Bomolemo jo Bogolo Jwa ga Jehofa

“Ana molemō oa gago o mogolo yañ, o u o beetseñ ba ba gu boihañ.”—PESALEMA 31:19.

1, 2. (a) Ke tiro efe e kgolo eo Jehofa a neng a simolola go e dira nako nngwe bogologolo? (b) Jehofa o ne a tlhalosa jang kafa tiro ya gagwe ya go bopa e neng ya felela e ntse ka teng?

KA NAKO nngwe Modimo o ne wa simolola go tlhola ‘legodimo go nna setulo sa gagwe sa bogosi le lefatshe sebeo sa gagwe sa dinao.’ (Isaia 66:1) Rekoto ya bomodimo ga e senole gore seno se ne sa diragala leng. E bolela fela go re: “E rile mo tshimologoñ Modimo oa tlhōla legodimo le lehatshe.” (Genesise 1:1) Ka nako ya popo, go ne ga tlholwa masagaripa a dimilione tse di senang palo, ao bontsi jwa one a nang le dimilione tse di diketekete tsa dinaledi. Go ya kwa karolong e e kafa ntle ya losagaripa longwe lo lo ntseng jalo go ne go na le naledi nngwe e e nang le lesedi le lentsi eo e neng e dikologiwa ke tse dingwe tse di neng di le dinnye tota, e le dikgolokwenyana tse dintshonyana. Nngwe ya tsone e ne ya bidiwa lefatshe. Lefatshe le ne le le lennye tota fa le bapisiwa le dinaledi tse dingwe tse di phatsimang. Lefa go le jalo, seno ke se Jehofa a neng a batla gore e nne sone sebeo sa gagwe sa dinao.

² Ka gone Jehofa o ne a dirisa dinonofo tsa gagwe tsa go bopa mo polaneteng eno e e leng Lefatshe. “Motsalwa pele mo lobopoñ lotlhe” o ne a le fa thoko ga gagwe jaaka Modiri yo Mogolo fa selo se sennye seno se se lefifi se ne se fetolwa mo lobakeng lwa “malatsi” a maleele a marataro. Ka tsela ya tshwantshetso le ne la nna sebeo se se tshwanetseng tota sa Modimo sa dinao. (Bakolosa 1:15; Ekesodo 20:11; Diane 8:30) Lefelo leno ke lone le Modimo o neng o ikaeletse go baya mo go lone mofuta o mongwe o o botlhale thata wa ditshedi: batho. Batho ba ntlha ba babedi, bao ba neng ba bopilwe ka dikarolo tsa mmu, ba ne ba bewa mo tikologong e ntle tota ya paradaise. (Genesise 1:26, 27; 2:7, 8) Tiro e e tlhomologileng eno ya popo e ne ya felela e itekanetse, e le ntle tota mo Bibela e senolang maikutlo a Modimo mo mosong oo—wa karolo ya bofelo—ya letsatsi la borataro la popo jaana: “Me Modimo oa bōna señwe le señwe se o se dihileñ, me, bōnañ, ga bo go le molemō thata.”—Genesise 1:31.

Bomolemo jwa Modimo

3. Ke nonofo efe e e tlhomologileng ya Modimo eo e senolwang mo popong?

³ Diketekete tsa dingwaga morago ga foo, setlogolwana sengwe sa batho ba babedi ba ntlha se ne sa gakologelwa nako eo ya popo mme se ne sa kwala jaana: “Gonne dilō tse di sa bonaleñ tsa [Modimo], eboñ nonohō ea ōna e e sa khutleñ, le bomodimo yoa ōna, di sa le di bōnala sentlè galè mo tlholegoñ ea lehatshe, ka di lemogwa ka dilō tse di dihilweñ.” (Baroma 1:20) Ee, tsela e e molemo go gaisa e lefatshe le dibopiwa tsa lone di bopilweng ka yone eleruri e ne e supa ka tsela e e gakgamatsang dinonofo tse di sa bonaleng tsa Modimo—tseo nngwe le nngwe ya tsone e supang fa Modimo o le molemo thata. Abo go tshwanela jang ne go bo Modimo o ne wa bolela fa sengwe le sengwe se a neng a se tlhodile se le molemo!—Pesalema 31:19.

