“Dimpho Tse e Leng Banna” di Disa Letsomane la Modimo ka Tlhoafalo
1 A bo Jehofa a dirile thulaganyo e e lorato jang ne ka Morwawe ka go re naya “dimpho tse e leng banna”! (Baef. 4:8, 11, 12) Ba na le maikarabelo a le mantsi thata, go akaretsa le go disa letsomane la Modimo ka tlhagafalo le ka tlhoafalo. (1 Pet. 5:2, 3) Rotlhe re solegelwa molemo ke thulaganyo eno e re e tlhokang thata. Le fa bangwe ba ka tswa ba lebana le mathata, ba sa tswa go kopanela, ba na le makoa mangwe kana ba fapogile mo tseleng, banna bano ba kgatlhegela bomoya jwa bone botlhe thata.—Bafil. 2:4; 1 Bathes. 5:12-14.
2 Fa ditiragalo tse di tshosang tsa lefatshe leno di re boifisa, badisa bano ba babotlana ba nna “jaaka lefelo la go iphitlhela phefo le lefelo la go iphitlhela pula ya matsubutsubu.” Fa re lapile kana re imelwa mme re ikutlwa re tlhoka go gomodiwa, ba a re lapolosa, “jaaka melatswana ya metsi mo nageng e e se nang metsi” kana “jaaka moriti wa lefika le legolo thata mo lefatsheng le le omileng.”—Isa. 32:2.
3 Go Kgothatsa ba ba Tsidifetseng: Bagolwane ba dira boiteko jo bo kgethegileng go kgothatsa ba ba ileng ba kgaotsa go bega ka metlha kana ba tsidifala, go ba thusa go nna le seabe ka metlha mo ditirong tsotlhe tsa phuthego gape. Maeto a bodisa a a lorato a ile a thusa ba le bantsi go nna gone mo dipokanong tsa phuthego ka metlha le go nonotshiwa semoyeng go fitlha ba nna le seabe gape mo bodireding jwa tshimo. Maiteko ano otlhe a a dirwang ke bagolwane a bontsha tsela e e lorato e Jehofa a re tlhokomelang ka yone le kafa Jesu Keresete a re etelelang pele ka tlhagafalo ka teng. Jesu Keresete o re tlhomela sekao se se bontshang gore o amega jalo ka epe fela ya dinku tsa gagwe e e ka tswang e timetse kana e latlhegile.—Math. 18:12-14; Joh. 10:16, 27-29.
4 Badisa bano ba babotlana ba etse tlhoko matshwao a a bontshang fa bangwe ba thetheekela semoyeng. Go lebega batho bape fela ba ba bontshang matshwao a go kgobega marapo, ba ba sa tlholeng ba nna gone ka metlha kwa dipokanong, kana ba ba sa tlholeng ba na le seabe se se kalo mo tirelong ya tshimo ba tlhoka go thusiwa semoyeng. Bagolwane ba iketleeditse go thusa batho bape fela ba ba simololang go bontsha gore ba rata go apara le go ikgabisa ka tsela ya lefatshe kana ba ba simololang go nna le boikutlo jwa go tshwayatshwaya phuthego diphoso. Ka go kgatlhegela ba bangwe ka tsela ya mmatota le ka go ba bontsha lorato lo lo pepetletsang, balebedi bano ba ba tlhagafetseng ba itumelela go ‘naya meya ya bone’ go leka go thusa batho bano go tsosolosa lorato lo ba ratang Jehofa ka lone.—1 Bathes. 2:8.
5 Mo nakong e e fetileng, Bakeresete bangwe ba ba ineetseng ba ile ba kgaotsa go tlhola ba kopanela le phuthego, ba simolola go tsidifala semoyeng ka ntlha ya go fekeediwa ke mathata a botsogo, mathata a tsa itsholelo kana a lelapa. Bagolwane ba tlhomamisetsa batho bano kwantle ga go ba tshwaya diphoso gore Jehofa o amega ka dinku tsotlhe tsa gagwe le gore o tla ba tshegetsa ka dinako tsa mathata. (Pes. 55:22; 1 Pet. 5:7) Badisa ba ba tlhaga ba letsomane ba ka thusa batho bano go lemoga gore fa ba ka ‘atamela Modimo, le ene o tla ba atamela,’ a ba gomotse le go ba lapolosa.—Jak. 4:8; Pes. 23:3, 4.
6 Go Amega Ka ba Ba Koafetseng: Badisa bano ba babotlana ba ba lorato ba amegile gape le ka batho ba ba ka nnang ba itlhokomolosiwa. Mo phuthegong nngwe le nngwe go na le batho ba ba koafetseng, ba ba nnang fela mo magaeng a go tlhokomelwang batsofe mo go one kana ba golafetse ka ditsela tse dingwe. Ke boammaaruri gore maemo a bone a dira gore ba nne le seabe se sennye mo tirong ya go bolela molaetsa wa Bogosi. Gongwe sebaka se le sosi se ba nang le sone sa go naya bosupi ke fa ba kopana le baeng, balwetse ba bangwe, kana batho ba ba ba tlhokometseng. Le fa go ntse jalo, sengwe le sengwe se ba kgonang go se dira se tsewa e le karolo ya botlhokwa thata mo tirong yotlhe ya go rera. (Math. 25:15) Le fa ba ka naya bosupi ka metsotso e le 15 fela, nako eno e tshwanetse go begiwa, mme ba tla nna ba balelwa gareng ga baboledi ba ka metlha ba Bogosi.
7 “Dimpho tse e leng banna” di etse tlhoko thata dilo tsa semoya tse di tlhokwang ke bakaulengwe ba bone mo nakong eno ya ngwaga—ya paka ya Segopotso. A bo nako eno e tshwanela sentle jang ne gore bagolwane ba dire boiteko jo bo kgethegileng go thusa botlhe ba ba timetseng gore ba boe gape ba nne le boitumelo le kagiso ya mogopolo tse di bonwang ka go kopanela le phuthego ka boitumelo! Re itumela thata fa re bona batho bano ba ba “amanang le rona mo tumelong” ba le teng kwa dipokanong tsa phuthego le kwa bodireding, ba tsosolosa tumelo ya bone mo setlhabelong sa thekololo.—Bagal. 6:10; Luke 15:4-7; Joh. 10:11, 14.