Pego ya Baboledi ba Bogosi
‘Dinku Di Utlwa Lentswe la Gagwe’
◻ JESU o ne a bolela jaana: ‘Dinku di utlwa lentswe la [modisa], me a bitse tse e leng dinku tsa gagwe ka maina, a di gogele kwa ntle.’ (Yohane 10:3) O ne a oketsa gape jaana: “Tse e leñ tsa me kea di itse, le tse e leñ tsa me dia nkitse.” (Yohane 10:14) Batho ba sekadinku ba reetsa lentswe la ga Jesu fa a bua le bone ka Bibela. Tlhokomela kafa batho bangwe ba babedi ba ba dipelo di ikanyegang ba kwa Italy ba neng ba latela tsela ya gagwe ka gone.
Kgabagare O Ne A Reetsa
◻ Alberto o kwala jaana: “Ke ne ka simolola go goga matekwane le LSD fa ke ne ke na le dingwaga di le 16, mme fa ke na le di le 18 ke ne ka dirisa heroin. Ke ne ke dira sengwe le sengwe seo nka se kgonang gore ke bone diokobatsi tseno. Ke ne ke utswa, ke rekisa diokobatsi, ke tsietsa, ke ne ka rekisa dilo tsotlhe tsa me. Ke ne ke sa kgone go tlogela dilo tseno. Go jela malatsi a boikhutso kwa moseja ga mawatle, go nna lobaka lo loleele kwa metseng ya magae, kana go nna le seabe mo dipolotiking le makgotla a balweladiphetogo a boikaelelo jwa one e leng go fedisa tshiamololo—tsotlhe tseno di ne tsa palelwa. Ke ne ka leka lenyalo, mme morago ga lobakanyana ke ne ke boetse mo mokgweng wa me wa pele. Le eleng go tsholwa ga leseanyana la me la mosetsanyana ga go a ka ga nthibela go dirisa diokobatsi. Ebile tota, dilo di ne tsa nnela maswe kwa pele, ereka jaanong ke ne ke tlhoka madi a mantsi. Mosadi wa me o ne a ntlogela, mme mo dingwageng tse pedi tseo ke neng ka di nna ke le esi ke ne ka bona morwadiake gabedi fela. Ke ne ke tlhola ke siile ke tshaba barekisi ba diokobatsi ba ke neng ke ba kolota madi, mme gantsi ke ne ke nna ke tshwenyegile mo tlhaloganyong.
“Ke ne ka gakologelwa buka eo Basupi ba ga Jehofa ba neng ba e nneile dingwaga dingwe pelenyana ga foo. Ke ne ke santse ke e tshotse mme ka simolola go e bala le Bibela. Ke ne ka kgona go itse Modimo wa boammaaruri, ebong Jehofa ka tsela eno, mme ka mo rapela gore a nthuse. Fa ke ntse ke dirisa dilo tse ke neng ke di ithuta ka bonya ka bonya, go tshwenyega ga me mo boikutlong go ne ga nna botoka. Ke ne ka bona tiro, mme ke ne ka kgona go boelana le lelapa la me gape ka thuso ya ga Jehofa. Ke ne ka ya kwa Holong ya Bogosi, mme fa ke le koo ke ne ka lemoga gore Basupi ba ga Jehofa ba ne ba na le boammaaruri. Fa re sena go kopana gape, nna le mosadi wa me re ne ra ithuta Bibela le Basupi mme kgabagare ra kolobediwa. Jaanong abo re itumelela jang ne go abalana tsholofelo ya rona le ba bangwe jaaka babulatsela ba ka metlha!”
Thapelo ya Mosadi Yo O Ineetseng E A Arabiwa
◻ Mosadi mongwe o bega jaana: “Ke ne ke ntse ke tlhagafetse mo go direng ditiro tsa kereke ka 1958, segolobogolo mo maetong a sedumedi a go ya kwa Sanctuary of the Madonna of the Divine Love kwa Roma. Fa nako e ntse e tsamaya ke ne ka nna tsala e e atamalaneng thata le bishopo mongwe yoo e neng e le mopapa wa Roma mme ke ne ke tlhola ke tlotla le Mopapa Paul VI le John Paul II kwa bothokong. Morago ga dingwaga tse 25 ke ntse ke rulaganya maeto a sedumedi, ke ne ka newa dipoloma ya go dira ka matsetseleko. Lefa go ntse jalo, fa nako e ntse e tsamaya tumelo ya me jaaka Mokatoliki yo o tlhaga e ne ya simolola go reketla. Ke ne ka lemoga fa go na le bogodu, tsietso, go direlana molemo ka bolosika, le dikgwebo tse di sa tlwaelegang tota. Ke ne ka simolola go leba kereke ka tsela e e farologaneng jaaka ke ne ke lemoga gore gantsi molao wa Modimo o ne o gatakwa ka dinao. Dilo tse di ntseng jalo di ne di ntshwenya tota, mme ke ne ka kopa Modimo gore o nthuse gonne ke ne ke felelwa ke tumelo. Ke ne ke tlhola ke lela.
“Morago ga foo, dingwaga tse nnè tse di fetileng, morwaake o ne a ntlisetsa dikaelo tsa Tora ya Tebelo le Tsogang! tseo a neng a di bone mo Basuping ba ga Jehofa. Dimakasine tseno di ne di kgatlha tota mo ke neng ka mo kopa gore a ntlele tse dingwe gape. Ka bonako fela morago ga foo ke ne ka bona Holo ya Bogosi ya Basupi ba ga Jehofa mme ka tlogela sekgemetswana sa pampiri fa mojakong ke kopa gore mongwe wa bone a nketele. Basupi ba ne ba tla malatsi a le mane morago ga foo. Ke ne ka simolola thuto ya Bibela mme ka tswelela pele go fitlha ke kolobediwa. Jaanong ke tlhomamisegile gore ke bone seo ke sa bolong go se batla—boammaaruri!”
Batho bano ba ne ba reetsa lentswe la Modisa yo o Molemo, Jesu Keresete, mme ‘boammaaruri bo ne jwa ba golola.’—Yohane 8:32.
[Motswedi wa Setshwantsho mo go tsebe 14]
Garo Nalbandian