Dipotso Tse Di Tswang go Babadi
A go ya ka se se mo go Mathaio 11:11 re tshwanetse go konela gore Jesu o ne a itsile go sale gale gore Johane Mokolobetsi o ne a tla swa pele Jesu a swa?
Ee, go lebega gore Jesu o ne a itse gore Johane o ne a se kitla a tshela go fitlha e nna Mokeresete yo o tloditsweng, ka go bo Jesu o ne a akgela jaana: “Amarure kea lo raea, ka re, Mo go ba ba tsecweñ ke basadi ga go a coga opè eo mogolo go heta Yohane Mokolobetsi; leha go nntse yalo eo o leñ mmōtlana mo bogosiñ yoa legodimo o mogolo bogolo go èna.”—Mathaio 11:11.
Fa moengele Gabariele a ne a itsise ka botsalo jwa ga Johane, o ne a bolelela pele gore Johane “o tla mo ètèlèla pele ka mōea le ka nonohō ea ga Eliya . . . go baakanyetsa Morèna seshaba.” Johane o ne a tlile go tla pele Mesia a tla, a baakanyetsa batho go tla ga Mesia wa ga Jehofa. Mme ga go sepe mo polelong eno ya bomodimo se se neng se bontsha gore Johane ka boene o ne a tlile go nna morutwa wa ga Mesia yo a neng a tla yoo, kana gone gore mafoko a seperofeti a a neng a buiwa ke rraagwe Johane ebong Sakaria a ne a akantsha selo se se ntseng jalo.—Luke 1:17, 67-79.
Ka gone, fa a sena go kolobetsa Jesu, Johane o ne a tswelela a rera le go kolobetsa, a nna a dira kabelo ya gagwe ya go baakanya batho. Johane o ne a kgona go itse ka kgakgamatso gore Jesu o ne a tlile go kolobetsa ka moya o o boitshepo, mme Johane ga a ka a bolela gore ene o ne a tlile go amogela moya o o boitshepo, e nna Mokeresete yo o tloditsweng. (Mathaio 3:11) Johane gape o ne a lemoga gore o ne a tla se ka a bonwa thata fa Jesu ene a ne a tlile go bonwa thata.—Yohane 3:22-30.
Johane o ne a setse a le mo kgolegelong fa Jesu a ne a bolela seo re se balang mo go Mathaio 11:11. Jesu o ne a bolela pele ga nako gore moperofeti yo o mo kgolegelong yono o ne a le mmotlana mo go yo mmotlana yo mo isagweng a neng a tlile go dira jaaka moperesiti yo gape e leng kgosi kwa magodimong. Lefa go ntse jalo, go lebega Jesu a ne a itse gore Johane o ne a tla tloga a swa, a tloga mo lefatsheng pele tsela e “ncha” e e yang kwa botshelong jwa selegodimo e bulwa. (Bahebera 10:19, 20) Seo se ne se raya gore Johane o ne a se kitla a tshela go fitlha ka Pentekosete 33 C.E., fa barutwa ba ga Jesu ba ne ba simolola go tlodiwa ka moya. Ka gone, mantswe a Jesu a neng a akgela ka one a a mo go Mathaio 11:11 a ka nna a tsewa gore a supa gore o ne a itse gore Johane o ne a se kitla a ya kwa legodimong.