Go Rutwa go Dira Thato ya ga Jehofa
“O nthute go dira go rata ga gago; gonne o Modimo wa me.”—PESALEMA 143:10.
1, 2. (a) Re tshwanetse go rutwa leng, mme e le ka kgopolo efe ya mmatota? (b) Ke ka ntlha yang fa go rutwa ke Jehofa go le botlhokwa jaana?
LETSATSI lengwe le lengwe le motho a tshelang mo go lone e bile a le matlhagatlhaga, o ka rutiwa sengwe se se mosola. Seo se boammaaruri ka wena, le ka ba bangwe. Mme go diragala eng fa motho a swa? Baebele e bolela jaana ka phepafalo gore baswi “ga ba itse sepe.” Ga go na kitso mo teng ga sheol, e leng lebitla le le tlwaelegileng la batho. (Moreri 9:5, 10) A seno se raya gore kitso e re e rutilweng, e re nnileng le yone, ke ya lefela? Seo se ikaegile ka gore re rutilwe eng le kafa re dirisang kitso eo ka teng.
2 Fa re rutiwa se e leng sa lefatshe fela, re ka se nne le isagwe e e tla nnelang ruri. Lefa go le jalo, se se itumedisang ke gore dimilione tsa batho tse di mo ditšhabeng tsotlhe di rutwa thato ya Modimo ka boikaelelo jwa gore di bone botshelo jo bo sa khutleng. Botlhokwa jwa tsholofelo eno bo ikaegile ka go rutwa ke Jehofa, e leng ene Motswedi wa kitso e e nayang botshelo.—Pesalema 94:9-12.
3. (a) Ke ka ntlha yang fa go ka bolelwa gore Jesu e ne e le moithuti wa ntlha wa Modimo? (b) Ke eng se re se tlhomamisediwang ka gore batho ba ne ba tla rutwa ke Jehofa, mme go tla felela ka eng?
3 Morwa Modimo wa leitibolo, jaaka moithuti wa gagwe wa ntlha, o ne a rutwa go dira thato ya ga Rraagwe. (Diane 8:22-30; Johane 8:28) Fa go ntse go ya, Jesu o ne a supa gore dimeriate tsa batho di ne di tla rutwa ke Rraagwe. Ke eng se rona ba re rutiwang ke Modimo re se lebeletseng? Jesu o ne a bolela jaana: “Go kwadilwe mo baperofeting ga twe: ‘Ba tlaa rutwa ke Modimo botlhe fela.’ Mongwe le mongwe yo o utlwileng mo go Rara, mme a ithutile, o tla mo go nna. . . . Ammaaruri, ammaaruri, ke a lo raya: Yo o dumelang mo go nna o na le botshelo jo bo sa khutleng.”—Johane 6:45-47.
4. Dimilione tsa batho di amiwa jang ke thuto ya bomodimo, mme ke eng se ba se lebeletseng kwa pele?
4 Jesu o ne a nopola mo go Isaia 54:13, e e neng e bolela ka mosadi wa Modimo wa tshwantshetso, e leng Sione wa selegodimo. Boporofeti joo bo ne bo lebisitse thata mo go bomorwawe, e leng barutwa ba ga Jesu Keresete ba ba tloditsweng ka moya ba ba 144 000. Masalela a barwa bao ba semoya a santse a tshwere ka natla gompieno, a eteletse pele thulaganyo ya go ruta ya lefatshe lotlhe. Ka ntlha ya seo, dimilione tse dingwe tsa “boidiidi jo bogolo” le tsone di solegelwa molemo ke go rutwa ke Jehofa. Ba lebeletse ka tsela e e kgethegileng go ithuta mme ba sa swe. Jang? Ebu, ba tlile go falola “sepitla se segolo” se se ntseng se atamela ka bonako le go itumelela botshelo jo bo sa khutleng mo lefatsheng la paradaise.—Tshenolo 7:9, 10, 13-17.
Go Otlelelwa Thata go Dira Thato ya Modimo
5. (a) Temana ya ngwaga ya 1997 ya reng? (b) Re tshwanetse go ikutlwa jang ka go nna gone kwa dipokanong tsa Bokeresete?
