Boitumelo Jo Ke Bo Tliseditsweng Ke go Direla Jehofa
JAAKA FA E BOLETSWE KE GEORGE BRUMLEY
E ne e le gone ke fetsang go ruta setlhopha sa baithuti ba radio sa mapodisi a mabotlana a a neng a santse a katisiwa a Mmusimogolo Haile Selassie fa mongwe wa bone a ne a ntseela kwa thoko a mpolelela gore o ne a itse gore ke ne ke le mongwe wa barongwa ba Basupi ba ga Jehofa. O ne a mpotsa jaana ka go fisega pelo: “A o ka ithuta Bibela le nna?”
ERE ka ka nako eo tiro ya rona ya go rera e ne e thibetswe kwa Ethiopia, nka bo ke kobilwe mo nageng eo, fela jaaka Basupi ba bangwe, fa babusi ba ka bo ba ile ba itse ka ga me. Ke ne ke ipotsa gore a moithuti yoo o ne a batla tota go rutiwa kana e ne e le moemedi wa puso yo o neng a rometswe gore a tle go nthaisa. Jaaka tlhogo ya lelapa ebile ke na le bana ba bararo ba bannye ba ke neng ke tshwanetse go ba godisa, ke ne ke tshoga fa ke tla go akanya go latlhegelwa ke tiro le go patelediwa go tswa mo nageng eo le go tlogela ditsala tse ke godileng le tsone ebile ke di rata.
‘Mme lefa go ntse jalo,’ o ka nna wa botsa, ‘go tlile jang gore Moamerika yo o neng a na le lelapa le a neng a tshwanetse go le tlhokomela a rate go tla go nna mo bokonebotlhaba jwa Afrika, kgakala le legae la gagwe le ba losika?’ Ntetle gore ke go tlhalosetse.
Go Golela mo United States
Ka bo 1920, fa ke ne ke santse ke le kwa ditlelaseng tse di kwa tlase, rre o ne a dira peeletso ya makasine wa Tora ya Tebelo mme o ne a amogela le sete ya Studies in the Scriptures. Rre o ne a rata go bala dibuka tseno ebile o ne a di bala ka tlhoafalo. E ne e le motho yo o botlhale ebile a rata go dira metlae, jaaka go ne go itshupa ka tsela e a neng a tle a tshameke ka ditlhaloganyo tsa baeng ba a neng a ba laleditse ka Bosontaga. O ne a na le buka e ntle e e neng e khabarilwe ka letlalo e e neng e kwadilwe “Bibela E E Boitshepo” ka ditlhaka tsa gouda kwa pele le kwa morago. O ne a tle a simolole motlotlo ka go re, “Ahee, ke Sontaga. A o ka re balela ditemana di se kae?”
Gantsi moeng o ne a dumela, mme fa a bula buka, a fitlhele go sa kwalwa sepe mo ditsebeng tsa buka eo! Ee gone, motho o ne a gakgamala. Go tswa foo rre o ne a tle a ba tlhalosetse gore ‘baruti ga ba itse sepe ka Bibela’ mme a bo a tsaya Bibela a bala mo go Genesise 2:7. Mo temaneng eo, fa e tlhalosa ka go bopiwa ga motho wa ntlha, Bibela ya re: “Motho o ne a direga moya o o tshedileng.”—Genesise 2:7, King James Version.
Rre o ne a tle a tlhalose gore motho ga a na moya mme ke moya ka boene, gore maduo a boleo ke loso, le gore, fa motho a swa, o a be a sule tota, a sa utlwe sepe. (Moreri 9:5, 10; Esekiele 18:4; Baroma 6:23) Le e leng pele ga ke itse go bala sentle, ke ne ke itse go bua Genesise 2:7 ka tlhogo. Tseno ke tsone dilo tse ke di gakologelwang tsa kwa tshimologong tse di malebana le go nna le boitumelo jwa mmatota jwa go itse boammaaruri jwa Bibela le go abelana le ba bangwe ka jone.
