Tlhokomelang Lefoko la Modimo la Polelelopele!

Dintlhakgolo go Tswa go Petere wa Bobedi

LEFOKO la ga Jehofa la polelelopele, kana molaetsa, le tshwana le lobone lo lo bonesitseng mo lefelong le le lefifi, mme Bakeresete ba boammaaruri ba tshwanetse go le tlhokomela tota. Seo ga se motlhofo fa go na le baruti ba maaka bao ba lekang go anamisa botenegi. Mme seo se ka dirwa ka thuso ya bomodimo. Mme re tshwanetse go kgomarela lefoko la Modimo tota gore re tle re falole letsatsi le le atamelang ka bonako la ga Jehofa.

Lokwalo lwa bobedi lo lo tlhotlheleditsweng lwa ga moaposetoloi Petere lo ka re thusa go tlhokomela lefoko la Modimo la polelelopele. Petere o ne a kwala lokwalo lono lwa seaposetoloi gongwe a le kwa Babelona mo e ka nnang ka 64 C.E. Mo lokwalong lono lwa gagwe o lwela boammaaruri jwa Modimo, le go tlhagisa badumedi ka ene ka letsatsi la ga Jehofa le le tlang jaaka legodu, mme o thusa batho ba ba balang lokwalo lwa gagwe gore ba se ka ba timediwa ke maleo a batho ba ba tlolang molao. Re ka solegelwa molemo thata ke mafoko a a tlhotlheleditsweng a ga Petere, ereka letsatsi la ga Jehofa le setse le le gaufi thata.

Ikanye Lefoko la Polelelopele

Jaaka Bakeresete, re tshwanetse go dira ka natla go supa dinonofo tsa bomodimo gape re tshwanetse go tlhokomela lefoko la polelelopele. (1:1-21) Re tlhoka go ‘oketsa tumelo ya rona ka go dira molemo, kitso, boikgapo, bopelotelele, poifomodimo, go rata bakaulengwe, le lorato.’ Fa Petere a ne a bona Jesu a fetogile ponalo a bo a utlwa Modimo o bua kaga Keresete mo lobakeng loo, lefoko la polelelopele lo ne lwa tlhomamisiwa ka mo go oketsegileng. (Mareko 9:1-8) Re tshwanetse go tlhokomela lefoko leo le le tlhotlheleditsweng thata.

Itise mo Bateneging

Re ka kgona go itisa mo bateneging le batho ba bangwe ba ba maswe ka go tlhokomela thata lefoko la Modimo la polelelopele. (2:1-22) Petere o ne a tlhagisa gore baruti ba maaka ba ne ba tla tsenelela mo phuthegong. Lefa go ntse jalo, Jehofa o ne a tla atlhola batenegi bano botlhoko, fela jaaka a ne a atlhola baengele ba ba neng ba tlhoka kutlo, baikepi ba lefatshe la motlha wa ga Noa, le metse ya Sodoma le Gomora. Baruti ba maaka ba nyatsa balebedi ba ba tlhomilweng ke Modimo mme ba okisa ba ba bokoa gore ba kopanele le bone mo go direng boleo. Go ka bo go le botoka fa batenegi bao ba se kile ba itse “tsela ea tshiamō, bogolo go go re, ba sena go e itse, ba tloga ba hularèla taolō e e itshepileñ e ba e neecweñ.”

Letsatsi la ga Jehofa le E Tla!

Jaaka ba ba tlhokomelang lefoko la polelelopele mo metlheng eno ya bofelo ga re a tshwanela go itetla go tlhotlhelediwa ke basotli bao ba kgalang molaetsa wa gore Jesu o gone. (3:1-18) Ba lebala gore Modimo yo o ikaeletseng go nyeletsa tsamaiso eno ya dilo o ne a nyeletsa lefatshe la pele ga Morwalela. Bopelotelele jwa ga Jehofa ga bo a tshwanela go lejwa jaaka tiego, ka go bo o batla gore botlhe ba ikwatlhae. Tsamaiso eno e tlile go senngwa ka “letsatsi ya Morèna” mme mo boemong jwa yone go tla tla “magodimo a masha, le lehatshe ye lesha, a go tla agañ tshiamō mo go aōna.” Ka gone re tshwanetse go dira bojotlhe jwa rona gore re nne ‘mo kagisong re sena selabe, re sena molato.’ Go na le gore re timediwe ke baruti ba maaka, a kitso ya rona kaga Jesu Keresete e gole.

A re tsenyeng mafoko ano a ga Petere mo pelong. Re se ka le ka motlha ra nna re sa itisa kgatlhanong le baruti ba maaka. Tshela o ntse o itse gore letsatsi la ga Jehofa le tla ka bonako. Mme tlhokomela lefoko la polelelopele ka metlha.

[Lebokoso/Setshwantsho mo go tsebe 31]

Go Latlhelwa mo Moleteng: Jehofa ga a ka a “rèkègèla baengele yale mo lobakeñ lo ba leohileñ ka lōna, me oa ba latlhèla mo moletiñ, oa ba cwalèla mo meletiñ e e lehihi, go tla ba letisiwa motlha oa tshekishō.” (2 Petere 2:4) Molete ono ga se wa ditlhamane oo mo go Iliad ya ga Homer o kaiwang e le lefelo le le kafa tlase ga lefatshe koo go golegilweng gone medingwana e mennye ya maaka, Cronus le meya e mengwe ya ga Titan. Molete wa Bibela ke boemo jwa go wa mo boitsholong, jwa go nna mo kgolegelong joo Modimo o latlhetseng baengele ba ba neng ba tlhoka kutlo ba motlha wa ga Noa mo go one. (Genesise 6:1-8; 1 Petere 3:19, 20; Yude 6) “Lehihi” le ne la nna gone ka go bo ba latlhetswe kwa ntle ga lesedi la Modimo la semoya jaaka ba ba kobilweng mo lelapeng la gagwe. Pono ya bone e letobo gonne ba boloketswe katlholo e e botlhoko. Molete ke koo Satane le badimona ba gagwe ba tla tsenngwang gone pele Puso ya ga Keresete ya Dingwaga Tse Di Sekete e simolola. Ba tla senngwa morago ga Puso ya ga Jesu ya Mileniamo.—Mathaio 25:41; Tshenolō 20:1-3, 7-10, 14.

[Setshwantsho]

Zeus o ne a latlhela medingwana e mennye mo Moleteng wa ditlhamane

[Motswedi wa Setshwantsho]

National Archaeological Museum, Athens, Greece