Moya wa ga Jehofa O Goga Batho ba Gagwe

“Mōea oa gago o molemō; u nkgōgè mo lehatshiñ ya thōkgamō.”—PESALEMA 143:10.

1, 2. Ke eng se se ka nnang sa bakela batlhanka ba ba ikanyegang ba ga Jehofa matshwenyego?

‘KE TSHWENYEGILE thata mo maikutlong! Nka bona kae kgomotso? A Modimo o ntatlhile?’ A o a tle o ikutlwe ka tsela eo? Fa e le gore o a tle o ikutlwe jalo, ga o esi. Le mororo batlhanka ba ba ikanyegang ba ga Jehofa ba nna mo paradaiseng e e itumedisang ya semoya, ka dinako tse dingwe ba a tle ba lebane le mathata a a tshwenyang maikutlo, diteko, le dithaelo tse di tlelang batho botlhe.—1 Bakorintha 10:13.

² Gongwe o tshwenngwa ke teko nngwe e e nnetseng ruri kana ke sengwe se se go bakelang kutlobotlhoko e kgolo. O ka nna wa tswa o utlwisitswe botlhoko ke loso lwa mongwe yo o mo ratang ebile o ka nna wa bo o ikutlwa ekete o latlhegile tota. Kana pelo ya gago e ka nna ya bo e tshwenngwa ke bolwetsi jwa tsala nngwe e o e ratang thata. Maemo a a ntseng jalo a ka nna a bo a go amoga boitumelo le kagiso ebile a ka nna a bo a tshosetsa le tumelo ya gago tota. O tshwanetse wa dirang?

Kopa Modimo Gore A go Fe Moya wa Gagwe

3. Fa sengwe se go amoga dinonofo tse di tshwanang le kagiso le boitumelo, go ka nna botlhale go dirang?

³ Fa sengwe se go amoga kagiso, boitumelo, kana nonofo nngwe ya bomodimo, go ka nna botlhale gore o rapelele moya o o boitshepo wa Modimo, kana maatla a a dirang. Ka ntlha yang? Ka gonne moya wa ga Jehofa o tlhagisa maungo a a molemo ao a thusang Mokeresete go lebana le mathata, diteko, le dithaelo. Morago ga gore a tlhagise ka “ditihō tsa nama,” moaposetoloi Paulo o ne a kwala jaana: “Me louñō loa Mōea ke loratō, le boitumèlō, le kagishō, le bopelotelele, le bopelonomi, le molemō, le boikañō, le boiñōtlō, le boikgapō: dilō tse, ga di añwe ke molaō opè.”—Bagalatia 5:19-23.

4. Fa motho a lebane le teko nngwe kana thaelo, ke ka ntlha yang fa go ka nna ga bo go le molemo gore a tlhamalale mo dithapelong tsa gagwe?

⁴ Ka ntlha ya mofuta wa teko e o lebaneng nayo, o ka nna wa lemoga gore o mo kotsing ya go latlhegelwa ke boingotlo jwa gago, kana bonolo. Fa go le jalo he, tlhalosa bothata jaaka fa bo ntse ka go rapela Jehofa Modimo gore a go neye leungo la moya wa boingotlo. Fa o lebanwe ke diteko dingwe tse di rileng, o tlhoka thata leungo la boikgapo. Gone ke boammaaruri gore, gape go tla bo go siame go rapelela gore Modimo a go thuse gore o emelelane le thaelo, o gololwe mo go Satane, le gore a go neye botlhale jo o bo tlhokang go itshokela teko.—Mathaio 6:13; Yakobe 1:5, 6.

5. Fa maemo e le a a tshwenyang maikutlo thata mo e leng gore ga o itse gore ke loungo lofe lwa moya lo o tshwanetseng wa lo rapelela, o tshwanetse wa dirang?

⁵ Lefa go ntse jalo, ka dinako tse dingwe maemo e ka nna ya tswa e le a a gatelelang tota kana e le a a tlhakanyang tlhogo mo e leng gore ga o itse gore o tlhoka leungo lefe la moya. Tota ebile, boitumelo, kagiso, boingotlo, le dinonofo tse dingwe tsa bomodimo di ka nna tsa bo di tsentswe mo kotsing tsotlhe fela. O tshwanetse wa dirang he? Ke ka ntlha yang fa o sa kope Modimo gore a go neye moya o o boitshepo ka boone mme o dire gore maungo a o a tlhokang a gole mo go wena? Maungo a o a tlhokang e ka nna ya tswa e le lorato kana boitumelo kana kagiso kana maungo a moya a kopane otlhe fela. Gape rapela gore Modimo a go thuse o kgone go dira seo moya wa gagwe o go kaelang go se dira, ka gonne o o dirisa go kaela batho ba one.