5 Ka 1997, mo diphuthegong tse di fetang 80-000 mo lefatsheng lotlhe, Basupi ba ga Jehofa ba nna ba gakologetswe mafoko ano a Pesalema 143:10: “O nthute go dira go rata ga gago.” E tla nna mafoko a temana ya ngwaga ya 1997. Mafoko ao, a kwantle ga pelaelo a tla bewang mo Diholong Tsa Bogosi, a tla re gakolola gore lefelo le le tlhomologileng la go amogela thuto ya bomodimo ke kwa dipokanong tsa phuthego, koo re ka nnang le seabe mo thulaganyong ya go ruta e e ntseng e tsweletse pele. Fa re kopana le bakaulengwe kwa dipokanong gore re rutwe ke Motlhatlheledi wa rona yo Mogolo, re tla ikutlwa fela jaaka mopesalema, yo o neng a kwala jaana: “E rile ba nthaya ba re: ‘A re yeng kwa ntlong ya ga Jehofa,’ ka itumela.”—Pesalema 122:1; Isaia 30:20.
6. Ke eng se re se dumelang mo mafokong a ga Dafite?
6 Ee, re rata go rutwa go dira thato ya Modimo mo boemong jwa go dira thato ya mmaba wa rona Diabolo kana thato ya batho ba ba sa itekanelang. Ka jalo, fela jaaka Dafite, re amogela Modimo yo re mo obamelang le go mo direla: “Gonne o Modimo wa me; mowa wa gago o molemo; o nkgoge mo lefatsheng la thokgamo.” (Pesalema 143:10) Mo boemong jwa gore Dafite a batle go ikopanya le banna ba ba neng ba sa bue boammaaruri, o ne a batla go nna kwa go dirwang kobamelo ya ga Jehofa gone. (Pesalema 26:4-6) E re ka Dafite a ne a kaelwa ke moya wa Modimo mo dikgatong tsa gagwe, o ne a kgona go tsamaya mo ditseleng tsa tshiamo.—Pesalema 17:5; 23:3.
7. Moya wa Modimo o ne wa dira jang mo phuthegong ya Bokeresete?
7 Dafite yo Mogolwane, e bong Jesu Keresete, o ne a tlhomamisetsa baaposetoloi gore moya o o boitshepo o ne o tla ba ruta dilo tsotlhe le go ba gakolola dilo tsotlhe tse a neng a di ba bolelela. (Johane 14:26) Go tloga ka Pentekosete go ya pele, Jehofa o ntse a senola “dilo tse di boteng tsa Modimo” ka kgato ka kgato tse di leng mo Lefokong la gagwe le le kwadilweng. (1 Bakorinthe 2:10-13) Seno o se dirile ka mosele o o bonalang oo Jesu a neng a o bitsa “motlhanka yo o boikanngo le yo o botlhale.” O rulaganya dijo tsa semoya tse di ithutiwang mo thulaganyong ya go ruta ya diphuthego tsa batho ba Modimo mo lefatsheng lotlhe.—Mathaio 24:45-47.
Go Rutwa Thato ya ga Jehofa Kwa Dipokanong Tsa Rona
8. Ke ka ntlha yang fa go nna le seabe mo Thutong ya Tora ya Tebelo go le botlhokwa thata jaana?
8 Kgang e e mo Thutong ya phuthego ya beke le beke ya Tora ya Tebelo gantsi e bua ka go dirisa melaometheo ya Baebele. Tota seno se re thusa gore re itshokele ditlhobaelo tsa botshelo. Kwa dithutong tse dingwe go ithutiwa boammaaruri jwa semoya jo bo tshwanetseng kana boporofeti jwa Baebele. A bo re rutwa mo gontsi jang ne kwa dithutong tseo! Kwa dinageng di le dintsi Diholo Tsa Bogosi di tlala tota ka nako ya dipokano tseno. Lefa go ntse jalo mo dinageng di le mmalwa, palo ya batho ba ba nnang gone kwa dipokanong e fokotsegile. O akanya gore e dirwa ke eng? A ga se gore ba bangwe ba letla tiro ya go itshedisa e kgoreletsa go kopana ga bone mmogo ka metlha gore ba ‘tlhotlheletsane mo loratong le mo ditirong tse di molemo’? Kana a ga se gore diura di le dintsi tse ba di dirisang mo ditirong tsa botsalano kana go lebelela thelebishene, di dira gore thulaganyo e nne e e gagametseng thata gore ba se ka ba ya kwa dipokanong tsotlhe? Gakologelwa tlhagiso e e tlhotlheleditsweng e e mo go Bahebere 10:23-25. A go phuthega mmogo go ithuta thuto ya bomodimo ga go botlhokwa thata gone jaanong jaaka re “bona motlha o atamela”?
