“Ga re Ka ke Ra Tlogela go Bua”
1 Jesu Keresete o etse tlhoko thata tiro ya go rera. (Math. 28:20; Mar. 13:10) Le mororo go na le baboledi ba ba tlhoafetseng ba ka nna dimilione tse thataro ba ba neelang bosupi mo dinageng di le 234, ga re a tshwanela go akanya gore tiro ya rona ya go neela bosupi e weditswe. “Ga re ka ke ra tlogela go bua” ka dilo tse re di ithutileng, go fitlhela Modimo a bolela gore tiro eno e weditswe.—Dit. 4:20.
2 Ikaege ka Moya wa Modimo: Satane o re gatelela thata gore re kgobege marapo. (Tshen. 12:17) Nama ya rona e e sa itekanelang le yone e re bakela mathata a mantsi. Dilo tse di ntseng jalo di ka re kgoreletsa mo tirong ya rona e e botlhokwatlhokwa ya go rera. Le fa go ntse jalo, fa re ikanya Jehofa, moya wa gagwe o tla re thusa go lebana le dikgoreletsi dipe fela.
3 Ka nako ya fa phuthego ya Bokeresete ya lekgolo la ntlha la dingwaga e ne e bogisiwa setlhogo, bakaulengwe ba ne ba rapela Modimo ba kopa go thusiwa gore ba nne ba bue lefoko la gagwe ka bopelokgale jotlhe. Jehofa o ne a araba thapelo ya bone ka go ba tshololela moya wa gagwe le go ba naya tlhoafalo le boikemisetso jo bo neng bo tlhokega gore ba tswelele pele ba rera. Ka ntlha ya seo, ba ne ba tswelela ba sa kgaotse go bolela dikgang tse di molemo ka bopelokgale.—Dit. 4:29, 31; 5:42.
4 O se Ka wa Boifa Puo e e Kgobang Marapo: Re ka nna ra tshosiwa ke maikutlo a batho ka bontsi ba nang le one ka rona kana tsela e re senngwang leina ka yone. Le fa go ntse jalo, a re gakologelweng mafoko a bopelokgale a Petere le baaposetoloi ba bangwe ba neng ba a bolelela Sanehederine, a a kwadilweng mo go Ditiro 5:29-32. Fela jaaka motho yo o rutang Molao e bong Gamaliele a ile a bua, tiro ya Modimo e ka se senngwe. Ga e dirwe ka maatla a rona. Tiro eno e kgolo e engwe nokeng ke Modimo, mme ke ene fela yo a ka e wetsang!—Seka. 4:6.
5 A re kopeng Jehofa moya wa gagwe letsatsi le letsatsi gore o re thuse go bolela dikgang tse di molemo ka tlhoafalo. E kete re ka bolela fela jaaka Jeremia, gore molaetsa wa Bogosi o ntse jaaka molelo o o tukang mo marapong a rona. (Jer. 20:9) Ga re ka ke ra didimala!