Jehofa O Iketleeleditse go Thusa

6. Jesu o ne a otlelela jang mo balateding ba gagwe kafa go tlhokegang ka gone gore ba rapele ka go bisa go khutla?

⁶ Fa barutwa ba ga Jesu Keresete ba ne ba batla go rutiwa go rapela, o ne a ba kgothaletsa gore ba rapelele le moya wa Modimo. La ntlha Jesu o ne a dirisa setshwantsho seo boikaelelo jwa sone e neng e le go ba kgothaletsa gore ba rapele ka go bisa go khutla. O ne a bolela jaana: “Ko ohe oa lona eo o ka reñ a na le tsala, me a ea kwa go èna gare ga bosigo, a mo raea, a re, Tsala, nkadima dinkgwè di le tharo; Gonne tsala ea me e nkgorogetse, e cwa loetoñ, me ga ke na sepè se nka se mo hañ; Me eole eo o kwa teñ a ka mo hetola, a re, Se nchwenye; go setse go cwecwe, le bana ba me ke na nabō mo bolaoñ; ga nkake ka coga ka gu naea? Kea lo raea, leha a gana go coga a mo naea ka go bo e le tsala ea gagwè, leha go nntse yalo, ka ntlha ea kèmèlèlō ea gagwè o tla coga a mo naea kaha o tlhōkañ ka gōna.”—Luke 11:5-8.

7. Mafoko a ga Jesu a a mo go Luke 11:11-13 a bolelang, mme a re tlhomamisetsa eng malebana le Modimo le moya wa gagwe?

⁷ Jehofa o rata go thusa mongwe le mongwe wa batlhanka ba gagwe ba ba ikanyegang ba ba ineetseng, mme o reetsa ditopo tsa bone. Mme fa motho yo o ntseng jalo a ‘nna a kopa,’ jaaka fa Jesu a ne a kgothaletsa jalo, seno se bontsha gore o eletsa selo seo go tswa pelong ebile go bontsha gore o na le tumelo. (Luke 11:9, 10) Keresete o ne a oketsa jaana: “Me ko ohe oa lona eo o ka reñ e le rra bana, me ha ñwana oa gagwè a mo lōpa senkgwè, o ka mo naea lencwè? Kgotsa ha a lōpa tlhapi, o ka mo naea nōga mo boemoñ yoa tlhapi? Goñwe ha a lōpa letsae, a o ka mo naea phepheñ? Me ke gōna, ha lona, lo le boshula, lo itse go naea bana ba lona dinèō tse di molemō; bogolo yañ Rra eno oa legodimo o tla naea ba ba mo lōpañ Mōea o o Boitshèpō.” (Luke 11:11-13) Fa rre wa mo lefatsheng, le mororo a ka tswa a le bosula ka tsela e e rileng ka ntlha ya go bo a na le boleo, a neela ngwana wa gagwe dilo tse di molemo, eleruri Rraarona wa selegodimo o tla tswelela a neela mongwe le mongwe wa batlhanka ba gagwe ba ba ikanyegang moya o o boitshepo oo ba o mo kopang ka boikokobetso.

8. Pesalema 143:10 e dira jang mo go Dafide, Jesu, le batlhanka ba Modimo ba motlha wa segompieno?

⁸ Gore re solegelwe molemo ke moya wa Modimo re tshwanetse ra bo re rata go latela tsela eo o kaelang ka yone jaaka fa Dafide a ne a dira. O ne a rapela jaana: “U nthutè go diha go rata ga gago; gonne u Modimo oa me: mōea oa gago o molemō; u nkgōgè mo lehatshiñ ya thōkgamō.” (Pesalema 143:10) Dafide, yo o neng a lelekilwe ke kgosi ya Baiseraele ebong Saulo, o ne a batla gore moya wa Modimo o mo goge e le gore a tle a tlhomamisege gore tsela ya gagwe e ne e le e e siameng. Ka bonako fela Abiathare o ne a tla ka letsela la boperesiti le le neng le dirisiwa go tlhomamisa thato ya Modimo. Jaaka moemedi wa baperesiti ba Modimo, Abiathare o ne a laela Dafide gore o tshwanetse a tsamaya ka tsela efe gore a itumedise Jehofa. (1 Samuele 22:17–23:12; 30:6-8) Jaaka Dafide, Jesu o ne a kaelwa ke moya wa ga Jehofa, mme go ile ga nna jalo le ka balatedi ba ga Keresete ba ba tloditsweng jaaka setlhopha. Ka 1918-19, batho ba ne ba ba leba jaaka ba ba latlhilweng, mme baba ba bone ba bodumedi ba ne ba akanya gore ba ka ba bolaela ruri. Batlodiwa bano ba ne ba rapelela gore ba tswe mo boemong joo jwa go sa dire sepe, mme ka 1919, Modimo o ne wa araba dithapelo tsa bone, wa ba golola, mme wa ba neela nonofo gore ba mo direle. (Pesalema 143:7-9) Eleruri, moya wa ga Jehofa ka nako eo o ne o thusa batho ba gagwe o bo o ba goga, jaaka fa o dira le go tla go fitlha gompieno.