9. (a) Pokano ya Tirelo e ka re thusa jang mo bodireding? (b) Re tshwanetse go nna le boikutlo jo bo ntseng jang fa re neela bosupi?
9 Boikarabelo jo bongwe jwa rona jo bogolo ke jwa go direla re le badiredi ba Modimo. Pokano ya Tirelo e diretswe go re thusa kafa re ka fitlhelelang seno ka katlego ka teng. Re ithuta tsela e re buisanang le batho ka yone, se re ka buang ka sone, tsela e re itshwarang ka yone fa motho a kgatlhega, tota le se re ka se dirang fa batho ba gana molaetsa wa rona. (Luke 10:1-11) Jaaka mekgwa e e nang le matswela e tlotliwa le go bontshiwa kwa pokanong eno beke le beke, re nna re ipaakantse sentle gore re kopane le batho e seng fela fa re tsamaya ka ntlo le ntlo mme gape le fa re rera mo mebileng, mo mafelong a go emisiwang dikoloi mo go one, kwa go nang le dipalangwa tsa batho botlhe gone, kwa mabaleng a difofane, kwa go nang le dikgwebo gone, kana kwa dikolong. Go dumalana le kopo ya rona ya gore, “O nthute go dira go rata ga gago,” re tla rata go sola sebaka sengwe le sengwe molemo gore re dire jaaka Mong wa rona a ne a rotloetsa: “A lesedi la lona le phatsime fa pele ga batho gore ba . . . galaletse Rraeno yo o kwa legodimong.”—Mathaio 5:16.
10. Tota re ka thusa jang ‘batho ba ba tshwanetseng’?
10 Kwa dipokanong tse di ntseng jalo tsa phuthego, gape re rutwa ka go dira ba bangwe barutwa. Fa re bone motho yo o kgatlhegang kana re tsamaisitse buka, boikaelelo jwa rona fa re dira maeto a go boela ke go simolola dithuto tsa magae tsa Baebele. Ka tsela nngwe, seno se tshwana le fa barutwa ba ne ba ‘nna le batho ba ba tshwanetseng’ e le gore ba ba rute dilo tse Jesu a di ba laoletseng. (Mathaio 10:11; 28:19, 20) Fa re na le dithuso tse di molemolemo, tse di jaaka buka ya Kitso E E Isang Botshelong Jo bo Sa Khutleng, tota re a bo re itlhometse sentle gore re swetse bodiredi jwa rona ka botlalo. (2 Timotheo 4:5) Beke nngwe le nngwe fa o ntse o ya kwa Pokanong ya Tirelo le kwa Sekolong sa Bodiredi sa Puso ya Modimo, leka go tlhaloganya mme morago ga moo o dirise dintlha tse di mosola tse di tla go thusang jaaka mongwe wa badiredi ba ba tshwanelang sentle ba Modimo, ba ba dirang thato ya gagwe.—2 Bakorinthe 3:3, 5; 4:1, 2.
