Thulaganyo e Ntšha ya Kopano ya Potologo
1 Go simologa ka September, setlhogo se sesha sa dikopano tsa potologo e tla nna “Go Reetsa le go Ithuta go Dira se Lefoko la Modimo le se Bolelang.” Setlhogo seno se se thailweng mo go Duteronome 31:12, 13, se re neela motheo o o tshwanelang o o bontshang gore thulaganyo yotlhe e gatelela dithuto tse re tshwanetseng go di ithuta le go di dirisa.
2 Le mororo batho ba le bantsi ba reetsa dipolelo tse di timetsang, go botlhokwa gore mongwe le mongwe wa rona a reetse Lefoko la Modimo le go ithuta go dira se le se bolelang. (Luke 11:28; 1 Tim. 4:1) Re ntse re akantse ka seno, thulaganyo ya kopano ya potologo e baakanyeditswe gore e kgothatse le go thusa baboledi, malapa, bagolwane le babulatsela. Ka Matlhatso go tla bo go na le simphosiamo sa dikarolo tse nnè se se nang le setlhogo se se reng “Go Itshokela Mathata a Rona—Ka go Reetsa Lefoko la Modimo.” Mme ka Sontaga mo mosong go tla bo go na le simphosiamo se se nang le setlhogo se se reng “Ka Moo Dikwalo di Gakololang ka Tshiamo ka Gone.” Thulaganyo eno yotlhe e tla bo e neela kgothatso ya semoya e e sa tshwanelang go tlhaela wena le ba lelapa la gago.
3 Ka Matlhatso le ka Sontaga go tla bo go neelwa dikakantsho tse di molemo tse di ka dirisiwang mo bodireding jwa tshimo mme go tla dirwa le dipontsho ka gone. Mme gape go tla bo go na le maitemogelo le dipotsolotso tse di kgothatsang le tse di rutang. Ka jalo, fa o nna teng e bile o reetsa ka boikaelelo jwa gore o dirise dilo tse o di ithutileng, o tla kgona go dira se Lefoko la Modimo le se laelang ka botlalo ka tsela e e botoka.
4 Nngwe ya dilo tse di botlhokwa thata kwa kopanong ya potologo e tla bo e le go kolobediwa ga bakaulengwe le bokgaitsadi ba ba sa tswang go ineela. Pele ga bayakolobetsong ba supa boineelo jwa bone phatlalatsa jaana, ba tshwanetse gore ba bolelele molebedi yo o okamelang gore ba batla go kolobediwa gore a rulaganye le bagolwane ba babedi gore ba kopane le bone.
5 Puo ya phatlalatsa ya metseletsele eno ya dikopano tsa potologo e tla bo e na le setlhogo se se reng “Ke ka Ntlha Yang re Tshwanetse go Kaelwa ke Baebele?” Laletsang batho ba ba kgatlhegang gore ba nne teng. E re ka lo ntse lo lebeletse pele go amogela kgothatso le thuso e lona le malapa a lona lo e tlhokang thata, dirang dithulaganyo tse di tlhomameng gore lo nne teng mo thulaganyong yotlhe.