Abo Ke Na le Mabaka A Mantsi Jang Ne A go Leboga!

JAAKA GO BOLETSE LOTTIE HALL

TIRAGALO eno e ne ya diragala ka 1963 fa re tswa kwa Calcutta, kwa India, re ya kwa Rangoon, kwa Burma. Fela fa re sena go tswa mo Calcutta ka sefofane, mongwe wa bakaulengwe o ne a lemoga gore ole e ne e tshologela mo lefukeng. Fa ba bolelelwa ka gone, batsamaisi ba ne ba bolela gore ba tla se emisa ka tshoganyetso. Sefofane se ne sa tshwanela go tsholola lookwane lo lontsi pele se ka kotama. Modiri mongwe wa mo sefofaneng o ne a tlhaeletsa jaana, “Fa lo batla go rapela, rapelang jaanong!” Eleruri re ne ra rapela gore fa Jehofa a rata, ekete re ka kotama ka pabalesego, mme go ne ga nna fela jalo. Eleruri re ne re na le sengwe seo re tshwanetseng go se lebogela!

EE, MME ke na le go gongwe gape go gontsi go ke tshwanetseng go go lebogela. Ke na le dingwaga di le 79, mme ke santse ke itekanetse ebile ke na le maatlanyana ao ke a dirisang mo bodiheding jwa nako e e tletseng. Kwantle ga seo, mo godimo ga masego ao batho botlhe ba ga Jehofa ba a bonang, ke ne ka nna le maitemogelo a mantsi a a tlhomologileng. Se se botlhokwa ke gore, ke ile ka itumelela tota go direla Jehofa ka dingwaga tse di fetang 60, mme halofo ya lobaka loo lotlhe ke ne ka e senya ke le modihedi wa nako e e tletseng, kana mmulatsela.

Sotlhe seno se ne sa simololwa ke rre fa re ne re nna kwa Carbondale, kwa Illinois. E ne e le mongwe wa setlhopha sengwe se se bidiwang Barutwa ba ga Keresete mme o ne a batla go nna moruti. Lefa go ntse jalo, boitemogelo jo a neng a nna najo kwa dikolejeng tse pedi tsa Bibela bo ne jwa mo kgoba marapo, ka go bo o ne a sa dumele Tharonngwe, go sa sweng ga moya, le pogiso ya goyagoile.

Kgabagare, o ne a kgotsofadiwa ke boammaaruri jwa Bibela joo a neng a bo tlisediwa ke morekisi wa dibuka wa Moithuti wa Bibela ka 1924, fa ke ne ke na le dingwaga di le 12 fela. Rre o ne a itumelela go bo go ne go na le batho ba bangwe bao ba neng ba ikutlwa jaaka ene, gore Tharonngwe, molelo wa dihele, le go sa sweng ga moya wa motho ke dithuto tsa maaka. Ka bonako fela, lelapa la rona le ne la kopana ka metlha le Baithuti ba Bibela, jaaka Basupi ba ga Jehofa ba ne ba bidiwa ka nako eo. Ke ne ke itumelela tota go ithuta boammaaruri kaga Jehofa le Lefoko la gagwe.

Lefa go ntse jalo, go ne ga diragala matlhotlhapelo fela ka bonakonyana. Monna yo a neng a lereditse rre boammaaruri jono o ne a felela e le motho yo o sa ikanyegeng ebile boitsholo jwa gagwe bo le maswe. O ne a kgopisa rre mme eseng nna le mmè. Ka nako eo ke ne ke na le dingwaga di le 15, e le nna yo mogolo mo baneng ba barataro, mme nna le mmè re ne ra nna mo boammaaruring.