Ka Moo Moya O Thusang ka Gone

9. (a) Moya o o boitshepo o dira jang jaaka “mothusi”? (b) Re itse jang gore moya o o boitshepo ga se motho? (Bona ntlhanyana e e kwa tlase.)

⁹ Jesu Keresete o ne a bitsa moya o o boitshepo a re ke “mothusi.” Ka sekai, o ne a bolelela balatedi ba gagwe jaana: “Me ke tla rapèla Rara, me o tla lo naea Mogomotsi [“mothusi,” NW] o sele, gore a nnè le lona ka bosakhutleñ, Eboñ Mōea oa boamarure: o lehatshe le sa kakeñ ya o chola: gonne ga le o bone, ga le o itse: lona loa o itse; gonne o nntse le lona, me o tla nna mo go lona.” Mo gare ga dilo tse dingwe, “mothusi” yoo o ne a tla nna morutisi, ka gonne Keresete o ne a solofetsa jaana: “Me Mogomotsi [“mothusi,” NW], eboñ Mōea o o Boitshèpō, eo Rara o tla mo romañ ka leina ya me, èna o tla lo ruta dilō cotlhe, me o tla lo gakolola cotlhe tse ke di buileñ le lona.” Moya ono gape o ne o tla neela bosupi ka Keresete, mme o ne a tlhomamisetsa barutwa ba gagwe jaana: “Go ka nna molemō kaga lona ha ke tsamaea: gonne ha ke sa tsamaee, Mogomotsi [“mothusi,” NW] ga a ketla a tla mo go lona; me ha ke tsamaea, ke tla mo roma mo go lona.”—Yohane 14:16, 17, 26; 15:26; 16:7.a

10. Moya o o boitshepo o ne wa itshupa e le mothusi ka ditsela dife?

¹⁰ Jesu o ne a tsholola moya o o boitshepo o a neng a o solofeditse balatedi ba gagwe ka letsatsi la Pentekosete ka 33 C.E. go tswa kwa legodimong. (Ditihō 1:4, 5; 2:1-11) Jaaka mothusi, moya ono o ne o dira gore ba tlhaloganye thato ya Modimo le boikaelelo jwa gagwe ka mo go oketsegileng mme wa ba senolela Lefoko la one la boperofeti. (1 Bakorintha 2:10-16; Bakolosa 1:9, 10; Bahebera 9:8-10) Mothusi yono gape o ne a neela barutwa ba ga Jesu maatla a go nna basupi mo lefatsheng lotlhe. (Luke 24:49; Ditihō 1:8; Baefesia 3:5, 6) Gompieno, moya o o boitshepo o ka kgona go thusa Mokeresete yo o ineetseng gore a gole mo kitsong fa a dira gore a bone dilo tsa semoya tseo Modimo o re neelang tsone ka “motlhanka eo o boikañō le eo o botlhale.” (Mathaio 24:45-47) Moya wa Modimo o ka kgona go re thusa ka go re neela kgothatso le maatla ao re a tlhokang gore re neele bosupi jaaka bangwe ba batlhanka ba ga Jehofa. (Mathaio 10:19, 20; Ditihō 4:29-31) Lefa go ntse jalo, moya o o boitshepo gape o thusa batho ba Modimo ka ditsela tse dingwe.