E re ka ka nako eo re ne re amogela Tora ya Tebelo kwa legaeng la rona, lelapa lotlhe le ne la simolola go itumelela go otliwa ka dijo tsa semoya. Mmaagwe mmè o ne a nna le rona, mme o ne a nna mmoledi wa ntlha wa mafoko a a molemo mo lelapeng la rona. Go ne go sena phuthego kwa Carbondale, mo Illinois, kwa re neng re nna teng, mme dipokano tse e seng tsa ka metlha di ne di tshwarwa. Mmè o ne a tle a re tseye re le bana ba batlhano go ya go pota ntlha e nngwe ya toropo ya rona ka kwa koo basadi ba bagolo ba neng ba tshwara thuto ya Tora ya Tebelo gone. Re ne ra simolola go tsaya karolo mo bodiheding jwa tshimo.
Go Tswa mo Tirong ya Diradio go ya kwa Kgolegelong
Ke ne ka nyala ka 1937 fa ke ne ke le dingwaga di le 17 fela. Ke ne ka leka go itshedisa ka go baakanya diradio le go ruta batho go dira tiro eo. Morago ga gore re bone bana ba le babedi ebong Peggy le Hank, lenyalo la me le ne la fela. E ne e le molato wa me gore re tlhalane; ke ne ke sa tshele botshelo jwa Bokeresete. Lebaka la go bo ke sa godisa bana ba me ba babedi ba bagolwane e ntse e le setlhabi mo pelong ka lobaka lo loleele.
Ntwa ya Lefatshe II e ne ya goroga mme e ne ya ntira gore ke akanye ka dilo tse dintsi. Ditlhopha tsa bosole di ne tsa nnaya tshono ya gore ke nne lefotenente le go ruta setlhopha sa masole go baakanya diradio, mme tsela e ke neng ke amegile ka yone mabapi le ka moo Jehofa a lebang ntwa ka yone go ne ga ntlhotlheletsa gore ke simolole go rapela letsatsi le letsatsi. Peeletso ya me ya Tora ya Tebelo e ne e fedile, mme Lucille Haworth o ne a amogela tsiboso ya gore peeletso ya me e ne e fedile mme o ne a nketela. Perry Haworth, yo e neng e le rraagwe Lucille, le bontsi jwa lelapa la gagwe le legolo fa e sa le e nna Basupi go tloga ka bo-1930. Nna le Lucille re ne ra ratana, mme re ne ra nyalana ka December 1943.
Ka 1944, ke ne ka kolobediwa mme ke ne ka kopanela le mosadi wa me mo bodiheding jwa nako e e tletseng jaaka mmulatsela. Ka bonako ke ne ka biletswa go katisetswa bosole mme lefa go ntse jalo ke ne ka gana taletso eo. Seno se ne sa dira gore ke atlholelwe dingwaga di le tharo kwa lefelong la puso la go tokafatsa batho ba ba tlotseng molao mo El Reno, mo Oklahoma. E ne e le boitumelo go boga ka ntlha ya ga Jehofa. Moso mongwe le mongwe fa ke ne ke tsoga mme ke lemoga mo ke neng ke le teng le lebaka la gore ke be ke le koo, ke ne ke ikutlwa ke kgotsofetse thata mme ke ne ke leboga Jehofa. Morago ga ntwa rona bao re neng re fetile dingwaga di le 25 re ne ra simolola go gololwa pele ga nako e re neng re e beetswe. Ke ne ka gololwa ka February 1946.
Bodihedi jwa Nako E E Tletseng
Fa ke ne ke kopana le Lucille gape, o ne a bulatsela kwa toropong e potlana ya Wagoner, mo Oklahoma. Re ne re se na sejanaga, ka jalo, re ne re tsamaya gongwe le gongwe ka maoto, re akaretsa toropo yotlhe. Moragonyana re ne ra fudugela kwa Wewoka, mo Oklahama. Ka bonakonyana morago ga foo ke ne ka bona tiro kwa seteishaneng sa radio se se gautshwane, mme ka simolola go dira mo lefapheng la kgaso. Go ne go se bonolo go dira diura di le thataro ka letsatsi mme ka fa letlhakoreng le lengwe ke bula tsela, mme lefa go ntse jalo re ne re itumeletse tshiamelo e re neng re na le yone ya go direla Jehofa. Re ne ra kgona go reka sejanaga se segologolo pele fela ga kopano ya kwa Los Angeles ka 1947. Ke teng koo re neng ra simolola go akanyetsa go dira kopo ya go katisediwa borongwa kwa Sekolong sa Bibela sa Watchtower sa Gileade.
