“Ka Ntlo le Ntlo”

“ME KA malatsi aotlhe, mo tempeleñ le mo ma ga bōnè, ba se ka ba bakèle go ruta, le go rèra Yesu ha e le Keresete.” (Ditihō 5:42) Gantsi Basupi ba ga Jehofa ba dirisa temana eno le e e leng go Ditihō 20:20 go bontsha molaomotheo wa Dikwalo o ka one ba dirang tiro ya bone ya go rera ka ntlo le ntlo. Lefa go ntse jalo, kwa Jeremane batho bangwe ba ba ganetsang Basupi ba ga Jehofa ba ile ba ganetsa tsela eo New World Translation e tlhalosang ditemana tseno ka yone, ba bolela gore ga e tlhalose seo Segerika sa pele se neng se se tlhalosa.

A dipolelo tse di ntseng jalo di boammaaruri? Legoka. Boammaaruri ke gore, bobotlana dithanolo tse dingwe di le thataro tsa Bibela ya Sejeremane di tlhalosa ditemana tseno ka tsela e e tshwanang. Gareng ga tse dingwe ke Zürcher Bibel e e kwadilweng sesha le “Tesetemente e Ntsha” ka Rupert Storr, Franz Sigge, le Jakob Schäfer (eo e kwadilweng sesha ke N. Adler). Dithanolo tse dintsi tsa Seesemane di a dumalana.

Mokanoki wa Mojeremane ebong Hans Bruns o buelela gore o ranotse sentle fa a re, “ka ntlo le ntlo,” mo go Ditihō 5:42, a bolela jaana: “Go ya ka mokwalo wa ntlha, go bonala ekete ba ne ba tsamaya ka ntlo le ntlo.” Ee, kat’ oiʹkon, eleng lefoko le le dirisitsweng pele mo lekwalong leno, ga le a dirisiwa ka kgopolo ya letlhalosi (“mo ntlong”) mme ka kgopolo e e anameng, leo totatota le bolelang “go ya ka ntlo.” (Popego ya bontsi, kat’ oiʹkous, eo e bolelang “go ya ka matlo,” e fitlhelwa mo go Ditihō 20:20.) Bakanoki ba bangwe, ba ba tshwanang le Heinz Schürmann, ba tlhomamisa kafa dithanolo tseno tse di tlhalosang seno ka tsela e e anameng di leng boammaaruri ka gone. Horst Balz le Gerhard Schneider, bakwadi ba buka e e tlhalosang mafoko a Tesetemente e Ntsha, ba bolela gore polelo eno e ka nna ya tlhalosiwa jaaka “ntlo morago ga ntlo e nngwe.” Dibuka tsa tshupiso di le mmalwa tsa Seesemane di tlhalosa temana eno ka tsela e e tshwanang.

Gape fano, New World Translation e kgonne go emela ditlhaselo tsa batshwayadiphoso. Se se botlhokwa le go feta ke gore go phepafetse gore go na le molaomotheo o o nonofileng wa Bibela wa go dira tiro ya ka ntlo le ntlo. (Bapisa Mathaio 10:11-14; 24:14.) Basupi ba ga Jehofa ba na le tshiamelo ya go etsa badiri ka bone ba lekgolo la ntlha la dingwaga mo ntlheng eno.