Lebokoso la Dipotso

◼ Ke mang yo o tshwanetseng go rapela kwa dipokanong tsa phuthego?

Thapelo ya phuthego ke karolo e e botlhokwa thata ya kobamelo ya rona. Go rapelela ba bangwe fa pele ga ga Jehofa ke tshiamelo e e botlhokwa e bile ke boikarabelo jo bogolo. E re ka e le botlhokwa, bagolwane ba tshwanetse go nna kelotlhoko fa ba dira tshwetso ya gore ke bakaulengwe bafe ba ba tshwanelegang go rapela kwa dipokanong. Bakaulengwe ba ba kolobeditsweng ba ba rapelelang phuthego e tshwanetse ya bo e le badiredi ba ba godileng ba Bakeresete ba ba itsiweng e le dikao tse di molemo e bile ba tlotlwa ke phuthego. Dithapelo tsa bone tse di tlotlegang di tshwanetse tsa bontsha gore ba na le botsalano jo bontle le Jehofa Modimo. Setlhogo se se reng “Go Rapela fa Pele ga ba Bangwe ka Pelo e e Ikokobeditseng” se se mo makasineng wa Tora ya Tebelo ya May 15, 1986, se bolela ka melaometheo e e botlhokwa e e thusang thata batho ba ba rapelelang phuthego phatlalatsa.

Bagolwane ba ka se dire gore mokaulengwe yo o itsiweng ka boitshwaro jo bo belaetsang kana jo bo sa siamang a rapele. Go ka se tlhophiwe mokaulengwe yo o ratang go ngongorega kana yo o ratang go dirisa thapelo ya phatlalatsa go anamisa dikgotlhang tsa gagwe. (1 Tim. 2:8) Le mororo mokaulengwe yo mosha a ka tswa a kolobeditswe, bagolwane ba tla sekaseka gore a o godile sentle semoyeng mo a ka kgonang go rapelela phuthego.—Bapisa Ditiro 16:1, 2.

Ka dinako tse dingwe kwa dipokanong tsa tirelo ya tshimo, go ka nna ga tlhokega gore kgaitsadi yo o kolobeditsweng a rapele fa e le gore ga go na mokaulengwe yo o tshwanelegang go ka rapelela setlhopha. O tshwanetse go rwala sengwe se se tshwanelang se se bipang tlhogo. Fa e le gore mokaulengwe yo o tshwanelegang o tla bo a seyo mo dipokanong dingwe tsa tirelo, bagolwane ba tshwanetse go abela kgaitsadi yo o tshwanelegang gore a etelele pele.

Ka tlwaelo modulasetulo wa Pokano ya Phatlalatsa ke ene yo o bulang ka thapelo. Le fa go ntse jalo, kwa dipokanong tse dingwe tsa phuthego, fa go na le bakaulengwe ba sekae fela ba ba tshwanelegang, mongwe fela kwantle ga mokaulengwe yo o simolotseng pokano kana yo o abetsweng puo ya bofelo a ka nna a kopiwa gore a simolole le go konela ka thapelo. Legale, mokaulengwe yo o tla kopiwang go tla go rapelela pokano ya phuthego o tshwanetse go itsisiwe go sa le gale gore a kgone go akanya ka se a tlileng go se bua. Go tswa foo a ka rapela thapelo e e utlwalang, le e tlhoafetseng e e tshwanelang pokano eo.

Dithapelo tse di ntseng jalo ga di a tshwanela go lelefadiwa. Fa mokaulengwe a rapela thapelo ya phatlalatsa, gantsi a ka tlhaloganngwa botoka fa a eme ka maoto, a bua ka lentswe le le utlwalang, e bile a bua sentle. (Bapisa 1 Bakorintha 14:16.) Seno se tla dira gore botlhe ba ba kokoaneng ba utlwe thapelo le gore kwa bofelong ba re “Amen!” e e tswang pelong.—1 Ditir. 16:36.