Leina la Modimo le Busediwa Gape

“GO TSERE dingwaga tse di ka nnang 60 gore leina la Modimo eleng ‘JHWH,’ yo e leng ene Modimo mme e se wa Bajuda fela gape e le wa Bakeresete, le busediwe gape koo motaki a neng a le beile teng pele.” Ke kafa pampiri ya dikgang ya Jeremane Schwarzwälder Bote e akgelang ka teng ka go busediwa ga leina la Modimo mo loboteng lo lo kafa pele lwa holo ya toropo kwa Horb, kwa borwa jwa Jeremane. Mme ke ka ntlha yang fa leina leo le ne le ile la tlosiwa?

Pampiri eo ya dikgang e bega gore lobota lo lo kafa ntle lwa holo ya toropo lo ne lwa pentiwa mme lobota lo lo kafa pele lo ne lwa kgabisiwa ka ditshwantsho. Go ne go akarediwa Tetragrammaton eleng ditlhaka tse nne tsa Sehebera tse di emelang leina la Modimo.

“Leina leno, le le tlhagang ka makgetlo a a fetang 6 000 mo Bibeleng,” pampiri eno e a tswelela, “ke ‘Jehofa’ kana sengwe se tshwanang le seo ka Sejeremane. Ga go a phepafala sentle gore tota le bidiwa jang gonne Sehebera se ne se kwalwa ka ditumammogo fela. Mmadi ke ene a neng a itsenyetsa ditumanosi.”

Lefa go ntse jalo, ka 1934 baemedi ba Lekgotla la Bonazi ba ne ba swetsa ka gore Tetragrammaton e ne “e sa dumalane le dilo tse di neng di dumelwa ka nako eo” mme e ne e tshwanetse go tlosiwa ka pente. Se se itumedisang ke gore jaanong Tetragrammaton e buseditswe. Pampiri eo ya dikgang e akgela jaana: “Gompieno lobota lo lo kafa pele [lwa holo ya toropo], lo lo kgabisitsweng ka ditshwantsho tsa hisitori, setshwantsho se se tlhaolang toropo eo, le ditshwantsho tse di tlhomilweng, ke ‘sengwe’ se o tshwanetseng go se bona se se kwa Horb.”