“Ka Diphègèlō Tse Di Sa Kakeñ Tsa Buiwa”

11. Fa teko e bonala ekete e kgolo thata, ke eng seo Mokeresete a tshwanetseng a se dira?

¹¹ Fa Mokeresete a tshwenngwa ke teko eo e bonalang ekete e a mo fekeetsa, o tshwanetse a dirang? Ee, rapelela moya o o boitshepo, mme o o letle gore o dire tiro ya one! “Mōea le ōna o thusa thetelèlō ea rona ka mokgwa o o nntseñ yalo:” go ne ga rialo Paulo, “gonne ga re itse go rapèla yaka re chwanetse; me Mōea ka osi o re rapèlèla ka diphègèlō tse di sa kakeñ tsa buiwa; Le èna eo o hukutsañ dipelo o itse o e leñ mogopolō oa Mōea, ka o rapèlèla baitshepi kaha go rateñ ga Modimo.”—Baroma 8:26, 27.

12, 13. (a) Baroma 8:26, 27 e dira jang mo dithapelong tse di rapelwang bogolo jang mo maemong a a lekang? (b) Paulo le ditsala tsa gagwe ba ne ba dirang fa ba ne ba le kafa tlase ga kgatelelo e kgolo mo nageng ya Asia?

¹² Baitshepi bao ba moya wa Modimo o ba rapelelang ke balatedi ba ga Jesu ba ba tloditsweng, ba ba nang le tsholofelo ya selegodimo. Mme go sa kgathalesege gore a o bileditswe go ya kwa legodimong kana o na le tsholofelo ya go tshela mo lefatsheng, jaaka Mokeresete o ka kgona go thusiwa ke moya o o boitshepo. Ka dinako tse dingwe Jehofa o araba ka tlhamalalo fa motho a rapelela sengwe ka tlhamalalo. Lefa go ntse jalo, ka dinako tse dingwe o ka nna wa bo o tshwenyegile thata mo maikutlong mo e leng gore ga o kgone go tlhalosa ka mafoko kafa o ikutlwang ka teng mme o ka kgona go kopa Jehofa ka diphegelo tse di ka se kang tsa buiwa. Tota ebile, o ka nna wa bo o sa itse gore ke eng se se go siametseng botoka ebile o ka nna wa bo wa kopa selo se eseng sone ntle le fa o rapelela gore o newe moya o o boitshepo. Modimo o a itse gore o batla gore thato ya gagwe e direge, ebile o a itse gore tota o tlhoka eng. Mo godimo ga moo, ka moya wa gagwe o o boitshepo, o ne a dira gore dithapelo di le dintsi di kwalwe mo Lefokong la gagwe, mme dithapelo tseno di bolela ka maemo a a lekang. (2 Timotheo 3:16, 17; 2 Petere 1:21) Ka gone, Jehofa a ka nna a leba maikutlo mangwe a a boletsweng mo dithapelong tseno tse di tlhotlheleditsweng jaaka maikutlo ao o ratang go a bolela jaaka mongwe wa batlhanka ba gagwe, mme a ka nna a di go arabela.

¹³ Paulo le ditsala tsa gagwe ba ka nna ba bo ba ne ba sa itse gore ba rapelele eng fa ba ne ba bogisiwa mo nageng ya Asia. Ereka ‘ba ne ba gateletswe thata go fetisa nonofo ya bone ba ne ba ikutlwa ba tshwanelwa ke loso.’ Mme ba ne ba kopa gore ba bangwe ba ba rapelele mme ba ne ba ikanya Modimo, yo o ka kgonang go tsosa baswi, mme o ne a kgona go ba golola. (2 Bakorintha 1:8-11) Abo go gomotsa jang ne go bo Jehofa Modimo a utlwa dithapelo tsa batlhanka ba gagwe ebile a di araba!

14. Ke molemo ofe o o ka bonwang fa Jehofa a letla teko gore e tswelele ka lobakanyana?

¹⁴ Gantsi batho ba Modimo ba tlhaselwa ke diteko jaaka setlhopha. Jaaka fa re bone pelenyana, ba ne ba bogisiwa ka Ntwa ya Lefatshe I. Le mororo ka nako eo ba ne ba sa tlhaloganye sentle gore boemo jwa bone ke bofe mme ka gone ba sa itse gore tota ba tshwanetse ba rapelela eng, Lefoko la ga Jehofa le ne le na le dithapelo tsa boperofeti tse a neng a di ba arabela. (Pesalema 69, 102, 126; Isaia, kgaolo 12) Mme go tweng fa Jehofa a letla teko gore e nne e ntse e le gone ka lobakanyana? Seno se ka nna sa felela e le bosupi, se ka nna sa tlhotlheletsa ba bangwe gore ba amogele boammaaruri, ebile se ka neela Bakeresete sebaka sa go bontsha lorato lwa bokaulengwe ka go rapelela badumedi mmogo le bone ba ba bogang kana eseng jalo e nne ka go ba thusa. (Yohane 13:34, 35; 2 Bakorintha 1:11) Gakologelwa gore Jehofa o kaela batho ba one ka moya wa gagwe o o boitshepo, o dira se se leng molemolemo mo go bone, ebile ka metlha o dira dilo ka tsela eo e tla tlotlang leina la gagwe le le boitshepo e bo e le itshepise.—Ekesodo 9:16; Mathaio 6:9.