11. Batho bangwe ba ile ba bontsha tumelo jang mo mafokong a a fitlhelwang mo go Mathaio 6:33?
11 Ke thato ya Modimo gore re “[batle] pele bogosi jwa gagwe le tshiamo ya gagwe.” (Mathaio 6:33) Ipotse gore, ‘Ke ne ke tla dirisa molaomotheo ono jang fa e le gore dilo tse di tlhokegang kwa tirong ya me ya boitshediso [kana ya molekane wa me] di thulana le go nna teng ga me kwa dipokanong?’ Batho ba le bantsi ba ba godileng mo semoyeng ba ne ba tla tsaya dikgato gore ba bue le bahiri ba bone ka kgang eno. Modiredi mongwe wa ka metlha o ne a itsise mohiri wa gagwe gore o tlhoka nako e e rileng a sa bereke beke nngwe le nngwe gore a nne gone kwa dipokanong tsa phuthego. Kopo ya gagwe e ne ya amogelwa. Mme ka go batla go itse se se diragalang kwa dipokanong, o ne a kopa go nna gone. O ne a utlwa go dirwa kitsiso gone e e malebana le kopano ya kgaolo e e neng e tla. Ka ntlha ya seo, mohiri yono o ne a rulaganya gore a nne letsatsi lotlhe kwa kopanong eno e kgolo. Ke eng se o se ithutang mo sekaing seno?
Go Rutwa Thato ya ga Jehofa ke Batsadi ba Bomodimo
12. Gore bana ba rutwe thato ya ga Jehofa, ke eng se batsadi ba Bakeresete ba tshwanetseng go se dira ka bopelotelele le ka tlhomamo?
12 Mme dipokano tsa phuthego le dikopano tse dikgolo ga se yone fela thulaganyo ya gore re rutwe thato ya Modimo. Batsadi ba ba ratang Modimo ba laelwa gore ba thapise bana ba bone, ba ba kgalemele le go ba godisa gore ba galaletse Jehofa le go dira thato ya gagwe. (Pesalema 148:12, 13; Diane 22:6, 15) Go dira jalo go tlhoka gore re tsamaye le “banyana” ba rona kwa dipokanong koo ba ka ‘utlwang le go ithuta’ gone, mme go tweng ka go ba ruta dikwalo tse di boitshepo kwa gae? (Duteronome 31:12; 2 Timotheo 3:15) Malapa a le mantsi a ile a simolola dithulaganyo tse di tlhomameng tsa thuto ya Baebele ya lelapa ya ka metlha, mme go ise go ye kae di bo di sa tshwarwe ka metlha kana di sa tshwarwe gotlhelele. A seo se kile sa lo diragalela? A lo tla swetsa ka gore kakantsho ya gore go nne le thuto e e ntseng jalo ka metlha ga e a tshwanela kana gore lelapa la gaeno le farologane mo go ka se kang ga kgonega ka lona gore lo e tshware? Go sa kgathalesege gore boemo ke bofe, lona batsadi tsweetswee boeletsang ditlhogo tseno tse di molemo tsa “Boswa Jwa Rona jo Bogolo Jwa Semoya” le “Maduo A go Sa Ipone Tsapa” mo makasineng wa Tora ya Tebelo wa August 1, 1995.
13. Malapa a ka solegelwa molemo jang ke go tshwara temana ya letsatsi?
13 Malapa a kgothadiwa gore a tlwaele go tshwara temana ya letsatsi ka bukana ya Go Tlhatlhoba Dikwalo ka Malatsi Otlhe. Go bala temana fela le dikakgelo go molemo, mme go tlotla ka temana eo le go e dirisa go mosola thata. Ka sekai, fa lo sekaseka Baefeso 5:15-17, ba lelapa ba ka nna ba akantsha kafa ba ka ‘solang lobaka molemo’ ka teng ka go nna le thuto ya bone ka namana, go nna le seabe mo mofuteng o mongwe wa bodiredi jwa nako e e tletseng, le go tlhokomela dikabelo tse dingwe tse di direlwang puso ya Modimo. Ee, fa lelapa le buisana ka temana ya letsatsi go ka dira gore mongwe kana ba le bantsi ba “tlhaloganye [ka botlalo] go rata ga Morena, gore ke eng.”