Ka nako ya selemo ka 1927, go ne ga itsisiwe gore go tlile go nna le kopano e kgolo ya Baithuti ba Bibela kwa Toronto kwa Canada. Rre o ne a bolela gore ga a kake a kgona go ya, mme Mmè e ne e le mosadi yo a neng a na le boiketleetso tota. O ne a simolola go rekisa dilo tse di farologaneng tsa mo lapeng, mme ka nako ya kopano o ne a setse a kgobokantse diranta di le 20. Nna le ene re ne ra simolola go tsamaya re kopa dipalangwa gore di re pege di re ise kwa Toronto, bokgakala jwa dikilometara di le 1 600. Go ne ga re tsaya malatsi a le matlhano mme ra dirisa dipalangwa di le 37 pele re ka goroga, re ne ra goroga koo letsatsi pele kopano e simolola. Re ne ra kopa lefelo leo re ka robalang kwa go lone gonne madi a rona a ne a le mannye mme re ne ra le bona. Fa Mokaulengwe A. H. Macmillan a ne a utlwa ka loeto lwa rona, o ne a kwala kaga lone mo pampiring ya dikgang e e begang ka kopano kafa tlase ga setlhogo se se reng: “Tlhatlogo Epe Fela Ya Madi A Dipalangwa Ga E Tshwenye Baithuti Bano ba Bibela.”

Mmè o ne a nna a kwalela Rre a mmolelela se se diragalang ka makwalokarata. Ka jalo, ka motsotso wa bofelo, o ne a swetsa go tla ka koloi mme a goroga fela ka nako ya puo ya phatlalatsa mo letsatsing la bofelo la kopano. Jaanong re ne re sa tlhole re tlhoka go boela gae ka go kopa dipalangwa gore di re pege. A kopano e e monate ruri! Abo ke ne ke itumetse jang ne go bo re kgonne go ya kwa go yone, mme abo ke ne ke leboga jang ne go bo e thusitse rre go tsoga gape mo semoyeng!

Ka dingwaga di le dintsi fa ke ne ke bodiwa gore bodumedi jwa me ke bofe, ke ne ke araba ke re, “IBSA,” ditlhaka tseo di emelang International Bible Students Association. Mme ke ne ke sa itumedisiwe ke leina leo. Lefa go ntse jalo, ke ne ka itumela fa kwa kopanong ya 1931 ya kwa Columbus, kwa Ohio, re ne re nna le leina le lesha la Basupi ba ga Jehofa.

Fa Ke Santse Ke Le Mo Sekolong

Gareng ga masego a mantsi a a neng a dira botshelo jwa me go nna jo bo itumedisang e ne e le a a neng a amana le mmino. Ke ne ke rata mmino tota mme ke ne ka simolola go ithuta go letsa piano ke santse ke le mmotlana. Ke ne ka nna le tshiamelo ya go letsa diletso tseo di neng di tsamaisana le mafoko fa go opelwa mo phuthegong. Pele Mokgatlho wa Watch Tower o simolola go gatisa dipako tsa Bogosi, morongwa mongwe yo a direlang a le kwa Papua New Guinea o ne a kile a nkopa gore ke gatise dipina di le mmalwa tsa rona tseo Ba-Papua ba neng ba ka ithuta go di opela. Seo e ne e le sengwe seo ke neng ka itumelela fela thata go se dira.

Lefa go ntse jalo, seletso se ke neng ke se rata thata e ne e le kelarinete. Ke ne ke rata go e letsa mo okesetereng ya koleje. Porofesa wa kwa kolejeng o ne a kgatlhiwa ke tsela eo ke neng ke letsa ka yone mo a neng a nkopa gore ke ye go letsa mo setlhopheng sa banna. Mo malatsing ao go ne go se mosadi ope yo a neng a letsa mo setlhopheng sa banna, ka jalo fa maloko a setlhopha a utlwa se se boletsweng ke porofesa, a ne a rulaganya go gana go letsa. Mme ba ne ba fetola mogopolo fa ba ne ba bolelelwa gore ba ne ba tla kobiwa fa ba ka gana go letsa. Sengwe se se sa tlwaelegang se ne sa diragala gape fa ke ne ke tshwanela go gwanta le setlhopha seo sa mmino letsatsi lotlhe. Pampiri ya dikgang e ne ya bolela gore seo se ne se kgatlha tota mme sa kwala ditlhogo tsa dikgang ka ditlhaka tse dikgolo tse di neng di re: “Mosetsana wa Seopedi mo Boidiiding jwa Banna.”