Re ne ra lemoga gore seno e ne e le kgato e e masisi, mme re ne re sa batle go potlakela go dira tshwetso ya go tlogela United States. Ke ne ke santse ke tletse bohutsana ka ntlha ya go latlhegelwa ke bana ba me, ka tsela e e ntseng jalo re ne ra leka gape go kopa tetla ya go ba newa. Ka ntlha ya mokgwa o ke neng ke tshela ka one mo nakong e e fetileng le rekoto ya me fa ke ne ke le kwa kgolegong, go ne ga dira gore ke se ka ka atlega mo go seo. Ka jalo, re ne ra fetsa ka gore re leke go nna barongwa. Re ne ra lalediwa go tsenela tlelase ya bo-12 ya kwa Gileade.
Re ne ra aloga kwa sekolong ka 1949, mme lefa go ntse jalo pele ga moo re ne ra abelwa go etela diphuthego kwa Tennessee. Morago ga dingwaga di le tharo re ntse re dira tiro ya go potologa mo United States, re ne ra amogela lekwalo le le neng le tswa go poresidente wa ofisi ya Mokgatlho wa Watch Tower a re botsa gore a re ne re ka kgona go ya go ruta mo sekolong kwa Ethiopia mme re ntse re tsweletse mo tirong ya go rera. Sengwe sa dilo tse di neng di tlhokwa ke puso ya koo e ne e le gore barongwa ba tshwanetse go ruta. Re ne ra dumela, mme mo selemong sa 1952, re ne ra leba kwa Ethiopia.
Fa re fitlha kwa Ethiopia, re ne ra ruta ditlelase tse di kwa tlase mo mesong mme motshegare re ne re tshwara ditlelase tsa Bibela tsa mahala. Ka bonako fela bontsi bo ne jwa simolola go tla mo dithutong tsa Bibela tseo mo go tsone gantsi re neng re ruta diura di le tharo kana di le nne letsatsi le letsatsi. Bangwe ba baithuti e ne e le mapodisi; bangwe ba bone e ne e le barutabana kana badiakone kwa dikolong tsa borongwa le dikolo tsa Orthodox ya Ethiopia. Ka dinako dingwe go ne go nna le ba le 20 kana go feta mo tlelaseng nngwe le nngwe ya thuto ya Bibela! Bontsi jwa baithuti bo ne jwa tlogela bodumedi jwa maaka mme ba simolola go direla Jehofa. Re ne re tletse boitumelo. Gape, e ne e re fa ke tsoga moso le moso ke ne ke leboga Jehofa.
Go Nna Batsadi le go Ruta ka fa Tlase ga Thibelo
Ka 1954 re ne ra lemoga gore re ne re tlile go nna batsadi, ka tsela e e ntseng jalo, re ne re tshwanela ke go dira tshwetso ya gore a re ne re tla boela kwa United States kana go nna re ntse re le mo Ethiopia. Mme gone, go sa tsamaeng ga rona, go ne go tla ikaega ka gore a ke ne ke tla bona tiro ya boitshediso. Ke ne ka bona tiro ya go nna moenjenere mo lefapheng la kgaso, ke dira ka seteishane sa radio sa ga Mmusimogolo Haile Selassie. Ka tsela e e ntseng jalo, re ne ra se ka ra tlhola re tsamaya.
Ka September 8, 1954, re ne ra bona ngwana wa mosetsana e leng Judith. Ke ne ka ithaya ke re tiro ya me e ne e babalesegile ka gonne ke ne ke direla mmusimogolo, mme lefa go ntse jalo, morago ga dingwaga di le pedi tiro eo e ne ya ntatlhegela. Lefa go ntse jalo, go ise go bo go fete kgwedi, ke fa ke hirwa ke Lefapha la Sepodisi—ebile ke amogedisiwa madi a mantsi—go ruta tlelase ya masogwana go baakanya diradio tse di amogelang le go romela molaetsa. Mo sebakeng sa dingwaga di le tharo tse di latelang, re ne ra bona bana ba basimane e leng Philip le Leslie.
