Tshwara Lefoko la Modimo Sentle
1 Fa Filipo a ne a naya modiredimogolo mongwe bosupi o ne “a bula molomo mme, a simolola ka Lokwalo [longwe], a mmolelela dikgang tse di molemo kaga Jesu.” (Dit. 8:35) Filipo o ne a “tshwere lefoko la boammaaruri sentle.” (2 Tim. 2:15) Le fa go ntse jalo, gompieno balebedi ba ba etang ba lemogile gore baboledi ba le bantsi ba dirisa Baebele sewelo fela fa ba naya bosupi. A o dirisa Baebele mo bodireding jwa gago?
2 Lefoko la Modimo ke motswedi wa sengwe le sengwe se re se dumelang le se re se rutang. (2 Tim. 3:16, 17) Ke lone le le gogelang batho kwa go Jehofa le go ba ruta gore ba bone botshelo. Ke gone ka moo go leng botlhokwa gore re dirise Baebele mo bodireding jwa rona go na le go bua fela ka dilo tse di re kgatlhang. (Baheb. 4:12) E re ka batho ba le bantsi ba se na kitso e e kalo ka Baebele, re tshwanetse go e bala gore re ba bontshe kaelo e e mosola ya yone le isagwe e e e solofetsang batho.
3 Bala ka Tlhamalalo go Tswa mo Baebeleng: O ka nna wa leka go rera o sa tshwara beke ya dibuka. O ka nna wa tsenya dibuka tse o batlang go di tsamaisa mo bekeng e nnye o bo o tshwara Baebele ka letsogo kana o e tsenye mo potleng. Go tswa foo, fa o tlotla le motho, o ka kgona go dira gore a tlhaloganye Baebele kwantle ga go mo dira gore a ikutlwe gore o a mo rerela. Ema ka tsela e moreetsi wa gago a ka kgonang go bala le wena mo Baebeleng ya gago. Gongwe mo kope gore a balele temana nngwe kwa godimo. O tla kgatlhega thata fa a ka bona se Baebele e se buang go na le go se utlwa fela mo go wena. Gone ke boammaaruri gore go mo thusa go tlhaloganya ntlha ya temana eo, o tshwanetse go gatelela mafoko a a tlhalosang ntlha eo.
4 Puisano ka Temana e le Nngwe: Fa o sena go ikitsise, o ka nna wa bua jaana: “Batho ba leba mo metsweding e e farologaneng ya tshedimosetso go bona se se ka kaelang matshelo a bone. O akanya gore ke motswedi ofe wa tshedimosetso o o molemo go gaisa e mengwe yotlhe o o nayang kaelo e e mosola? [Mo letle go araba.] O akanyang ka mafoko ano? [Bala Diane 2:6, 7, mme o mo letle go araba.] Botlhale jwa batho bo itshupile bo tlhaela fela thata, bo dira gore ba le bantsi ba itlhoboge. Le fa go ntse jalo, ka metlha botlhale jwa Modimo bo itshupile bo ikanyega e bile bo solegela molemo.” Go tswa foo, mmontshe kgatiso e o e tsamaisang, o bo o mmontsha go tswa mo go yone sekao se le sengwe se se bontshang botlhale jo bo mosola jwa Modimo.
5 Jesu o ne a dirisa Dikwalo go thusa batho ba ba dipelo di ikanyegang. (Luke 24:32) Paulo o ne a supa go tswa mo Dikwalong dilo tse a neng a di ruta. (Dit. 17:2, 3) Go itshepa ga rona le boitumelo jwa rona mo bodireding di tla oketsega fa re ntse re tswelela pele go nna ditswerere mo go tshwareng Lefoko la Modimo sentle.