4, 5. Bomolemo ke eng?

⁴ Molemo ke karolo ya borataro ya maungo a moya wa Modimo a a tlhalosiwang ke moaposetoloi Paulo mo go Bagalatia 5:22. Dithuto tse di tlileng pele ga eno tsa makasine wa Tora ya Tebelo di ile tsa tlotla ka maungo a ntlha a moya a matlhano, di supa botlhokwa jwa gore re a tlhagolele mo bothong jwa Bokeresete.a Lefa go ntse jalo abo go le botlhokwa jang ne gore re se ka ra lebala go dira molemo! Go dumalana le seo jaanong re sekaseka nonofo eno.

⁵ Go nna molemo go kaya eng? Ke nonofo kana ke boemo jwa go nna yo o siameng. Ke go nna le boitsholo jo bo siameng ka botlalo, le tshiamo. Ka gone, ke nonofo e e siameng eo e bontshiwang ka go dira ditiro tse di molemo le tse di solegelang ba bangwe molemo. Re ka supa nonofo e e dirang gore motho a ratege eno jang? Tsela ya botlhokwa ke ka go etsa Jehofa. Ka gone, pele re ka tswelela go tlhalosa kafa rona jaaka Bakeresete re ka dirang molemo ka gone, a re sekasekeng kafa Modimo wa rona o o lorato, Jehofa, a ileng a bontsha fa a le molemo ka gone ka go tlhokomela le kafa a dirisanang ka teng le lelapa la motho.

Molemo O Ne Wa Supiwa mo Popong

6. Ke eng seo se neng sa dira Jehofa gore a bope dibopiwa tsa mefuta e mengwe gape tse di botlhale?

⁶ Ke eng se se neng sa rotloetsa Rraarona wa selegodimo kwa tshimologong gore a batle go dira gore dibopiwa tse di botlhale tse di tshelang di itumelele botshelo jaaka ene? Moaposetoloi Johane o araba potso eno fa a bolela jaana: “Modimo o loratō.” (1 Yohane 4:8) Ee, Mosimolodi yo mogolo wa botshelo o ne a tlhotlhelediwa ke lorato lo lo senang bogagapa go bopa dibopiwa tse dingwe tse di tshelang, a naya tse dingwe tsa tsone legodimo jaaka legae la tsone mme tse dingwe a di naya lefatshe jaaka legae la tsone. Gone mme re itse go le gonnye fela kafa legodimo le dibopiwa tsa legodimo di ntseng ka teng. Ke meya—e batho ba sa kgoneng go e bona ka matlho—mme legae la tsone le kwa lefelong la moya. Mme a o ko o lebe mo legaeng leno la lefatshe leo Jehofa a le fileng bana ba gagwe ba batho. Mme akanya ka motho ka boene. Mme o tla simolola go bona ka matlho a gago bosupi jo bo nonofileng jwa gore Modimo o molemo.

7-9. Re bona jang bomolemo jwa Modimo mo tseleng eo a bopileng lefatshe le motho yo o tshelang mo go lone ka yone?

⁷ Jehofa o ne a naya batsadi ba rona ba ntlha botshelo. Mo godimo ga moo, o ne a dira gore botshelo joo bo nne monate tota, bo ipedise. Sa ntlha, o ne a tlhola legae la bone eleng lefatshe, le dikologa, le na le ditempereitšhara tse di farologanang, mmogo le loapi, di siame sentle fela. O ne a simolola medikologo ya metse, naeterojene, le okosejene ka tsela e e molemo tota gore batho ba solegelwe molemo le gore ba nne sentle. O ne a apesa lefatshe ka mefuta e e diketekete ya dijalo, tse dingwe e le tse motho a neng a tla di ja, tse dingwe e le tse di jesang matlho monate fela. O ne a tlatsa loapi ka dinonyane tseo di itumedisang ka mebala ya tsone le dipina tsa tsone. O ne a tlatsa mawatle ka bontsintsi jwa ditlhapi le naga a e tlatsa ka diphologolo tsa mefuta e mentsi, dingwe e le dibatana mme tse dingwe e le tse di neng di ka kgwabofatswa. A go aba go gogolo ruri! Mme abo seo e le bosupi jwa gore pelo ya Modimo e molemo jang ne!—Pesalema 104:24.

