola go rapela jaana ka tlhoafalo: “Rra wè, ha go ka nna yalo, a senwèlō se, se mphetè: leha go nntse yalo, eseñ kaha go rateñ ga me, e leñ kaha go rateñ ga gago.” O kaya eng? Ke ka ntlha yang fa a ‘hutsafetse thata mo go isang losong’? A o tlhanogela tshwetso ya gagwe ya go swa le go ntsha thekololo?

Legoka! Jesu ga a kope gore a falodiwe loso. Le eleng kgopolo ya go tila loso lwa go intsha setlhabelo, eo Petere a kileng a e akantsha, ke sengwe se se maswe thata mo go ene. Go na le moo, o mo botlhokong gonne tsela eo a tla tlogang a swa ka yone—jaaka senokwane se se sa rategeng—e tla tlisa kgobo mo leineng la ga Rraagwe. Jaanong o ikutlwa gore o tlile go pegiwa mo koteng mo dioureng di sekae jaaka motho yo o maswe tota—motho yo o sa tlotleng Modimo! Seno ke sone se se mo tshwentseng thata.

Fa a sena go rapela ka nako e telele, Jesu o boela kwa morago mme o fitlhela barutwa ba bararo bale ba robetse. O raya Petere a re: “A lo no lo sa kake loa lebèlèla le nna ka lobakanyana hèla? Lebèlèlañ, lo rapèlè, gore lo se tsene mo thaeloñ.” Lefa go ntse jalo, ereka a lemoga kafa ba tshwenyegileng ka gone le gore go ne go setse go le bosigo thata, o bua jaana: “Mōea ōna o tlhaga, me nama e bokōa.”

Jesu jaanong o tsamaya lekgetlo la bobedi mme o kopa Modimo gore o tlose “senwèlō se,” ke gore, karolo eo Jehofa a e mo abetseng, kana se a ratang gore a se dire. Fa a boa, o fitlhela ba bararo bale ba robetse gape mo boemong jwa gore ba ka bo ba rapela gore ba se ka ba raelwa. Fa Jesu a bua le bone, ga ba itse gore ba ka mo araba jang.

Kgabagare, ka lekgetlo la boraro, Jesu ga a tsamaele kwa kgakala thata, mme o khubama ka mangole a bo a tlhaeletsa kwa godimo, a lela, a rapela jaana: “Rra, Ha e le go rata ga gago, tlosa senwèlō se mo go nna.” Jesu eleruri o utlwa botlhoko ka ntlha ya sekgobo seo se tla nnang mo leineng la ga Rraagwe ka ntlha ya fa a tlile go swa jaaka senokwane. Ka go bo, go latofadiwa ka gore ga o na tlotlo—go hutsa Modimo—ke selo se setona thata go ka itshokelwa!

Lefa go ntse jalo, Jesu o tswelela a rapela jaana: “Eseñ go rata ga me, me a go rata ga gago go dihalè.” Jesu o ineela go dira go rata ga Modimo ka boikobo. Ka nako eno, moengele yo o tswang kwa legodimong o a tlhaga mme o mo nonotsha ka mafoko mangwe a a kgothatsang. Go lebega moengele a bolelela Jesu gore Rraagwe o a mo amogela.

Lefa go le jalo, abo Jesu a na le boikarabelo jo bogolo thata jang ne! Botshelo jwa gagwe jo bosakhutleng mmogo le jwa batho botlhe bo mo kotsing. O tshwenyegile thata mo boikutlong. Ka jalo Jesu o tswelela a rapela ka tlhoafalo, mme mofufutso wa gagwe o fetoga marothodi a madi fa o wela fa fatshe. “Lemororo seno e le selo se se diragalang ka sewelo,” go bolela jalo The Journal of the American Medical Association, “mofufutso wa madi . . . o ka tswa mo maemong a fa o amegile maikutlo thatathata.”

Morago ga foo, Jesu o boela kwa baaposetoloing ba gagwe ka lekgetlo la boraro, mme o ba fitlhela gape ba robetse. Ba lapile ka ntlha ya kutlobotlhoko. “Yana lo nnè lo robalè, lo ikhutsè.” o bua jalo a gakgametse. “Go lekanye: nakō e hitlhile; bōnañ, Morwa Motho o okecwe mo diatleñ tsa baleohi. Nanogañ, re tsamaeeñ: bōnañ, eo o nkōkañ o gauhi.”

Fa a santse a bua jalo, Judase Isekariota o atamela a na le boidiidi jwa batho ba tshotse dipone le dibolao. Mathaio 26:30, 36-47; 16:21-23; Mareko 14:26, 32-43; Luke 22:39-47; Yohane 18:1-3; Bahebera 5:7.

◆ Fa ba sena go tswa kwa kamoreng e e kwa godimo, Jesu o isa baaposetoloi ba gagwe kae, mme o dira eng koo?

◆ Baaposetoloi ba ga Jesu ba dira eng fa a santse a rapela?

◆ Ke ka ntlha yang fa Jesu a utlwile botlhoko, mme o kopa Modimo eng?

◆ Go fetoga ga mofufutso wa ga Jesu madi go supa eng?