“Dihañ mo, lo Nkgopolè ka Gōna”
1 Jesu o ne a laela balatedi ba gagwe gore ba keteke moletlo wa loso lwa gagwe. (Luke 22:19) Go ketekwa gono ga moletlo e ne e tla nna selo seo se gakololang ka setlhabelo se segolo seo Jesu a se ntsheditseng setho. Mo ngwageng eno Basupi ba ga Jehofa mo lefatsheng ka bophara ba tla keteka Segopotso sa loso lwa ga Keresete ka Labotlhano, April 17, morago ga fa letsatsi le sena go phirima.
2 Go Ipaakanya ka Namana: Re ka ipaakanyetsa jang go keteka moletlo wa tiragalo e e botlhokwa eno ka tsela e e tshwanetseng? Tsela e nngwe ke ka go akanya ka thapelo ka botshelo jwa ga Jesu jwa mo lefatsheng le bodihedi jwa gagwe. O ne a nna Mogolodi wa setho ka go ntsha botshelo jwa gagwe jo bo itekanetseng jwa motho setlhabelo. (Math. 20:28) Go thusa mongwe le mongwe gore a anaanele setlhabelo seno seo re se ntsheditsweng, re lo kgothaletsa gore lo sekaseke dikgaolo 112 go fitlha go 116 tsa buka e e nang le setlhogo se se reng Monna Yo Mogolo Go Gaisa Botlhe Ba Ba Kileng Ba Tshela.
3 Mmalo wa rona wa Bibela pele ga Segopotso mo ngwageng eno, jaaka fa go kwadilwe mo go 1992 Calendar of Jehovah’s Witnesses, o na le ditemana tse di tlhophilweng go tswa mo bukeng ya Bibela ya Mareko. Mmalo o o kgethegileng ono wa Bibela o rulagantswe gore o balwe mo lobakeng lwa malatsi a le marataro go simolola ka Sontaga go fitlha ka Labotlhano ebong April 12-17. Rotlhe fela re tla batla go dirisa nako e ntsi ka mo go lekaneng gore re tlhatlhanye ka dilo tseno tse di utlwisang botlhoko tseo di ileng tsa diragala.
4 Dilo Tseo Bagolwane ba Tshwanetseng go Di Baakanyetsa ka Botlalo: Tlhomamisang gore dipampitshana tsa taletso tsa Segopotso di gone. A go na le manno ao a tla lekanang botlhe bao go solofelwang gore ba tla nna gone? Go tlhokega gore go dirwe dilo ka thulaganyo koo go nang le diphuthego di le mmalwa gone tseo di tlileng go dirisa holo e le nngwe fela, e le gore phuthego nngwe le nngwe e tle e nne le nako e e lekaneng ya go keteka Segopotso. Bao ba direlang jaaka batlhokomedi ba tshwanetse ba bolelelwa ditiro tseo ba tlileng go di dira. Ba tla batla gore e nne bone ba ntlha mo go amogeleng batho ba basha bao ba tlileng Segopotsong. Go tshwanetse ga tlhophiwa sebui se se tshwanelegang fela thata seo se tla neelang tshedimosetso ka tsela e e utlwalang sentle ebile se dirisa Dikwalo. Abelang bagolwane bao ba nang le maikarabelo kana batlhanka ba bodihedi gore ba tsamaise ditshwantshetso. Go tshwanetse ga baakanngwa senkgwe se se sa bedisiwang le beine e khibidu e e sa tswakanngwang le sepe. Go bona dikgakololo tse di oketsegileng, bona tokololo ya Tora ya Tebelo ya February 15, 1985, tsebe 19.
5 Re tla bontsha gore re anaanela ka botlalo botlhokwa jwa tiragalo e e kgethegileng eno le gore re eletsa go keteka Segopotso sa loso lwa ga Keresete tumalanong le taelo ya ga Jesu ka go baakanyetsa ka botlalo go sa le gale.—1 Bakor. 11:23-26.