Tsela ya go Tokafatsa Ka fa Re Bontshang Mabaka ka Gone
1 Tlhaloso e nngwe ya “go bontshana mabaka” ke “go buisana le motho ka tsela ya go tlhotlheletsa se a se dirang kana mogopolo wa gagwe.” O tlhoka go bontshana mabaka le batho ba o buisanang le bone gore o nne le matswela mo bodireding. (Dit. 17:2-4) Mme o ka tokafatsa bokgoni jono jang?
2 Go Simolola ka go Tlhatlhanya: Fa o ithuta boammaaruri jwa Baebele, o tla bona go thusa go tlhatlhanya ka kgang eo. Fa dintlha tseno di lebega di raraane, iphe nako ya go batlisisa le go tlhatlhanya ka dikarabo. Leka go tlhaloganya e seng fela ditlhaloso tse o di neetsweng mme le mabaka a Dikwalo a ditlhaloso tseo.
3 Go Akaretsa go Baakanyetsa Bodiredi: Akanya ka fa o tlileng go tlhalosetsa batho ba ba farologaneng boammaaruri ka gone. Tsosa potso e e tla dirang gore motho a akanye gore a nne le kgatlhego. Batla ditsela tsa go bua ka ntlha e e tswang mo Dikwalong mme o mmontshe mabaka ka yone. O akanye ka dintlha tse o ka nnang wa ganediwa ka tsone le tsela e o ka di arabang ka yone. Tlhopha ntlhakgolo e e tshwanelang e o ka e buelelang mo bukeng e e tsamaisiwang.
4 Latela Sekao sa ga Jesu: Jesu o ne a tlhoma sekao se se molemolemo sa go bontshana mabaka le batho ka katlego mo Dikwalong. Gore o sekaseke tsela e a neng a ruta ka yone, tlhatlhanya ka polelo e e fitlhelwang mo go Luke 10:25-37. Ela tlhoko dikgato tseno: (1) Dirisa Dikwalo fa o araba dipotso tsa batho. (2) Ba kope gore ba itlhalose, mme o ba akgole fa ba akgela ka tsela e e utlwalang. (3) Tlhomamisa gore o gatelela ka fa potso e amanang ka teng le Dikwalo. (4) Dirisa setshwantsho se se kgatlhang go tlhomamisa gore se se tlhalosiwang ke karabo se a tlhaloganngwa.—Bona Tora ya Tebelo, March 1, 1986, ditsebe 27-8, dirapa 8-10.
5 Dirisa Sedirisiwa Se re Se Neetsweng: Buka ya Go Fetolana ka Dikwalo e gatiseditswe go re kaela mo bodireding jwa tshimo. Diketapele tsa yone, ditsela tsa yone tsa go arabela ba ba ka nnang ba kgoreletsa puisano, le dintlha tsa yone tse di utlwalang di re thusa go tokafatsa tsela e re bontshang mabaka ka yone. Buka ya Go Fetolana ke sedirisiwa se se botlhokwa se re tshwanetseng go nna re se tshotse ka metlha mo tirelong mme re se ka ra etsaetsega go e dirisa fa re buisana le batho ka Baebele. Tlhatlhoba ditsebe 7-8 tsa buka eno o bone ka fa e ka go thusang thata ka gone fa o e dirisa.
6 Tsela ya go tokafatsa ka fa o bontshang mabaka ka gone e tla godisa bokgoni jwa gago mo tirong ya go rera le ya go ruta. Seno se tla felela ka gore o segofadiwe thata mmogo le batho ba o buisanang le bone mo bodireding.