⁸ A o ko o lebe jaanong, tsela e Modimo o dirileng motho ka yone. Mabogo a gagwe, maoto, diatla di botlhokwa fela tsotlhe go dira gore a kgone go ema sentle a sa we le gore a tsamaye motlhofo fela. Ka gone, o kgona go bona dijo le dilo tse dingwe tse a di tlhokang mo dilong tse dintsi tseo di leng mo lefatsheng le le mo dikologileng. Jehofa o ne a mo naya nonofo ya go kgona go latswa gore go ja le go nwa e se nne ditiro fela tse a di dirang gore a bone maatla—jaaka gompieno sedirisiwa se gokelelwa mo polakeng ya motlakase. Nnyaa, go ja le go nwa go diretswe gore a go itumelele, e seng go tlatsa mpa fela mme gape le go jesa dirwe tsa tatso monate. Jehofa o ne a naya motho ditsebe mme a tlatsa medumo e e monate mo tikologong ya gagwe go jesa ditsebe tseo monate. Abo go le monate jang ne go reetsa modumo o o thobang wa nokana e e elelang, modumo wa lephoi, kana setshegwana se se tsikitlang sa lesea! Ee, re tshwanetse go leboga go bo Modimo o le molemo, ka go bo lemororo go ile ga diragala dilo tse di maswe fa esale ka nako ya popo, botshelo bo santse bo itumedisa.

⁹ Ela tlhoko gape dinonofo tse dingwe tsa rona tsa kutlo. Ke mebala e mekae e e farologaneng e e kgatlhang e e jesang matlho a rona monate! Mme abo go le monate jang ne go dupa lonko lo lo monate lwa sethunya! Ga go gakgamatse go bo mopesalema a ne a tlhaeletsa jaana ka Jehofa: “Ke tla gu ntshetsa malebogō; gonne ke dihilwe ka mo go boitshègañ le ka mo go gakgamatsañ: dia gakgamatsa ditihō tsa gago”!—Pesalema 139:14.

Go Wa ga Motho le go Gololwa ga Gagwe

10. Batho ba bantsi ba ile ba dira eng ka bomolemo jo Modimo o bo ba diretseng, lefa go le jalo ba tswelela go iponela molemo mo go jone jang?

¹⁰ Se se utlwisang botlhoko ke gore fa nako e ntse e tsamaya, batsadi ba rona ba ntlha ba ile ba palelwa ke go leboga Modimo ka molemo o a neng a o ba diretse. Ba ne ba supa seno fa ba ne ba palelwa go ikobela Jehofa mme ba dira selo se e neng e le sone fela se a neng a ba thibetse go se dira. Kwa bofelong, bone le bana ba bone ba ne ba nna mo botlhokong, ba boga, ba bo ba swa. (Genesise 2:16, 17; 3:16-19; Baroma 5:12) Mo dimileniamong tse di ileng tsa feta fa esale ba tlhoka kutlo jalo, batho ba bantsi ba ile ba itlhokomolosa kana ba se ka ba supa fa ba leboga Modimo go bo a le molemo. Lefa go le jalo, lemororo go ne go ntse jalo, batho ba ba sa lebogeng le ba ba sa anaaneleng batho ba santse ba solegelwa molemo ke bomolemo jwa Modimo. Ka tsela efe? Moaposetoloi Paulo o ne a tlhalosetsa baagi ba Lusetera ba ba neng ba nna kwa Botlhabagare jaana: “[Modimo] oa se ka oa nna hèla o sena seshupō, ka o no o nntse o diha molemō, me oa lo nesetsa dipula tse di cwañ mo legodimoñ, oa lo naea metlha ea mauñō, oa tlatsa pelo tsa lona ka diyō le boitumèlō.”—Ditihō 14:17.