14. Duteronome 6:6, 7 e supa gore batsadi ba tshwanetse go nna barutisi ba mofuta ofe, e bile e batla gore ba dire eng?
14 Batsadi ba tshwanetse go nna barutisi ba ba tlhagafetseng ba bana ba bone. (Duteronome 6:6, 7) Mme ga se kgang fela ya go kgalemela kana go laela bana ba bone. Gape rre le mmè ba tshwanetse go reetsa, ka tsela eo ba tla kgona go itse gore ke eng se se tlhokang go tlhalosiwa, go phepafadiwa, go tshwantshiwa, kana go boelediwa. Mo lelapeng lengwe la Bakeresete, batsadi ba dira gore go nne le puisano e e phuthologileng ka go kgothaletsa bana ba bone gore ba botse dipotso malebana le dilo tse ba sa di tlhaloganyeng kana tse ba tshwenyegileng ka tsone. Ka jalo ba ne ba itse gore morwaabone yo o mo dingwageng tsa bolesome o ne a sa kgone go tlhaloganya gore Jehofa ga a na tshimologo jang. Batsadi ba ne ba kgona go dirisa tshedimosetso e e mo dikgatisong tsa Mokgatlho wa Watch Tower ka go bontsha gore nako le lefaufau di amogelwa jaaka dilo tse di se nang bokhutlo. Seo se ne sa thusa go tlhalosa ntlha eo, mme se ne sa kgotsofatsa morwaabone. Ka jalo iphe nako ya go araba dipotso tsa bana ba gago ka phepafalo e bile o dirisa Dikwalo, o ba thusa go bona gore go ithuta go dira thato ya Modimo go ka kgotsofatsa tota. Ke eng se sengwe gape se batho ba Modimo—bannye le bagolo—ba se rutwang gompieno?
Go Rutwa go Rata le go Lwa
15. Lorato lwa rona lwa bokaulengwe lo ka nna lwa lekwa leng?
15 Go dumalana le taelo e ntšha ya ga Jesu, re “rutilwe ke Modimo go ratana.” (1 Bathesalonika 4:9) Fa dilo di ritibetse e bile di tsamaya sentle, re ka nna ra akanya gore re rata bakaulengwe ba rona botlhe. Lefa go ntse jalo go diragala eng fa go tsoga dikgotlhang kana re kgopisega ka ntlha ya se Mokeresete yo mongwe a se buileng kana a se dirileng? Mo ntlheng eno re ka nna ra lekwa go bontsha gore lorato lwa rona ke la boammaaruri. (Bapisa 2 Bakorinthe 8:8.) Ke eng se Baebele e re rutang gore re se dire fa re le mo maemong a a ntseng jalo? Selo se sengwe ke go leka go gagamalela go bontsha lorato ka tsela e e feletseng. (1 Petere 4:8) Mo boemong jwa go batla dikgatlhego tsa rona, go kgopisiwa ke ditlhaelo tse di sa reng sepe, kana go akanya bosula, re tshwanetse ra letla lorato gore lo bipe bontsi jwa dibe. (1 Bakorinthe 13:5) Re itse gore seno ke thato ya Modimo, ka gonne ke se Lefoko la gagwe le se rutang.
16. (a) Bakeresete ba rutwa go lwa mofuta ofe wa ntwa? (b) Re itlhomela jang?
16 Lefa batho ba le bantsi ba ka se ka ba amanya lorato le ntwa, ntwa ke sengwe gape se re se rutwang, mme ke mofuta o o farologaneng wa ntwa. Dafite o ne a lemoga gore o ne a ikaegile ka Jehofa gore a mo rute kafa a ka lwang ka gone, le mororo mo motlheng wa gagwe seo se ne se akaretsa go lwantsha baba ba Iseraele ka tsela ya mmatota. (1 Samuele 17:45-51; 19:8; 1 Dikgosi 5:3; Pesalema 144:1) Go tweng ka ntwa ya rona gompieno? Dibolao tsa rona ga se tsa nama. (2 Bakorinthe 10:4) Ntwa ya rona ke ya semoya, e e re tlhokang gore re apare diaparo tsa phemelo tsa semoya. (Baefeso 6:10-13) Jehofa o re ruta gore re lwe ntwa ya semoya ka katlego, ka Lefoko la gagwe le ka batho ba gagwe ba ba kopaneng mmogo.
17. (a) Ke maretshwa afe a Diabolo a a dirisang gore a re fapose? (b) Ke eng se re tshwanetseng go se tila ka botlhale?
