Basha—Gatang Dikgato Tsa Lona ka Botlhale
1 Rraarona ebong Jehofa, o a itumela fa batho ba basha ba tswelela pele semoyeng. Fa ba reetsa ditaelo tsa gagwe tse di lorato ka botlhale, basha ga ba itumedise pelo ya gagwe fela mme gape ba bonela meyasebele ya bone tapologo. (Dia. 27:11; Math. 11:28-30) Ba letla Jehofa gore e nne ene a kaelang dikgato tsa bone ka botlhale.—Dia. 16:9.
2 Keresete Jesu o ne a baya sekao mo bosheng jwa gagwe jaaka mongwe yo o neng a amogelwa ke Modimo mmogo le batho. (Luke 2:52) Basha gompieno ba tshwanetse go gagamalela go dira se se tshwanang. Go gata dikgato tsa gagwe ka botlhale ga motho yo mosha go tshwanetse ga iponatsa ka go latela ga gagwe dilo tsa semoya. Fa a le dingwaga di le 12, Jesu o ne a itsiwe ka go rata go buisana le ba bangwe ka ga Jehofa. (Luke 2:46, 47) Le mo motlheng ono basha ba ile ba bontsha keletso e e tshwanang ya go tlhalosetsa ba bangwe tumelo ya bone.—wTN90 7/1 ts. 29-30; wTN87 12/1 ts. 21.
3 Ke eng se lona basha lo ka se dirang gone jaanong go “tlotla Yehofa ka thoto ea [lona]” mme segolobogolo mo dikgweding tse di tlang, go akaretsa le malatsi a lona a fa dikolo di tswetswe? (Dia. 3:9) Ke ka ntlha yang o sa oketse nako e o tlwaetseng go e dira mo tirong ya go rera le ya go ruta dikgang tse di molemo, gongwe le gone go nna mmulatsela yo o thusang tota? O ka nna wa gakgamadiwa ke go bona boitumelo jo bogolo le melemo e mengwe e e tlisiwang ke go nna le seabe se segolwane mo bodiheding. Gape seno se tla go neela sebaka sa go bereka le baboledi ba le bantsi ba ba farologaneng mo tirelong ya tshimo. O ka nna wa simolola gone jaanong ka go kopa mmoledi kana ba le babedi ba ba nang le maitemogelo gore ba tle ba bereke le wena mo mafelobekeng ano.
4 Batsadi ba ka kgothatsa bana ba bone thata le go ba thusa ka go dirisa dinako tsa go ipaakanyetsa tshimo mo godimo ga tsa go tsamaya le bone mo bodiheding. Batho ba bangwe ba ba godileng mo phuthegong e ka nna bone ba ba simololang go kopa basha bano gore ba tsamaye le bone mo bodiheding jwa ntlo le ntlo le mo maetong a go boela le mo tirong ya dithuto tsa Bibela. Go tsalana le baboledi ba ba ntseng jalo ba ba nonofileng go tla aga basha bano le go ba thusa go ‘gagamalela kwa boitekanelong.’—Baheb. 6:1.
5 Go tlhokega gore Mokeresete mongwe le mongwe a tokafatse tsela ya gagwe ya go ruta. Le basha tota. A lona basha lo baakanyetsa dikabelo ka botlalo tse lo ka tswang lo na le tshiamelo ya go di neela mo Sekolong sa Bodihedi sa Puso ya Bomodimo? A lo na le thulaganyo ya ka metlha ya go bala le go ithuta ka namana mmogo le go tlhatlhanya ka gone? A lo dirisa se lo se ithutang kwantle ga go senya nako? A lo baakanyetsa dipokano sentle e le gore lo tle lo tlhaloganye kgang eo ka botlalo mme ebile lo ipaakanyeditse go akgela? A lo kwala dintlha tsa botlhokwa tse di tlhalosiwang kwa dipokanong lo bo lo leka go dirisa dikakantsho tse di leng go Tirelo ya Rona ya Bogosi?
6 Lo se ka lwa fetiwa ke ditshiamelo tsa go nna le seabe mo go phepafatseng Holo ya Bogosi le go thusa bakaulengwe le bokgaitsadi ba ba godileng le ba ba lwalang ka ditiro tsa legae kana ka ditsela tse dingwe tse di mosola. Lo se ka lwa tlhokomologa go ntsha meneelo ka metlha e e thusang go duelela ditshenyegelo tsa Diholo tsa Bogosi le tiro ya Mokgatlho ya lefatshe ka bophara.
7 Fa re nna re ‘itlhokometse go ya ka lefoko la ga Jehofa’ le go mo letla gore a kaele dikgato tsa rona, o tla re dira gore re itumele le go re neela ditshiamelo tse di oketsegileng tsa tirelo.—Pes. 119:9.