Kgabagare, ke ne ka botsolodiwa gore a ke batla go nna porofesa wa mmino. Lefa go ntse jalo, ereka ke ne ka akanya ka dikgang tseo di neng di tla tsoga fa ke ruta mmino, jaaka go kopiwa go ruta kana go letsa mmino wa sedumedi le wa semorafe, ke ne ka swetsa gore ke tla dira sengwe se sele mme ke ne ka kopiwa go ruta hisitori ya lefatshe. Mme seo le sone ga ke a ka ka se dira sebaka, ka go bo dingwaga moragonyana ke ne ke letsa kelarinete mo dinageng tse dintsi fa ke ntse ke etela dikopano tsa merafeyotlhe tsa Basupi ba ga Jehofa, dingwaga moragonyana ga foo.

Fa nako e ntse e tsamaya, ke ne ka nna morutisi wa hisitori ya lefatshe kwa sekolong sengwe se segolo mo karolong nngwe ya Detroit, mme ka gone, mogokgo o ne a nkopa gore ke akantshe gore go ka dirisiwa buka efe mo go dingwe di le mmalwa. Fa ke ntse ke di sekaseka, ke ne ka gakgamadiwa ke ntlha ya gore lemororo dibuka tse di neng di dirisiwa ka nako eo di ne di umaka leina la ga Jehofa ka makgetlo a le robedi, tse disha di ne di sa bitse Modimo wa Bahebera ka leina, lemororo di ne di bitsa medimo ya merafe ya baheitane e e jaaka Ra, Moleke, Seus, le Jupitere ka maina. Fa monna yo o di rekisang a tla, ke ne ka mmotsa gore ke ka ntlha yang fa Jehofa a ne a sa umakiwe mo dibukeng tsa gagwe, mme o ne a re: “Nnyaa, ga re kitla re tsenya leina leo mo dibukeng tsa rona ka ntlha ya Basupi ba ga Jehofa.” Ka jalo ke ne ka mo raya ka re: “Go siame! He ga nkake ka buelela buka ya gago.” O ne a latlhela buka eo mo bekeng ya gagwe mme a tswa ka bonako mo kgorong.

Moragonyana, ke ne ka begela mogokgo gore tota ga re tlhoke buka e ntšha mme ka mo naya mabaka mangwe a le mmalwa a a molemo. O ne a dumalana le nna. Botlhe ba ne ba itumelela tshwetso eo fa dikgwedi di le mmalwa morago ga foo go ne go dirwa tshwetso ya go ntsha hisitori ya lefatshe mo dithutong tsa dikolo tse dikgolo. E ne ya tseelwa sebaka ke thuto e ntšha e e bidiwang thutaloago mo thulaganyong yotlhe ya sekolo ya dikarolo tse 14. Fa sekolo se ka bo se rekile dibuka tse disha tsa hisitori, abo se ka bo se ne sa latlhegelwa jang ne!

Ke ne ka nna le boitemogelo jo bontsi jo bo itumedisang tota fa ke ne ke ruta mo sekolong mme ke ne ke le mogakolodi yo o gagametseng tota. Seno se ne sa felela ka gore ke nne le ditsala ka lobaka lo loleele. Ke ne ka nna le ditshono tse dintsi tsa go dira bosupi jo eseng jwa ka tlwaelo. Mme kgabagare nako le maemo di ne tsa dira gore ke tsene mo tirelong ya nako e e tletseng.

Dikopano tsa Merafeyotlhe

Fa ke sena go ruta mo sekolong ka dingwaga di le 20, matlho a me a ne a se ka a tlhola a bona sentle. Mo godimo ga moo, batsadi ba ne ba ntlhoka, ka jalo rre o ne a nkopa gore ke boele gae, a bolela gore go na le tiro e e botlhokwa thata ya go ruta e e tshwanetseng go dirwa, mme Jehofa o tla ntlhokomela gore ke se ka ka bolawa ke tlala. Ke ne ka lesa go ruta ka 1955, mme mo masegong a ntlha a ke neng ka a bona morago ga foo e ne e le go ya kwa metseletseleng ya dikopano tsa “Phenyo ya Bogosi” kwa Yuropa. Abo ke ne ka itumelela jang ne go nna le bakaulengwe ba rona ba kwa Yuropa, bontsi jwa bao ba neng ba bogile tota mo ntweng ya lefatshe ya bobedi! Mme segolobogolo ke ne ke le lesego tota go nna gareng ga ba le 107 000 bao ba neng ba tletse mo Zeppelinwiese, kana Zeppelin Meadow, kwa Nuremberg, koo Hitler a neng a rulaganyeditse go ya go gwantwa gone ka phenyo morago ga Ntwa ya Lefatshe II.