11. Ke ka tsela efe bomolemo jwa Modimo bo leng bogolo go feta fela go naya batho legae le lentle?

¹¹ Mme Modimo ga o ka wa supa molemo wa one fela ka go tswelela o aba dilo tse di kgatlhisang tseo fela, tseo di bolokang botshelo tse di tletseng mo lefatsheng. Nnyaa, o ne a tswelela. Jehofa o ile a itshupa fa a iketleeditse go itshwarela boleo jwa bana ba ga Adame le go tswelela a dira botsalano le batho ba ba ikanyegang. Karolo eno ya go nna molemo ga Modimo e ne ya bontshiwa Moshe fa Jehofa a ne a solofetsa gore ‘molemo wa gagwe otlhe o tla o fetisa fa sefatlhegong sa ga [Moshe].’ Moshe o ne a utlwa go tlhaelediwa jaana: “Yehofa, Yehofa, Modimo o o tletseñ bopelotlhomogi, o o tsalanō, o o bonya go galeha, le o o letlōtlō ya boutlwèlō botlhoko le boamarure; O o bolokelañ ba makgolo kgolo boutlwèlō botlhoko, o o ichwarèlañ tshiamololō, le tlolō, le boleo.”—Ekesodo 33:19; 34:6, 7.

12. Ke dilo dife tse di leng mo Molaong wa ga Moshe tseo di neng di supa fa Jehofa a le molemo?

¹² Mo motlheng wa ga Moshe, Jehofa o ne a tlhoma tsela ya go atlhola melato e e neng e tlile go dirisiwa ke morafe o mosha oo wa Iseraele, eo mo go yone motho yo a neng a ka leofa a sa ikaelela a neng a ka itshwarelwa boleo jwa gagwe ka mabaka mangwe, kana ka tsela ya tshwantshetso. Baiseraele ba ne ba nna morafe o o kgethegileng wa Modimo ka kgolagano ya Molao e Moshe e neng e le motsereganyi wa yone, mme ba ne ba rutiwa gore ba direle Jehofa ditlhabelo tse di farologaneng tsa diphologolo tseo di neng di tla bipa maleo le ditiro tsa bone tse di leswe. Ka gone, lemororo ba ne ba sa itekanela, Baiseraele ba ba neng ba supa boikwatlhao ba ne ba ka tswelela ba atamela Jehofa mme ba itse gore o itumelela kobamelo ya bone. Kgosi Dafide yo e neng e le leloko la morafe o o neng o le kafa tlase ga Molao oo, o ne a bolela kafa a neng a lemoga tsela e Modimo o neng o le molemo ka yone mo kgannyeng eno jaana: “U se ka ua gakologèlwa maleo a yale ke sa le lekau, leha e le ditlolō tsa me: u nkgakologèlwè kaha bopelonomiñ yoa gago yoa loratō, ka ntlha ea molemō oa gago, Yehofa.”—Pesalema 25:7.

13. Jehofa o ne a dira jang tsela e e molemo thata ya go itshwarela maleo go gaisa ditlhabelo tsa diphologolo?

¹³ Fa nako e ntse e tsamaya bomolemo jwa ga Jehofa bo ne jwa mo dira gore a dire tsela e e molemo thata le e e nnetseng ruri ya go itshwarela maleo. Seno o ne a se dira ka go ntsha Jesu setlhabelo, yoo e neng e le setlogolwana sa ga Kgosi Dafide. (Mathaio 1:6-16; Luke 3:23-31) Jesu ga a ka a dira boleo. Ka gone, fa a ne a swa, botshelo jwa gagwe jo bo neng bo ntshitswe setlhabelo bo ne bo na le boleng jo bo kwa godimo, mme Modimo o ne wa bo amogela jaaka thekololo e e neng e ka bipa ditlolo tsotlhe tsa bana ba ga Adame. Moaposetoloi Paulo o ne a kwala jaana: “Botlhe ba leohile, ba tlhaetse kgalaleco ea Modimo; Me ba siamisiwa hèla ka tshegōhaco ea ōna ka ntlha ea thèkololō e e mo go Keresete Yesu: Eo Modimo o mmeileñ go nna seletlanyō, ka tumèlō ka madi a gagwè.”—Baroma 3:23-26.

