Seo Bibela e se Bolelang ka Kagiso le Polokesego
Batho ba le bantsi ba dumela mo dilong tse di dirwang tse di lebegang di isa kwa kutlwanong e kgolwane ya lefatshe lotlhe le kagiso le polokesego tse di ka nnang tsa di lere. Ba solofela gore tiragalo e e ntseng jalo e tla gogela kwa lefatsheng le le botoka. Mme Bibela e bontsha gore go na le go le gontsi go go akarediwang go gaisa fela seo re se bonang.
KGANG e e malebana le kagiso le polokesego ke kgang e e kgatlhang thata bogolo jang mo Bakereseteng ka ntlha ya seo moaposetoloi Paulo a neng a se kwalela phuthego ya Bakeresete ya lekgolo la ntlha la dingwaga fa a ne a tlhotlhelediwa go kwala. Mafoko a gagwe a kwadilwe mo Bibeleng mo go 1 Bathesalonia 5:3: “E tle e re ba nntse ba re, Kagishō le thagamō, hoñ tshenyègō ea choganeco e ba wèle, yaka pèlèga e tle e tlèle mosadi eo o moimana; me ga ba ketla ba halola gopè.” Lekwalo leno le tsosa dipotso tse di botlhokwa.
Kagiso le Polokesego—E Tla Pele ga Eng?
Fa o bala ditemana tse dingwe tse di dikologileng mafoko a a tsopotsweng fa godimo a ga Paulo, o tla lemoga gore batho ba ba reng “kagishō le thagamō” ga se Bakeresete ba ba etseng dilo tlhoko, mme go na le moo, ke batho ba ba sa boneng se tota se diregang. Ba mo boemong jo bo kotsi mme ga ba bo lemoge ka gonne ba akanya gore ruri dilo di fetoga go nna tse di molemo. Lefa go ntse jalo, Paulo fa a ne a bua ka Bakeresete o ne a bolela jaana: “Me kaga metlha le dipaka, ba ga echo, ga go batlwe gore lo ka kwalèlwa señwe.” (1 Bathesalonia 5:1) Ee, re tshwanetse ra nna re itse ka thulaganyo ya Modimo ya ditiragalo. Ka ntlha yang? Ka gonne Paulo o ne a bolela gore nako ya tshenyego ya tshoganyetso, eo e bidiwang “letsatsi ya Morèna,” e tla “hèla yaka legodu bosigo.”—1 Bathesalonia 5:2.
Go bolelwa gono ga kagiso le polokesego go go boleletsweng pele go akaretsa eng? Go phepafetse gore, e tshwanetse ya bo e le selo se se fetang go bua fela. Batho ba ntse ba bua ka kagiso mo e ka nnang ka nako yotlhe e ba ntseng ba lwa ka yone. Mafoko a ga Paulo a tshwanetse a bo a lebisa go nako eo mo go yone merafe e bonalang e fitlhelela kagiso le polokesego ka yone ka tsela e e tlhomologileng. Mme yone e tla bo e le ya maaka fela. Selo se se bonalang e le kagiso le boammaaruri eo e gogelang kwa tshenyegong ya tshoganyetso go phepafetse gore ga se kagiso ya boammaaruri ebile ga se polokesego ya mmatota.
Jesu le ene o ne a bua ka tshenyego eno eo e tla tlang ka tshoganyetso. O ne a e bitsa “sepitla se segolo mo metlheñ euō, se se e señ se ke se nne, e sa le ka tshimologō ea lehatshe go tla nakoñ eno; nya, le gōna go se ketla go tlhōla go nna yalo gopè.” Makgolo a le mmalwa a dingwaga pele Jesu a tla, moperofeti Daniele le ene o ne a bua ka yone, mme o ne a e tlhalosa jaaka “motlha oa khuduègō, o e sa leñ ka go nna morahe le go tla mo go lōna lobaka louō go e se go ke go nne opè o o nntseñ yalo.”—Mathaio 24:21; Daniele 12:1.
Go sa kgathalesege gore a o e bitsa sepitla se segolo, kana nako ya khuduego—go ya ka boperofeti, e tlile go fedisa karolo nngwe le nngwe ya tsamaiso ya lefatshe leno ya ga Satane. Mo boemong jwa gore e bolele gore Modimo o a e amogela, polelo eno eo e perofetilweng ya kagiso le polokesego e gogela kwa go se se farologaneng le seo!—Bapisa Sefania 3:8.
Maemo A A Amanang le Seno A Ne A Senolwa
A dilo tse di diregang bosheng jaana tse di lebegang di isa kwa kutlwanong e kgolwane ya lefatshe le tsholofelo eo di e lereng ya kagiso le polokesego di diragatsa tlhagiso ya boperofeti ya ga Paulo? Gone, jaaka fa makasine ono o setse o bontshitse gantsi, fa e sa le ka 1914 re ntse re bona go diragadiwa ga dipolelelopele di le mmalwa tsa Bibela tse di leng malebana le go nna gone ga ga Jesu kwa legodimong mo maatleng a Bogosi. (Mathaio, dikgaolo 24, 25; 2 Timotheo 3:1-5; Tshenolō 6:1-8) Jesu o ne a bontsha gore letsatsi la ga Jehofa, fa tshenyego ya tshoganyetso e tla bo e wela batho ba ba boikepo, le tla tla fa maloko a losika lwa batho ba ba neng ba bona go simolola ga nako eno ba santse ba tshela.—Luke 21:29-33.