Ka yone nako eo, kgololesego ya rona ya go tshwarega mo tirong ya go rera e ne e fetoga. Kereke ya Orthodox ya Ethiopia e ne ya tlhotlheletsa puso gore e kobe barongwa botlhe ba Basupi ba ga Jehofa mo lefelong leo. Go ya ka kakantsho ya Mokgatlho, ke ne ka fetola bisa ya me go tswa mo tirong ya borongwa go ya kwa tirong ya boitshediso. Tiro ya rona ya borongwa e ne e thibetswe, mme re ne re tshwanetse go nna kelotlhoko le botlhale. Dipokano tsotlhe tsa phuthego di ne di tswelela pele, mme lefa go ntse jalo, re ne re kopanela ka ditlhopha tsa thuto tse di nnye.
Mapodisi a ne a phuruphutsha matlo a a farologaneng a Basupi ba ba neng ba ba belaela. Lefa go ntse jalo, ba ne ba sa itse gore, lefotenente wa lepodisi yo e neng e le moobamedi wa ga Jehofa o ne a tlhola a re tsibosa nako le nako fa go ne go tlile go dirwa letsholophuruphutso. Ka jalo, ga go na dibuka dipe tse di ileng tsa gapiwa mo dingwageng tseo. Re ne re tshwara Dithuto tsa rona tsa Tora ya Tebelo ka Bosontaga kwa bofelong jwa toropo koo go neng go na le ditafole tsa pikiniki tsa ba ba batlang go jela kwantle.
E ne e le ka yone nako eo fa ke ne ke ruta mapodisi a a neng a santse a katisiwa go baakanya diradio, fa moithuti yo ke buileng ka ene kwa tshimologong a ne a nkopa gore ke mo rute Bibela. Ke ne ka tsaya gore o ne a batla go ithuta ka pelo yotlhe, mme ka tsela e e ntseng jalo re ne ra simolola thuto. Morago ga go tshwara thuto le ene ka makgetlho a le mabedi fela, o ne a tla le moithuti yo mongwe wa bobedi, morago ga tla wa boraro. Ke ne ka ba tlhagisa gore ba se ka ba bolelela ope gore ba ne ba ithuta Bibela le nna, mme ba ne ba dira fela jalo.
Ka 1958 go ne ga tshwarwa Kopano ya Meraferafe ya Thato ya Modimo kwa Yankee Stadium le Polo Grounds kwa New York. Ka nako eo Peggy le Hank, mmogo le ba bangwe ba bantsi ba lelapa la me le legolo, e ne e le Basupi ba ba matlhagatlhaga. Abo ke ne ke itumetse jang ne go bo ke ile ka kgona go nna teng! Ke ne ke sa itumelela fela go boa ke kopana gape le bana ba me ba babedi ba bagolwane le maloko a mangwe a lelapa mme ke ne ke itumeletse gape go bona gore boidiidi jo bogolo jwa batho jo bo neng bo feta kwatara ya milione bo ne bo phuthegile ka letsatsi la bofelo la kopano!
Ngwaga o o latelang poresidente wa Mokgatlho, Nathan H. Knorr, o ne a tla go re etela kwa Ethiopia. O ne a re naya maele a a molemo a go tsweledisa tiro kafa tlase ga thibelo mme gape o ne a rata go itse gore lelapa la rona le ne le tswelela jang le bomoya jwa rona. Ke ne ka tlhalosa gore re ne re ruta bana go rapela. Ke ne ka mmotsa gore a o ne a sa rate go utlwa Judith a rapela. O ne a re ee, mme morago ga moo o ne a mo raya a re: “O dirile sentle tota, Judith.” Morago ga moo ka nako ya dijo ke ne ka kopa Mokaulengwe Knorr gore a re lebogele, mme fa a fetsa, Judith o ne a re: “O dirile sentle tota, Mokaulengwe Knorr!”