O Se Ka le ka Motlha Wa Hutsafatsa Moya

15. Bakeresete ba ka ikaega ka moya wa ga Jehofa gore o ba direle eng?

¹⁵ Ka gone fa o le motlhanka wa ga Jehofa, rapelela moya o o boitshepo ka nako ya fa o lekwa le ka dinako tse dingwe. Morago ga moo o bo o tlhomamisa gore o latela tsela e o go kaelang ka yone, ka gonne Paulo o ne a kwala jaana: “Lo se ka loa hutsahatsa Mōea o o Boitshèpō oa Modimo, o lo kanelecweñ letsatsi ya thèkololō ka ōna.” (Baefesia 4:30) Moya wa Modimo e ne e le sekano ebile e santse e le sekano, kana ‘peelelo’ mo Bakereseteng ba ba ikanyegang ba ba tloditsweng—ke gore, botshelo jwa selegodimo jwa go sa swe. (2 Bakorintha 1:22; Baroma 8:15; 1 Bakorintha 15:50-57; Tshenolō 2:10) Bakeresete ba ba tloditsweng le ba ba nang le tsholofelo ya go tshela mo lefatsheng ba ka ikaega ka moya wa ga Jehofa gore o ba direle go le gontsi. O ka kgona go ba kaela fa ba ntse ba tshela ka boikanyegi le go ba thusa gore ba tile go dira ditiro tsa boleo tse di ka dirang gore ba se ka ba amogelwa ke Modimo, ba latlhegelwe ke moya wa gagwe o o boitshepo, mme ba se ka ba bona botshelo jo bo sa khutleng.—Bagalatia 5:19-21.

16, 17. Mokeresete a ka hutsafatsa moya jang?

¹⁶ Mokeresete a ka hutsafatsa jang moya, go sa kgathalesege gore a o a itse kana ga a itse? Gone, Jehofa o dirisa moya wa gagwe go dira gore go nne le kutlwano le go tlhopha banna ba ba nang le boikarabelo mo phuthegong. Ka gone, fa leloko la phuthego le ne le tshwanelwa ke gore le ngongorege ka bagolwane ba ba tlhophilweng, a anamisa tshebo e e senyang, le go dira dilo tse dingwe, o tla bo a sa latele ditsela tseo moya wa Modimo o kaelang ka tsone go isa kwa kagisong le kutlwanong. Ka kakaretso, o ne a tla bo a utlwisa moya botlhoko.—1 Bakorintha 1:10; 3:1-4, 16, 17; 1 Bathesalonia 5:12, 13; Yude 16.

¹⁷ Fa a ne a kwalela Bakeresete kwa Efeso, Paulo o ne a tlhagisa gore go itlhokomelwe mo mokgweng wa go bua maaka, go galefela ruri, go utswa, puo e e sa siamang, keletso e e tseneletseng ya boaka, boitshwaro jo bo tlhabisang ditlhong, le metlae e e sa siamang. Fa Mokeresete a ile a itetla ka bonya ka bonya go tsena mo dilong tse di tshwanang le tseno, o tla bo a sa dire tumalanong le kgakololo e e tlhotlheleditsweng ka moya ya Bibela. (Baefesia 4:17-29; 5:1-5) Ee, ebile o tla bo a hutsafatsa moya wa Modimo ka selekanyo se se rileng.

18. Ke eng seo se ka diragalelang Mokeresete ope fela yo o simololang go itlhokomolosa kgakololo ya Lefoko la Modimo leo le tlhotlheleditsweng ke moya?

¹⁸ Tota ebile, Mokeresete ope fela yo o simololang go itlhokomolosa kgakololo ya Lefoko le le tlhotlheleditsweng ka moya la ga Jehofa a ka nna a simolola go nna le maikutlo kana mekgwa eo e ka nnang ya felela ka gore a leofe ka boomo mme a se tlhole a ratwa ke Modimo. Le mororo a ka nna a bo a sa dire boleo ka nako eo, a ka nna a bo a tsamaela ntlheng eo. Mokeresete yo o ntseng jalo yo o sa tsamaisaneng le tsela e moya o mo gogang ka yone o tla bo a o hutsafatsa. Ka gone o tla bo gape a gana Jehofa ebile a mo hutsafatsa, yo e leng ene Motswedi wa moya o o boitshepo. Motho yo o ratang Modimo ga a kitla a batla go dira jalo!