14. Batho ba kgona go solofela dilo dife ka ntlha ya setlhabelo sa thekololo?

¹⁴ Go dumela mo setlhabelong sa ga Jesu sa thekololo go dira gore Bakeresete ba solegelwe molemo thata, go gaisa seo ditlhabelo tsa diphologolo tse di neng di dirwa mo kgolaganong ya Molao di neng di se direla Baiseraele. Se ne sa dira gore go nne le palo e e lekanyeditsweng ya Bakeresete ba ba bolelwang ba siame bao ba tsalwang ka moya wa Modimo go nna barwa ba gagwe. Ka gone e nna bomorwarraagwe Jesu mme ba nna le tsholofelo ya go tsosiwa jaaka dibopiwa tsa moya mme ba busa le ene mo Bogosing jwa selegodimo. (Luke 22:29, 30; Baroma 8:14-17) Akanya fela ka ntlha ya gore Modimo o ne wa naya dibopiwa tse di tshelang mo polanetenyaneng eno eleng lefatshe tebelelo e e ntseng jalo ya selegodimo! Go santse go na le setlhophanyana se se santseng se na le tsholofelo eno. Mme setlhabelo seo se bulela dimilione tsa Bakeresete ba bangwe bao ba dumelang mo go sone tsela ya go itumelela seo se neng sa latlhegela Adame le Efa—botshelo jo bo sa khutleng mo paradaiseng, lefatshe la sekatshingwana. Kgolagano ya Molao e le yosi ga e a ka ya kgona go naya boa ba neng ba e setse morago tebelelo ya isagwe kwa legodimong kana mo lefatsheng.

15. Mafoko a a molemo a akaretsa eng?

¹⁵ Abo go tshwanela jang ne go bo molaetsa o o buang ka dithulaganyo tse disha tseno tse Modimo o di tlhomileng ka Jesu Keresete o bidiwa “Mahoko a a Molemō,” ka go bo o supa fa Modimo o le molemo. (2 Timotheo 1:9, 10) Mo Bibeleng mafoko a a molemo ka dinako dingwe a bidiwa “Mahoko a a Molemo a, a bogosi.” Gompieno a bua thata ka boammaaruri jwa gore Bogosi joo bo tlhomilwe kafa tlase ga puso ya ga Jesu yo o tsositsweng. (Mathaio 24:14; Tshenolō 11:15; 14:6, 7) Lefa go ntse jalo, mafoko a a molemo a akaretsa dilo tse dingwe gape. Jaaka go supilwe mo mafokong a a sa tswang go tsopolwa a Paulo a neng a a kwaletse Timotheo, a akaretsa go itse gore Jesu o ne a intsha setlhabelo go re golola. Kwantle ga setlhabelo seo, kamano ya rona le Modimo, poloko ya rona—re sa umake Bogosi jwa ga Jesu le baperesiti le dikgosi tse 144 000 tse di tserweng mo lefatsheng—di ne di ka se ka tsa bo di le teng. Abo thekololo e le sesupo se se molemolemo jang ne sa gore Modimo o molemo!

Bomolemo jwa Modimo Gompieno

16, 17. Hosea 3:5 e ne ya diragadiwa jang (a) ka 537 B.C.E.? (b) ka 1919 C.E.?

¹⁶ Fa a ne a lebile pele kwa “metlheñ ea bohèlō” moaposetoloi Paulo o ne a tlhagisa jaana: ‘Batho . . . ga ba ne ba rata molemo ka gope.’ (2 Timotheo 3:1-3) Le eleng go supa molemo fela ka tsela e e tlwaelegileng jaaka go aba, le go nna moagelani yo o molemo ga go kitla go itumelelwa. Abo boperofeti jo bo omosang pelo jono jo bo mo go Hosea 3:5 bo kgothatsa jang ne: “Moragō ga mouō bana ba Iseraela ba tla boea, ba batla Yehofa Modimo oa bōnè, le Dafide kgosi ea bōnè; ba tla tla ka poihō mo go Yehofa le mo molemoñ oa gagwè mo metlheñ ea moragō.”

