“Ke ka Dira Jalo Jang, fa Mongwe a sa Nkaele?”
1 Fa moefangele Filipo a ne a botsa moopahadiwa wa Moethiopia gore a o tlhaloganya se a neng a se bala mo Lefokong la Modimo, monna yono o ne a araba jaana: “Tota, ke ka dira jalo jang, fa mongwe a sa nkaele?” Filipo o ne a itumelela go mo thusa go tlhaloganya dikgang tse di molemo ka ga Jesu, se se neng sa dira gore monna yono a kolobediwe ka yone nako eo. (Dit. 8:26-38) Filipo o ne a utlwa thomo e e tswang kwa go Keresete ya go ‘dira batho ba merafe yotlhe barutwa, ya go ba kolobetsa le go ba ruta.’—Math. 28:19, 20.
2 Re tshwanetse go utlwa thomo eno ya go dira barutwa, fela jaaka Filipo. Le fa go ntse jalo, tsela e moopahadiwa wa Moethiopia a neng a gatela pele mo semoyeng ka bonako ka yone, gantsi ga e bonale mo bathong ba re ithutang Baebele le bone. Monna yoo, yo e neng e le mosokologi wa Mojuda yo o neng a itse Dikwalo thata, o ne a le pelontle mme o ne a tlhoka go dumela fela gore Jesu e ne e le Mesia yo o solofeditsweng. Ke kgwetlho fa batho ba re ithutang le bone ba sa tlwaelana le Baebele, ba tsieditswe ka dithuto tsa bodumedi tsa maaka, kana ba imetswe ke mathata a bone a a boima. Ke eng se se ka re thusang gore re atlege go kaela dithuto tsa Baebele gore di ineele le go kolobediwa?
3 Lemoga Dilo Tse Moithuti wa Baebele a di Tlhokang mo Semoyeng: Tsenyeletso ya Tirelo ya Rona ya Bogosi ya August 1998 e ile ya tlotla ka nako e re ka nnang ra ithuta le batho ka yone, re dirisa boroutšhara jwa Re Direng le buka ya Kitso. E ne ya re neela kaelo eno: “Go botlhokwa gore o akanyetse lobelo lo thuto e tshwanetseng go tsamaya ka lone o ikaegile ka maemo le tsela e moithuti a tshwarang dilo ka yone. . . . Ga re batle go dira gore moithuti a se kgone go tlhaloganya dilo sentle ka gonne re lwela fela go fetsa ka bonako. Moithuti mongwe le mongwe o tlhoka motheo o o nonofileng wa tumelo ya gagwe e ntšha mo Lefokong la Modimo.” Ka gone, go ka nna molemo gore re se ka ra itlhaganelela go fetsa buka ya Kitso ka boikaelelo jwa go leka go fetsa buka eo mo dikgweding tse thataro fela. Go ka nna ga tlhokega dikgwedi tse di fetang tse thataro go thusa batho ba bangwe gore ba gatele pele go fitlhela ba kolobediwa. Fa o ntse o tshwara thuto beke le beke, dirisa nako e e tlhokegang go thusa moithuti go tlhaloganya le go amogela se a se ithutang mo Lefokong la Modimo. Mo mabakeng a mangwe, go ka nna ga tlhokega dibeke di le pedi kana di le tharo gore lo fetse kgaolo e le nngwe mo bukeng ya Kitso. Seno se tla lo naya nako ya go bala le go tlhalosa dikwalo di le dintsi tse di nopotsweng.—Bar. 12:2.
4 Le fa go ntse jalo, go tweng fa e re lo sena go fetsa buka ya Kitso, o bo o lemoga gore tsela e moithuti a tlhaloganyang boammaaruri ka yone e sa ntse e tlhoka go tokafadiwa kana ga a ise a tlhotlheletsege go emela boammaaruri le go neela Modimo botshelo jwa gagwe? (1 Bakor. 14:20) Ke eng gape se o ka se dirang gore o mo kaele mo tseleng e e isang botshelong?—Math. 7:14.
5 Diragatsa Dilo Tse Moithuti wa Baebele a di Tlhokang mo Semoyeng: Fa go bonala gore motho o gatetse pele, le mororo a le bonya, le gore o anaanela se a se ithutang, tswelela pele o ithuta le ene Baebele mo bukeng ya bobedi fa a sena go fetsa boroutšhara jwa Re Direng le buka ya Kitso. Go ka nna ga se ka ga tlhokega gore go dirwe jalo mo mabakeng otlhe, mme fa go tlhokega, tsweledisa thuto mo bukeng ya Kagiso ya Boammaaruri, Go Utlwana mo Kobamelong, kana mo bukeng ya Lefoko la Modimo. Baboledi ba le bantsi ba na le dikhopi tsa dibuka tseno gore ba di dirise fa e le gore phuthego ga e na tsone. Buka ya Lefoko la Modimo ke yone fela e e ka kopiwang kwa Mokgatlhong. Mo mabakeng otlhe, go tla ithutiwa pele boroutšhara jwa Re Direng le buka ya Kitso. Thuto ya Baebele, maeto a go boela, le nako e e dirisitsweng gore thuto e tswelele pele, di tshwanetse go balwa le go begwa, tota le fa moithuti a ka kolobediwa pele a fetsa buka ya bobedi.
6 A seno se raya gore batho ba ba kolobeditsweng bosheng mme ba ithutile buka e le nngwe fela ba tshwanetse gore jaanong ba thusiwe sesha gore ba ithute buka ya bobedi? Nnyaa. Le fa go ntse jalo, ba ka tswa ba ile ba tsidifala kana ba sa gatele pele mo boammaaruring, mme ba ka nna ba bona gore ba tlhoka go thusiwa gore ba dirise boammaaruri mo matshelong a bone ka tsela e kgolwane. Molebedi wa tirelo o tshwanetse a itsisiwe pele go tsosolosiwa thuto le mmoledi yo o kolobeditsweng. Le fa go ntse jalo, fa o itse mongwe yo o ithutileng buka ya Kitso mo nakong e e fetileng mme a sa gatela pele gore a ineele le go kolobediwa, o ka nna wa batla go tsaya kgato go bona gore a a ka rata go tsweledisa thuto ya gagwe ya Baebele pele.
7 Re a bo re supa gore re na le lorato lwa Bokeresete fa re tlhokomela mongwe le mongwe yo o kgatlhegang yo re ithutang le ene. Boikaelelo jwa rona ke go thusa moithuti gore a nne le temogo e kgolo ya boammaaruri jwa Lefoko la Modimo. Go tswa foo a ka kgona go emela boammaaruri ka tsela e e nitameng le e e matlhagatlhaga le go neela Jehofa botshelo jwa gagwe, a tshwantshetsa boineelo joo ka go kolobediwa mo metsing.—Pes. 40:8; Baef. 3:17-19.
8 A o gakologelwa se se neng sa diragala morago ga gore moopahadiwa wa Moethiopia a kolobediwe? “O ne a nna a tswelela mo tseleng ya gagwe a ipela” e le morutwa yo mosha wa ga Jesu Keresete. (Dit. 8:39, 40) E kete rona mmogo le batho ba re kgonang go ba kaela mo tseleng ya boammaaruri re ka ipelela go direla Jehofa Modimo—gone jaanong le ka bosakhutleng!