Go Godisa Bana ba Rona mo United States
Kgolagano ya me e ke neng ke e dirile le Lafapha la Sepodisi e ne ya fela ka 1959. Re ne re santse re batla go dula, mme lefa go ntse jalo puso e ne ya gana go ntumelela go dira dikgolagano tse dingwe tse disha. Ka jalo re ne re tla ya kae? Ke ne ka leka go ya kwa dinageng tse dingwe koo go neng go na le tlhokafalo e kgolo ya bakaulengwe mme lefa go ntse jalo ke ne ka palelwa. Go ne go utlwisa botlhoko ka tsela nngwe, mme re ne ra boela kwa United States. Fa re goroga, re ne ra nna le boitumelo jwa go nna lelapa le le kopaneng gape; bana ba me botlhe ba batlhano ba ne ba tlwaelana le go ratana ka bonako. Fa e sale ba ntse ba kitlane go tloga ka nako eo.
Re ne ra nna kwa Wichita, mo Kansas, koo ke neng ka bona tiro go nna moenjenere wa diradio le motshamekadipolata. Lucille o ne a tshwarelela mo tirong ya go phepafatsa magae, mme bana ba ne ba tsena sekolo gaufi le legae. Ke ne ke tshwara thuto ya Tora ya Tebelo ya lelapa Mantaga mongwe le mongwe maitseboa, ka dinako tsotlhe ke ne ke leka go e tshwara ka matlhagatlhaga le gore e kgatlhise. Letsatsi le letsatsi re ne re tlhatlhoba gore a ba ne ba sena mathata kwa sekolong.
Jaaka mongwe le mongwe wa bana a ne a simolola go tsaya karolo mo Sekolong sa Bodihedi sa Bolegodimo, mokgwa ono wa go katisiwa o ne wa ba thusa le kwa sekolong. Re ne re ba katisitse go tswa bonnyaneng go tsamaya mo tirelong ya tshimo. Ba ne ba ithutile go aba dibuka tsa Bibela mo matlong, ebile ba ne ba tsamaya le rona fa re ya go tshwara dithuto tsa Bibela tsa magae.
Gape re ne re leka go ruta bana dilo tsa motheo tsa botshelo, re ba tlhalosetsa gore ga se gore ka dinako tsotlhe ba ne tla kgona go nna le se yo mongwe wa bone a nang le sone. Ka sekai, ga se gantsi ba ne ba bona mpho e e tshwanang botlhe ka nako e le nngwe. Re ne re ba tlhalosetsa ka go re: “Fa go ka diragala gore morwarrago kana kgaitsadio a amogele setshamekisiwa, mme wena o bo o sa se bone, a go tshwanetse gore o ngongorege?” Gone mme, ka dinako dingwe, bana ba bangwe le bone ba ne ba amogela sengwe, ka jalo go ne go se na ope wa bone yo re neng re mo tlhokomologa. Ka dinako tsotlhe re ne re ba rata botlhe, re ne re sa nke re rata yo mongwe go feta ba bangwe ba babedi.
Bana ba bangwe ka dinako tse dingwe ba ne ba dumelelwa go dira dilo dingwe tse re neng re sa letlelele bana ba rona go di dira. Kgapetsakgapetsa ke ne ke tlhola ke utlwa ba re: “Semangmang o dira selo sa gore, ke ka ntlha yang le rona re sa se dire?” Ke ne ke leka go tlhalosa, mme ka dinako dingwe ke ne ke araba fela ka gore: “Ga o kwa lelapeng leo; o wa lelapa la ga Brumley. Re na le melao e e farologaneng.”