¹⁷ Boperofeti jono bo ne jwa diragadiwa la ntlha ka 537 B.C.E. fa Bajuda ba ne ba boela kwa Lefatsheng Le Le Solofeditsweng ba tswa kwa botshwarong kwa Babelona. Mo metlheng ya segompieno, bo ne jwa simolola go diragadiwa ka ngwaga wa 1919 fa masalela a Iseraele wa semoya a ne a tswa mo phuthegong ya ga Satane mme a simolola go batla Jehofa le go batla bomolemo jwa gagwe ka tlhoafalo. Ba ne ba fitlhela gore Jesu Keresete o ne a setse a ntse a busa jaaka “Dafide kgosi ea bōnè” mo pusong ya selegodimo go tloga ka 1914. Ba ne ba itsise merafe mafoko a a molemo ka botlhaga ba kaelwa ke ene a le kwa legodimong. Ka gone ba ne ba simolola go diragatsa thomo eno e e kwadilweng mo go Mathaio 24:14: “Me Mahoko a a Molemō a, a bogosi, a tla rèrwa mo lehatshiñ yeotlhe, go nna chupō mo merahiñ eotlhe; hoñ ke gōna bokhutlō bo tla tlañ.”

18. Ke bomang bao ba kopaneng le masalela a Iseraele wa semoya mo go rereng mafoko a a molemo?

¹⁸ Gompieno, masalela a batlodiwa a ile a kopana le “boidiidi yo bogolo,” joo le jone bo bolelang ka bomolemo jwa ga Jehofa. (Tshenolō 7:9) Jaanong go na le ba ba fetang dimilione di le nne bao ba bolelang mafoko a moengele yo moaposetoloi Johane a neng a mmona mo ponatshegelong jaaka ba bolelela merafe yotlhe jaana: “Boihañ Modimo, lo o neè kgalalèlō; gonne nakō ea katlholō ea ōna e tsile: me lo ōbamèlè ōna o o dihileñ legodimo, le lehatshe, le lewatlè, le mecwedi ea metse.”—Tshenolō 14:7.

19. Bolela sengwe sa dilo tse dikgolo tseo di supang gore Modimo o molemo.

¹⁹ Bosupi bongwe jo bogolo jwa gore Modimo o molemo ke gore o re letla gore re dire le ene mo tirong eno ya makgaolakgang. Abo e le tshiamelo jang ne go bo a re neile ‘Mafoko a a molemo a Modimo o o itumetseng’! (1 Timotheo 1:11, NW) Re supa fa re na le loungo lo lo botlhokwa loo lwa moya wa Modimo eleng molemo, ka go rerela ba bangwe le go ba ruta. Ka gone, re na le boikutlo jwa motlhanka wa Modimo wa bogologolo ebong Dafide yo a neng a bolela jaana: “Ba tla bolèla kgakologèlō ea molemō o mogolo oa gago, ba tla ōpèla kaga tshiamō ea gago.”—Pesalema 145:7.

20. Ke tshedimosetso efe e nngwe gape e e kaga bomolemo e go tlileng go tlotliwa ka yone mo setlhogong se se latelang?

²⁰ Lefa go ntse jalo, a go nna le seabe mo go rereng mafoko a a molemo ke yone tsela fela ya go supa fa re le molemo mo matshelong a rona? Gotlhelele nnyaa! Re kgothalediwa gore re nne “baetsi ba Modimo, yaka bana ba ba ratègañ.” (Baefesia 5:1) Bomolemo jwa Modimo bo bonala ka ditsela tse di farologaneng. Ka gone, bomolemo jwa rona le jone bo tshwanetse jwa ama dikarolo tse dintsi tsa botshelo jwa rona. Dingwe tsa tsone di tla sekasekiwa mo setlhogong se se latelang.

[Ntlha e e kwa tlase]

A O Ka Araba?

◻ Ke ka tsela efe dilo tse di bopilweng di supang gore Modimo o molemo?

◻ Jehofa o ne a dira thulaganyo efe gore maleo a batho ba ba ikwatlhayang a itshwarelwe?

◻ Go ya ka tiragatso ya Hosea 3:5, masalela a a tloditsweng a ne a tla kwa go Jehofa le go bona bomolemo jwa gagwe leng, mme seno se ne sa felela ka eng?

◻ Gompieno, bongwe jwa bosupi jo bogolo jwa gore Modimo o molemo ke bofe?

[Setshwantsho mo go tsebe 15]

Dilo tse di bopilweng di naya bosupi jwa gore Modimo o molemo thata

[Setshwantsho mo go tsebe 16]

Go letliwa ga rona go nna le seabe mo tirong ya go rera ke bosupi jo bo tlhomologileng thata jwa gore Modimo o molemo