Dipotso Tse di Tswang Kwa Babading
Ke tlhaloganya gore lefoko la Segerika “toʹte” (morago ga foo) le dirisiwa go itsise sengwe se se tlang. Ka jalo, ke eng fa Mathaio 24:9 e balega jaana: “Ke gone [“toʹte”] ba tlaa lo tsenyang mo dipitlaganong,” fa pego e nngwe e e tshwanang le yone e e mo go Luke 21:12 yone e re: “E tlaa re pele ga dilo tsotlhe tse, ba tlaa lo tsenya diatla, ba tlaa lo bogisa”?
Go siame gore toʹte e ka dirisiwa go itsise sengwe se se tlang, sengwe se se santseng se latela, jaaka go ka buiwa. Lefa go ntse jalo, ga re a tshwanela go akanya gore Baebele e dirisa lefoko leno ka tsela eo e le nosi fela.
A Greek-English Lexicon of the New Testament and Other Early Christian Literature, e e kwadilweng ke Bauer, Arndt le Gingrich, e supa gore lefoko toʹte le dirisiwa ka ditsela tse pedi mo Dikwalong.
E nngwe ke “ka nako eo.” Seno e ka nna “morago ga nako eo e e fetileng.” Sekao se se neetsweng ke Mathaio 2:17 e e reng: “Foo ga dirala se se kileng sa buiwa ke moperofeti Jeremia.” Seno ga se reye sengwe mo motseletseleng wa dilo mme se supa nako nngwe e e rileng bogologolo, ka nako eo. Ka tsela e e tshwanang, toʹte e ka dirisediwa go kaya “nako e e tla tlang morago ga foo.” Lekgetlho le lengwe ke le le fitlhelwang mo go 1 Bakorinthe 13:12 e e reng: “Gonne gompieno re bona mo seiponeng go le lefitshwana, mme e tlaa re mo lobakeng loo, re tlaa bona go lebanye difatlhogo; gompieno ke itse ka bontlhanngwe; mme e tlaa re mo lobakeng loo, ke tlaa itse fela jaaka le nna ke itsilwe.” (Mokwalo o o sekameng ke wa rona.) Paulo fano o dirisitse toʹte go raya gore ‘mo lobakeng loo lo lo tla tlang.’
Go ya ka bukantswe eno, toʹte e dirisiwa gape go “itsise se se tla latelang fa nako e ntse e tsamaya.” Bukantswe eno e re naya dikai tse dintsi tse di fitlhelwang mo dipegong tse tharo tsa ga Jesu tsa fa a ne a araba potso ya baaposetoloi kaga sesupo se se tla supang gore o teng.a Fa e le ka dikai tsa go dirisiwa ga toʹte go “itsise se se tla latelang fa nako e ntse e tsamaya,” bukantswe eno e ne ya umaka Mathaio 24:10, 14, 16, 30; Mareko 13:14, 21; le Luke 21:20, 27. Fa go lejwa ditemana tse di dikologileng tseno re kgona go tlhaloganya gore ke eng fa go ne go tlhaloganngwa sentle gore go tla latela sengwe fa nako e ntse e tsamaya. Mme seno se thusa thata mo go tlhaloganyeng se se bolelwang ke boporofeti jwa ga Jesu jo bo neng bo bua ka ditiragalo tsa isagwe.
Lefa go ntse jalo, ga re a tshwanela go swetsa gore gongwe le gongwe mo dipegong tseno koo toʹte e tlhagang teng e tshwanetse ya bo e itsise sengwe se se tla tlang fa nako e ntse e tsamaya. Ka sekai, mo go Mathaio 24:7, 8 re bala gore Jesu o ne a bolelela pele gore setšhaba se tla tsogologela setšhaba le gore go tla nna meswele le dithoromo tsa lefatshe. Temana ya 9 e tswelela pele jaana: “Ke gone ba tlaa lo tsenyang mo dipitlaganong, ba lo bolaya, mme lo tlaa ilwa ke merafe yotlhe, ka ntlha ya leina la me.” (Mokwalo o o sekameng ke wa rona.) A go tla bo go utlwala go tsaya gore dintwa tse di boleletsweng pele, meswele le dithoromo tsa lefatshe di tshwanetse go diragala tsotlhe, gongwe di bo di khutla pele pogiso e ka simolola?
Seo ga se utlwale, e bile ga se supiwe ke sepe se re se itseng se se diragetseng mo tiragatsong ya lekgolo la ntlha la dingwaga. Pego e e mo bukeng ya Ditiro e senola gore maloko a phuthego e ntšha ya Bokeresete a ne a ganediwa thata ka bonako fela fa a sena go simolola go rera. (Ditiro 4:5-21; 5:17-40) Tota ga re ka ke ra re dintwa, ditlala le dithoromo tsotlhe tsa lefatshe tse Jesu a buileng ka tsone di diragetse pele ga pogiso eo ya ntlha. Go farologana le seo, kganetso eo e ne ya tla “pele” ga bontsi jwa dilo tse dingwe tse di boleletsweng pele, seo se dumalanang le tsela e Luke a neng a bolela dikgang tseno ka yone: “E tlaa re pele ga dilo tsotlhe tse, ba tlaa lo tsenya diatla, ba tlaa lo bogisa.” (Luke 21:12, mokwalo o o sekameng ke wa rona.) Seo se ne se tla akantsha gore mo go Mathaio 24:9, toʹte e dirisiwa ka kgopolo ya gore “ka nako eo.” Balatedi ba ga Jesu ba ne ba tla bogisiwa mo lobakeng lwa fa go tla bo go na le dintwa, ditlala le dithoromo tsa lefatshe, kana ka nako eo.
[Ntlha e e kwa tlase]
a Dipego tseno tse di tshwanang tse di mo go Mathaio, Mareko le Luke di ne tsa tlhalosiwa di le mo dikholomong mo tsebeng ya 14 le 15 ya Tora ya Tebelo ya February 15, 1994. Koo toʹte e neng e dirisitswe teng jaaka “morago ga foo,” go ne go kwadilwe ka ditlhaka tse dikima.