Leo e ne e le loeto lwa ntlha lwa a mantsi a lefatshe ao ke neng ka nna le tshono ya go a tsaya. Ka 1963 nna le mmè re ne re le gare ga batlakopanong ba ba 583 bao ba neng ba tlile go dikologa lefatshe ba tsamaya mo Dikopanong tsa “Mafoko A A Molemo A Bosakhutleng”. Re ne ra simolola loeto loo kwa New York go ya kwa Yuropa, go tloga foo ra ya kwa Asia le kwa ditlhaketlhakeng tsa Pacific pele re feleletsa kwa Pasadena, kwa California. Re ne ra nna le boitemogelo jo bo tshosang jo bo tlhalositsweng kwa tshimologong mo loetong lono. Mo maetong a moragonyana re ne ra ya kwa dikopanong tse di kwa Amerika Borwa, le Pacific Borwa le kwa Afrika. Eleruri, maeto ano a ne a nonotsha botshelo jwa me tota, mme se se neng sa oketsa boitumelo jwa me jaaka morati wa mmino ke fa ke ne ke tshameka mo diokesetereng tsa dikopano mo mafelong a mantsi.

Go Tsena mo Tirong ya Bobulatsela

Ke ne ka bulatsela le mmè ka lobaka lwa ngwaga ka 1955 fa ke sena go boa kwa Yuropa, mme morago ga foo Mokgatlho o ne wa nkopa go dira mo phuthegong nngwe e potlana kwa Apalachicola kwa Florida bophirima. Nna le kgaitsadi yo mongwe re ne ra thusa mo tirong koo ka dingwaga di le supa mme go ise go e kae phuthego eo e ne ya kgona go aga Holo ya Bogosi gore e lepalepane le koketsego. Go ne ga nna ga tswelela pele mme go ise go e kae go ne ga tlhongwa phuthego e nngwe kwa Port Saint Joe. Ke ne ka nna dingwaga di le supa koo ke dira le diphuthego tse tharo kwa Florida bophirima.

Motlha mongwe molebedi wa potologo o ne a nkopa gore ke batle lefelo leo kopano ya potologo e neng e tla tshwarelwa mo go lone. Ke ne ka kgona go bona tetla ya go dirisa Centennial Building e ntle kwa Port Saint Joe ka R25. Mme re ne re tlhoka fa re ka apeelang gone, mme re ne ra akanya go dirisa lefelo la sekolo. Lefa go ntse jalo, mookamedi wa sekolo seno o ne a gana, mme o ne a bolela gore ke ne ke tla tshwanela go kopana le boto ya sekolo. Ratoropo le ene o ne a tla kwa pokanong eo, ereka a ne a batla gore re kgone go bona lefelo leo la boapeelo jwa sekolo. Fa a botsa gore ke dilo dife tse di neng di thibela gore re se ka ra le bona, mookamedi wa boto ya sekolo o ne a bolela gore dilo tsa sekolo ga di ise di ko di dirisiwe ke setlhopha sepe fela sa bodumedi. Ratoropo o ne a nteba gore ke arabe. Ke ne ke tshotse dipampitshana di le mmalwa tsa taletso tseo di neng di bontsha gore re kile ra dirisa mafelo a dikolo go tshwarela dipokano tsa rona kwa ditoropong tse dingwe ka bo ka supa le Ditihō 19:9 eo e bolelang gore moaposetoloi Paulo o ne a rera mo lefelong la botshamekelo la sekolo. Seo se ne sa fedisa kgang. Boto e ne ya dumalana le ratoropo gore re ka kgona go dirisa boapeelo joo—re duela R90.

Fa ke ne ke na le dingwaga di le 13, dingwaga tseo ke neng ka kolobediwa ka tsone, ke ne ka rapela jaana: “Ao Modimo, dira fela gore ke tlise motho a le mongwe mo boammaaruring.” Thapelo eo jaanong e ne e arabiwa ka makgetlo a mantsintsi jaaka ke ne ka segofadiwa go thusa palo e ntsi ya batho go emela Jehofa le Bogosi jwa gagwe. Lefa go ntse jalo, nako le nako e ne e re fa moithuti wa Bibela a ne a tshwanela go ineela le go kolobediwa ke bo ke romelwa kwa phuthegong e nngwe. Lefa go le jalo, ke ne ka nna le tshiamelo ya go jala le go nosetsa, mme bontsi jwa baithuti bano ba ne ba nna ditsala tsa me tsa botshelo jotlhe. Go nna le seabe mo ditirong tse di ntseng jalo tse di nang le maungo go ne ga nnaya mabaka a mantsi tota a go leboga.