17 Ka ditsela tse di tsietsang le tse di boferefere, gantsi Diabolo o dirisa dilo tsa lefatshe, batenegi le baganetsi ba bangwe ba boammaaruri ka go leka go re faposetsa mo dikgannyeng tse di seng botlhokwa. (1 Timotheo 6:3-5, 11; Tito 3:9-11) Go ntse jaaka e kete o bona gore ene o na le sebakanyana sa go re fenya ka go re tlhasela ka tlhamalalo, re lebane, ka jalo o leka go re diga ka go re dira gore re ngongoregele sengwe le go se belaela ka tsela e e boeleele, e le dilo tse di re senyetsang bomoya jwa rona. Jaaka batlhabani ba ba tlhagafetseng, re tshwanetse ra ntsha matlho dinameng gore re bone dikotsi jaaka fa re lebane le ditlhaselo.—1 Timotheo 1:3, 4.
18. Ke eng se se akarediwang ke go bo re sa tlhole re itshelela?
18 Ga re rotloetse dikeletso tsa batho kana thato ya ditšhaba. Jehofa o re rutile ka sekao sa ga Jesu gore ga re a tshwanela go itshelela; go na le moo, re tshwanetse go nna le mogopolo o Keresete Jesu a neng a na le one mme re tshelele go dira thato ya Modimo. (2 Bakorinthe 5:14, 15) Mo nakong e e fetileng, re ka tswa re ne re tshela botshelo jo bo feteletsang dilo le jo bo repileng, bo senya nako e e tlhokegang thata. Ditlhapelo, ditago le boitsholo jo bo sa siamang di tlhaola lefatshe leno le le boikepo. E re ka jaanong re rutwa go dira thato ya Modimo, a ga re itumelele go bo re kgaogane le lefatshe leno le le bosula? Ka jalo a re lweng ntwa e kgolo ya semoya gore re tile go nna le seabe le mekgwa e e leswafatsang ya lefatshe.—1 Petere 4:1-3.
Go Ithuta Gore re Solegelwe Molemo
19. Go rutwa go dira thato ya ga Jehofa mme morago ga moo re bo re e dira go tla re solegela molemo ka eng?
19 Go a tlhokega go lemoga gore go rutwa go dira thato ya ga Jehofa go tla solegela rona molemo thata. Go a utlwala gore re tshwanetse go dira seabe sa rona ka kelotlhoko e kgolo e le gore re ithute ditaelo mme go tswa foo re bo re sala morago ditaelo tseo tse di tlang kwa go rona ka Morwawe mmogo le ka Lefoko la gagwe le ka batho ba ba kopaneng mmogo. (Isaia 48:17, 18; Bahebere 2:1) Fa re dira jalo, re tla nonotshiwa gore re eme re nitame mo metlheng eno ya matlhotlhapelo le go itshokela ditsuatsue kwa pele. (Mathaio 7:24-27) Le gone jaanong, re tla bo re itumedisa Modimo ka go dira thato ya gagwe mme o tla tlhomamisa gore dithapelo tsa rona di a arabiwa. (Johane 9:31; 1 Johane 3:22) Mme re tla itumela ka tsela ya mmatota.—Johane 13:17.
20. Go tla nna molemo gore o tlhatlhanye ka eng fa o ntse o bona temana ya ngwaga mo ngwageng otlhe wa 1997?
20 Mo ngwageng otlhe wa 1997, re tla nna le sebaka sa go bala le go sekaseka temana ya ngwaga kgapetsakgapetsa, e leng Pesalema 143:10: “O nthute go dira go rata ga gago.” Fa re ntse re dira seno, a re diriseng dinako tse dingwe gore re tlhatlhanye ka dilo tse Modimo a re di baakanyeditseng gore re di rutwe, jaaka di tlhalositswe fa godimo. Mme a re diriseng go tlhatlhanya ka mafoko moo e le selo se se tla re tlhotlheletsang go dira ka metlha go dumalana le thapelo eo, re itse gore “yo o dirang go rata ga Modimo o ntse ka bosakhutleng.”—1 Johane 2:17.
O ne O Tla Araba Jang?
◻ Ke bomang gompieno ba ba rutwang go dira thato ya ga Jehofa?
◻ Pesalema 143:10 e tshwanetse go re ama jang ka 1997?
◻ Re rutwa jang go dira thato ya ga Jehofa?
◻ Ke eng se se tlhokegang gore batsadi ba Bakeresete ba rute bana ba bone?