Go Direla kwa Peru
Fa e sale re ne re boela kwa Ethiopia, nna le Lucille re ne re tlhoafaletse go dira tiro ya borongwa gape. Kgabagare, e ne ya re ka 1972, re ne ra nna le tshono ya go ya go direla kwa Peru, kwa Amerika Borwa. Ruri leno e ne e le lefelo le le botoka thata leo re ileng ra le tlhophela go godisa bana ba rona ka nako ya bone ya dingwaga tsa bolesome. Botsalano joo ba ileng ba bo ipelela le barongwa, babulatsela ba ba kgethegileng, le ba bangwe ba ba neng ba tlile go direla mo Peru, bo ne jwa ba thusa gore ba iponele ka matlho kafa bao ba batlang ka pelo yotlhe dikgatlhego tsa Bogosi pele ba itumetseng thata ka gone. Philip o ne a bitsa botsalano joo gore ke kgatelelo e e siameng ya balekane.
Morago ga sebakanyana ditsala dingwe tsa rona tsa bogologolo tsa kwa Kansas di ne tsa lemoga ka moo re neng re atlega thata ka teng mo tirelong ya Bogosi, mme ba ne ba tla go dira mmogo le rona mo Peru. Ke ne ka rulaganya legae la rona go nna jaaka ntlo ya barongwa. Mongwe le mongwe o ne a abetswe se a tlileng go se dira gore botlhe ba tle ba nne le nako ya go itumelela bodihedi jwa tshimo. Re ne re nna le motlotlo wa temana ya Bibela moso mongwe le mongwe mo tafoleng. E ne e le nako ya boitumelo mo go rona rotlhe. Gape, e ne e re ke tsoga moso o mongwe le o mongwe mme ke lemoga mo ke neng ke le teng le gore ke ka ntlha yang fa ke ne ke le koo, ke ne ka tidimalo fela ke leboga Jehofa go tswa mo botennyeng jwa pelo.
Morago ga nako Judith o ne a nyalwa, mme a boela kwa United States, koo a ileng a tswelela pele mo bodiheding jwa nako e e tletseng. Morago ga dingwaga tse tharo Philip e ntse e le mmulatsela yo o kgethegileng, o ne a kopa go ya go direla kwa Bethele ya kwa Brooklyn, mo New York mme kopo ya gagwe e ne ya amogelwa. Kgabagare, Leslie le ene o ne a bolela kwa United States. Ba ne ba tsamaya ka dipelo tse di botlhoko mme ba ile ba re bolelela gangwe le gape gore re ba diretse sengwe se se molemo tota ka go ba tlisa mo Peru.
E re ka maemo a tsa itsholelo kwa Peru a ne a wetse kwa tlase, re ne re lemoga gore le rona re ne re tla tshwanelwa ke go fuduga. Ka nako ya fa re ne re boela kwa Wichita ka 1978, re ne ra fitlhela setlhopha sa Basupi ba ba neng ba bua puo ya Sepanishe. Ba ne ba re kopa gore re dule gore re tle re ba thuse, mme re ne ra itumelela go dira jalo. Go ne ga tlhongwa phuthego, mme ka bonako re ne ra e rata fela jaaka diphuthego tse dingwe tse re neng re direla kwa go tsone pele.
Ecuador O A Bitsa
Go sa kgathalesege bolwetsi jo bo neng bo dira gore ke swe mohama go sekae, ke ne ke solofetse ka pelo yotlhe gore nna le Lucille re ne re tla ya go direla gape kwa nageng e nngwe. Ka 1984 molebedi yo o etang o ne a re bolelela kafa go neng go na le koketsego ka gone kwa Ecuador le kafa bagolwane ba Bakeresete ba neng ba tlhokafala ka gone koo. Ke ne ka mo tlhalosetsa gore ke ne ke kgona go dira bonnyane fela mo bodiheding jwa tshimo ka ntlha ya gore ke ne ke golafetse, mme a ntlhomamisetsa gore le eleng mogolwane wa dingwaga tse 65, lefa a sule mohama go sekae a ka thusa thata.
Morago ga fa a sena go tsamaya, ga re ise re ko re robale bosigo joo, re bua ka gore re ka kgona jang go ya kwa Ecuador. Lucille le ene ka go tshwana o ne a eletsa thatathata go ya koo. Re ne ra bapatsa kgwebo ya rona e potlana ya go rekisa dilo tsa go bolaya ditshenekegi mme re ne ra e rekisa mo sebakeng sa dibeke di le pedi. Re ne ra rekisa ntlo ya rona mo sebakeng sa malatsi a le lesome fela. Ka jalo, mo dingwageng tsa rona tsa botsofe, re ne ra boela gape kwa boitumelong jwa rona jo bogolo, e leng tirelo ya go nna barongwa kwa dinageng tse di kwa ntle.