Nna O Ntse O Rapelela Moya O O Boitshepo ka Metlha

19. Ke ka ntlha yang fa batho ba ga Jehofa ba tlhoka moya wa gagwe thata gompieno?

¹⁹ Fa o le motlhanka wa ga Jehofa, tswelela pele o ntse o rapelela moya wa gagwe o o boitshepo. Bakeresete ba tlhoka thuso ya moya wa Modimo, bogolo jang mo ‘metlheng eno ya bofelo’ e e nang le dipaka tse di thata go dirisana le tsone. (2 Timotheo 3:1-5) Diabolo le badimona ba gagwe, ba ba lelekilweng go tswa kwa legodimong mme jaanong ba le mo lefatsheng, ba tlhasetse phuthego ya ga Jehofa. Ka gone, jaanong go feta lefa e le leng pele, batho ba Modimo ba tlhoka moya wa gagwe o o boitshepo gore o ba goge, kana o ba kaele, mme o ba kgonise go itshokela mathata le pogiso.—Tshenolō 12:7-12.

20, 21. Ke ka ntlha yang fa re latela tsela eo Lefoko la ga Jehofa, moya wa gagwe, le phuthego ya gagwe di re kaelang ka yone?

²⁰ Ka metlha bontsha gore o anaanela thuso e Jehofa Modimo a e neelang ka moya wa gagwe. Latela tsela eo Lefoko la gagwe le le tlhotlheleditsweng ka moya, ebong Bibela, le kaelang ka yone. Dirisana sentle ka botlalo le phuthego ya Modimo ya selefatshe eo a e gogang ka moya. O se ka le ka motlha wa bo wa tsamaya wa itetla go fapogela mo tseleng eo eseng ya Dikwalo eo e ka nnang ya dira gore o hutsafatse moya o o boitshepo, ka gonne seno se ka nna sa felela ka gore moya ono o tswe mo go wena mme ka go dira jalo wa tlhagelwa ke kotsi semoyeng.—Pesalema 51:11.

²¹ Go gogwa ke moya wa ga Jehofa ke yone fela tsela eo motho a ka mo itumedisang ka yone mme a tshele ka kagiso, a itumetse. Gape, gakologelwa gore Jesu o ne a bitsa moya o o boitshepo a re ke “mothusi,” kana “mogomotsi.” (Yohane 14:16, ntlhanyana e e kwa tlase go NW.) Ka one, Modimo o gomotsa Bakeresete mme o ba nonotsha go lebana le diteko. (2 Bakorintha 1:3, 4) Moya o neela batho ba ga Jehofa maatla a go rera mafoko a a molemo mme o ba thusa gore ba gakologelwe dintlha tsa Dikwalo tse ba di tlhokang go neela bosupi jo bo molemo. (Luke 12:11, 12; Yohane 14:25, 26; Ditihō 1:4-8; 5:32) Ka thapelo le go gogwa ke moya, Bakeresete ba ka kgona go lebana le diteko tsa tumelo ka botlhale jwa selegodimo. Ka gone, mo maemong otlhe a botshelo, ba dula ba ntse ba rapelela moya o o boitshepo wa Modimo. Ka ntlha ya moo, moya wa ga Jehofa o goga batho ba gagwe.

[Ntlha e e kwa tlase]

O Araba Jang?

◻ Ke ka ntlha yang fa re rapelela moya wa ga Jehofa o o boitshepo?

◻ Moya o o boitshepo ke mothusi ka tsela efe?

◻ Go hutsafatsa moya go bolelang, mme re ka tila jang go dira jalo?

◻ Ke ka ntlha yang fa re tshwanetse ra nna re rapelela moya o o boitshepo le go latela tsela eo o re kaelang ka yone?

[Setshwantsho mo go tsebe 15]

Fela jaaka rre yo o lorato a neela morwawe dilo tse di molemo, Jehofa le ene o neela batlhanka ba gagwe moya wa gagwe fa ba o rapelela

[Setshwantsho mo go tsebe 17]

A o itse ka moo moya wa Modimo o kopelang Bakeresete ba ba rapelang ka gone?