A Sejo Seno Se Ka go Ama ka Tsela Epe?

NGWEDI o o kgolokwe o phatsimisa lefatshe ka lesedi le le lekanetseng. Mo ntlwaneng e e kwa godimo ya ntlo nngwe kwa Jerusalema wa bogologolo, go ntse banna ba le 12 go dikologa tafole. Ba le lesome le motso ba reeditse ka kelotlhoko jaaka Moruti wa bone a ba bolelela kaga moletlo o o botlhokwatlhokwa ebile a bua mafoko a a molemo thata. Pego nngwe ya re:

“Yesu [Keresete] a tsaea senkgwè, me a se segōhatsa, a se ñathoganya; me a se naea barutwa, a re, Tsaeañ, lo yè; se ke mmele oa me. Me a tsaea senwèlō, a leboga, a se ba naea, a re, Nwañ lotlhe ga shōna; Gonne se ke madi a me a kgōlaganō e ncha, a a chololèlwañ ba le bantsi go tla ba ichwarèlwa dibe. Me kea lo raea, Ga nketla ke tlhōla ke nwa louñō lo loa mofine, go tlo go tsamaee go hitlhe letsatsi ye ke tla lo nwañ lo le losha le lona ka yeōna, mo bogosiñ yoa ga Rrè. Me e rile ba sena go ōpèla sehela, ba cwa ba ea kwa Thoteñ ea Lotlhware.”—Mathaio 26:26-30.

Seno se ne sa diragala fa letsatsi le sena go phirima ka letsatsi le bo 14 la kgwedi ya Sejuda ya Nisane ka ngwaga wa 33 wa Motlha wa Rona O O Tlwaelegileng. Jesu le baaposetoloi ba gagwe ba ne ba sa tswa go keteka Tlolaganyo ba gopola go gololwa ga Baiseraele mo bokgobeng jwa Egepeto ka lekgolo la bo 16 la dingwaga B.C.E. Keresete o ne a setse a lelekile Judase Isekariota, yo o neng a tla tloga a mo oka. Ka gone, e ne e le Jesu le baaposetoloi ba gagwe ba ba ikanyegang fela ba ba 11 ba ba neng ba le teng.

Sejo seno sa maitsiboa se ne se sa tsweledise Tlolaganyo ya Sejuda. E ne e le sengwe se sesha se se neng sa bidiwa Sejo sa Morena sa Maitsiboa. Malebana le moletlo ono, Jesu o ne a laela barutwa ba gagwe jaana: “Dihañ mo, lo nkgopolè ka gōna.” (Luke 22:19, 20; 1 Bakorintha 11:24-26) Ke ka ntlha yang a ne a bolela seno? Mme tiragalo eno e e nang le makgolokgolo a dingwaga e ka go ama ka tsela efe?