Re ne ra nna kwa Quito, mme tirelo ya tshimo e ne e le monate tota, letsatsi le letsatsi re ne re nna le maitemogelo mangwe kana tiragalo. Mme lefa go ntse jalo, morago ga foo, ka 1987, go ne ga fitlhelwa gore ke na le bolwetsi jwa kankere ya mala a magolo; mme go ne go tlhoka fela gore ke ariwe ka bonako. Re ne ra boela kwa Wichita gore ke ye go ariwa gone, mme go ne ga atlega. Re ne re na le dingwaga di le pedi fela re ntse re boetse kwa Quito fa go ne go fitlhelwa gore ke na le bolwetsi jwa kankere gape, mme re ne ra tshwanelwa ke go boela kwa United States go ya go nnela teng ruri. Re ne ra nna kwa North Carolina, kwa re nnang teng gone jaanong.
Botshelo jo bo Humileng, le jo bo Nang le Moputso
Ga go tlhomamisege gore mmele wa me o tla nna jang mo isagweng. Ke ne ka tshwanela ke gore ke ye go segiwa lela le legolo ka 1989. Lefa go ntse jalo, ke santse ke kgona go direla jaaka mogolwane gape ke tshwara dithuto di le mmalwa tsa Bibela le ba ba ntatelang mo legaeng la me. Mo dingwageng tse di fetileng, re thusitse ka sebele makgolokgolo a batho ka go jala, go nosetsa, kana go tlhagolela peo ya boammaaruri. Ke boitumelo jo bo se nkeng bo fela, go sa kgathalesege gore tiro eo e boelediwa makgetlho a le makae.
Mo godimo ga moo, ke ile ka itumelela thata go bona bana ba me botlhe ba direla Jehofa. Peggy o na le dingwaga di le 30 a ntse a patile monna wa gagwe, Paul Moske, mo tirong ya go potologa mo United States. Philip le mosadi wa gagwe ebong Elizabeth mmogo le Judith ba tswelela pele mo tirelong e e kgethegileng ya nako e e tletseng kwa New York. Hank le Leslie le balekane ba bone ke Basupi ba ba matlhagatlhaga, mme bomorwarre le bokgaitsadiake ka bone jwa bone le malapa a bone, go akareletsa le balosika lwa me ba le 80, botlhe ba direla Jehofa. Mme Lucille fa e sa le e le mosadi yo o tlhomang sekao wa Mokeresete sebaka sa dingwaga tse di ka nnang 50 re ntse re nyalane. Mo dingwageng tsa morago jaana o ntse a dira ditiro tse di sa jeseng monate ka go nthusa go tlhokomela mmele wa me o o setseng o koafetse mme a dira jalo kwa ntle ga go ngongorega.
Eleruri, ke nnile le boipelo tota mo botshelong. Ga ke itse gore nka tlhalosa jang boitumelo jo ke nang le jone gone jaanong. Go direla Jehofa go lere boitumelo jo bogolo mo e leng gore ke ikutlwa go tswa pelong gore ke mo obamele go ya go ile mo lefatsheng leno. Ka dinako tsotlhe ke nna ke ntse ke gopola Pesalema 59:16, e e reng: “Mme nna, ke tla ōpèla kaga thata ea gago; E, mo moshoñ ke tla dudueletsa godimo kaga boutlwèlō botlhoko yoa gago: ka go bo u nu u nntse u le kagō ea me e e godileñ ea phemèlō, le botshabèlō mo letsatsiñ ya pitlaganō ea me.”
[Setshwantsho mo go tsebe 23]
George Brumley le mmusimogolo wa Ethiopia ebong Haile Selassie
[Setshwantsho mo go tsebe 25]
George Brumley le mosadi wa gagwe, Lucille