Moaposetoloi Paulo le ene o ne a bolela maemo ao a neng a tla gogela kwa go seno. O ne a bolela jaana: “Fa ba ntse ba bua ka kagiso le polokesego, ka gangwe fela matlhotlhapelo a tla bo a ba wela.” Mafoko ano a ga Paulo mo go The New English Bible a bontsha ka phepafalo gore sepitla se segolo se nna gone “fa ba ntse ba bua.” Jaaka legodu bosigo—leo le sa bonelwang pele—tshenyego e tla tla e sa lebelelwa, fa batho ba le bantsi ba tla bo ba isitse tlhokomelo kwa kagisong le polokesego tseo ba di solofetseng. Ka gone, lemororo gone jaanong re ka se ka ra bolela re tlhomamisa gore a maemo a gone jaanong a kagiso le polokesego a diragatsa mafoko a ga Paulo—kana gore go bua ka kagiso le polokesego go santse go tla nna ka selekanyo se se kana kang—lebaka la go bo dipuo tse di ntseng jalo jaanong di utlwiwa ka selekanyo se se sa lekaneng le sepe sa pele le dira gore Bakeresete ba bone kafa go tlhokafalang ka gone gore ba nne ba ntshitse matlho dikgapeng ka dinako tsotlhe.
‘Go Ganetsana’ ga Mebuso E Megolo ya Lefatshe
Fa a ne a bua ka motlha wa khuduego, moperofeti Daniele le ene o ne a bua ka selo se sengwe seo se neng se tla direga se se gogelang kwa tiragalong eno. O ne a bolela gore motlha wa khuduego o ne o tla direga kwa bokhutlong jwa kganetsano e e tsereng lobaka lo loleele thata e le fa gare ga mebuso e mebedi e e farologaneng, o mongwe o bidiwa “kgosi ea botsheka” mme o mongwe o bidiwa, “kgosi ea borwa.” (Daniele 11:5-43) Fa esale ka bokhutlo jwa Ntwa ya Bobedi ya Lefatshe, mebuso eno e e sa tshwaneng e ntse e emelwa ke “kgosi ea borwa” ya bokapitale le “kgosi ea botsheka” ya bososiale.
Daniele o ne a bolelela pele gore kganetsano e e botlhoko mo gare ga mebuso e mebedi eno, jaaka fa e bonwe mo dingwageng tse 45 tse di fetileng, e ne e tla “ganetsana,” jaaka batho ba babedi ba ba lwang ba lwela go fenya. Bosheng fela jaana, go ganetsana gono go lebega go fokotsegile. Ka sekai, ka May ngogola, tona ya merero ya dinaga di sele wa kwa Soviet o ne a bolela gore Ntwa ya Molomo eo e neng e le gone e fedile. Ka June, makasine wa Time o ne wa bua ka dipuisano tse dikgolo tse di leng gone fa gare ga United States le Soviet Union mme ya bolela jaana: “Dingwe tsa ditumalano malebana le dibetsa le go lekwa ga didirisiwa tsa nuklea di ne di tla lebega e le selo se se tshosang mo dingwageng di sekae tse di fetileng. Gone jaanong, tota le eleng lefa di sekasekiwa tsotlhe, di lebega di sa fitlhelele setlhoa sa tsone.”
Gore a botsala jo bo bonalang fa gare ga mebuso e mebedi eno ke jwa nakwana kana ke jo bo nnelang ruri, go tla bonala fa nako e ntse e tsamaya. Lefa go ntse jalo, go na le selo se le sengwe fela se re ka tlhatswegang pelo ka sone. Lobaka lwa nako lo Jesu a neng a bua ka lone lo setse lo gatetse pele thata. Ebile dilo tse di diregang mo lefatsheng di bontsha gore re setse re atamela ditiragalo tse di neng tsa bolelelwa pele ke moaposetoloi Paulo le moperofeti Daniele. Lemororo ditiragalo tse di diragalang bosheng jaana tsa sepolotiki di tlhotlhelediwa ke dikereke tsa Labokeresete go ya bokgakaleng jo bo rileng, ga di kitla di bo di gogela kwa kagisong e e nnelang ruri. Bosupi bo bontsha gore di tlile go gogela kwa go se se farologaneng gotlhelele le se se lebeletsweng ke merafe ya lefatshe leno.
[Ditshwantsho mo go tsebe 6]
E tla re fa nako e ntse e tsamaya go tla bonala gore se se bonalang e le botsala fa gare ga mebuso e megolo eno e mebedi se tlile go tsaya lobaka lo lo kae
[Motswedi wa Setshwantsho]
USSR Mission to the UN