Thuso ya Kanamisodikgang

Lemororo gangwe le gape kanamisodikgang mo mafelong a mantsi e ile ya ntsha dipego tse di sa siamang kaga Basupi ba ga Jehofa, ke itumelela go bo kanamisodikgang mo De Land, mo kgaolong ya Florida—koo ke direlang gone jaanong—e ile ya nthusa go neela bosupi. Ka sekai, fa ke ne ke ntse ke etela dikopano mo lefatsheng lotlhe, nna le mmè re ne ra romela dikgang tse ditelele kwa pampiring ya dikgang ya lefelo la rona, mme di ne tsa gatisiwa fela ka bonako, di na le ditshwantsho. Dipego tseno e ne e le tsa mofuta wa go tlhalosa ditiragalo ka ditshwantsho, mme re ile ra kgona go di dirisa go neela bosupi ka leina la ga Jehofa le Bogosi jwa gagwe.

Go ne ga nna fela jalo le ka bosupi jwa mmila. Ke na le sekhutlhwana sengwe sa mmila seo ke bayang ditulo tse pedi tse di nniwang mo tlhageng, ke nna mo go se sengwe mme se sengwe ke baya dibuka mo go sone. Ka nako nngwe go ne ga tlhaga setlhogo se se neng se tletse halofo ya tsebe le setshwantsho mo pampiring ya dikgang ya mo lefelong la rona kafa tlase ga mafoko a a reng: “Lottie wa Deland o Tsweledisa Tiro ya Batsadi ba Gagwe Jaaka Mosupi.” Bosheng jaana ka 1987, go ne ga tlhaga setlhogo se sengwe gape se le bontlhanngwe jwa tsebe se se neng se na le setshwantsho se segolo sa mmala kafa tlase ga setlhogo se se reng: “Lottie Hall O Na Le Sekhutlhwana sa Gagwe Se Se Tlhophetsweng Keresete.” Mo ngwageng o o latelang pampiri e nngwe gape e ne e na le setshwantsho sa me kafa tsebeng e e kafa ntle le dikakgelo tse di reng, “O nna gone ka metlha,” a “Ntse mo setulong sa gagwe se se nniwang mo tlhageng, morutisi yo o tlogetseng tiro wa sekolo o dirisa sekhutlhwana sa gagwe sa mmila go dira tiro ya borongwa ya Basupi ba ga Jehofa.” Gape, seteishane sa mo lefelong la rona sa thelebishene se ne sa supa ditshwantsho kaga go neela bosupi ga me ka makgetlo a le manè. Ke nna le seabe lefa e se se tletseng mo bodiheding jwa Bogosi: go rera ka ntlo le ntlo, dipoelo, dithuto tsa magae tsa Bibela. Lefa go ntse jalo, ka ntlha ya go gola le bokoa jwa mmele, jaanong ke senya nako e ntsi mo tirong ya mmila.

Fa ke leba kwa morago, tota ka boammaaruri nka bolela gore ke na le mabaka a mantsi a go leboga. Mo godimo ga masego ao batho botlhe ba ga Jehofa ba a bonang, nna jaaka morutisi wa sekolo ke ne ka nna le tshiamelo ya go tlhotlheletsa batho ba bantsi ba basha; ke ne ka itumelela go ya kwa dikopanong di le mmalwa mo lefatsheng lotlhe; ke ne ka nna le bodihedi jwa bobulatsela jo bo neng bo ungwa maungo tota; mme ke ile ka segofadiwa tota mabapi le mmino. Mo godimo ga moo, ke ne ka kgona go neela bosupi ka tsela ya kanamisodikgang. Eleruri, nka bolela le mopesalema Dafide jaana: “Ke tla baka leina ya Modimo ka sehela; ke tla o goletsa ka go ntsha malebogō.”—Pesalema 69:30.