Malapa a a Nonofileng Semoyeng—A ka Nna Gone Jang?
1 Malapa a Bakeresete a akgolelwa go bo a ‘itlwaetsa boineelo jwa bomodimo mo go ba ntlo ya bone.’ (1 Tim. 5:4) Le fa go ntse jalo, e re ka re dikologilwe ke ditlhotlheletso di le dintsi tse di sa siamang tse di ka koafatsang tumelo ya rona, go botlhokwa thata gore malapa a dire ka natla gore a nne a nonofile semoyeng. Seno se ka dirwa jang?
2 Bontsha Botlhogo jo bo Tshwanang le Jwa ga Jesu: Ditlhogo tsa malapa di tshwanetse go etsa Jesu Keresete mo tseleng e di sikarang boikarabelo jwa tsone ka yone jwa go nonotsha malapa a bone. Mo godimo ga gore Jesu a re bontshe lorato lwa gagwe ka loso lwa gagwe lwa setlhabelo, gape o ne a nna a ‘fepa a ba a ngomaela’ phuthego. (Baef. 5:25-29) Batsadi ba ba lorato ba latela sekao seno sa go bontsha tlhokomelo e e lorato ka go ela tlhoko gore ba naya malapa a bone dilo tse a di tlhokang semoyeng letsatsi le letsatsi. Seno se akaretsa go tshwara thuto ya lelapa beke nngwe le nngwe, go nna le metlotlo e e agang ya semoya nako nngwe le nngwe fa go kgonega le go tlotla ka mathata fa a tlhaga.—Dute. 6:6, 7.
3 Mo Bodireding Jwa Tshimo: Maloko otlhe a lelapa a tshwanetse go tlhaloganya gore go naya ba bangwe bosupi ka ga Jehofa le maikaelelo a gagwe ke karolo e e botlhokwa thata ya kobamelo ya bone. (Isa. 43:10-12) Fa lona batsadi lo batla gore bana ba lona e nne Basupi ba ba ikanyegang ba ga Jehofa, lo tshwanetse go simolola go sa le gale thata go etleetsa dipelo tsa bone gore di rate bodiredi. Ba tlhalosetseng mabaka a go bo ba tshwanetse go iintsha setlhabelo mo tirelong le go nna le seabe mo go yone beke nngwe le nngwe. (Math. 22:37-39) Go tswa foo, rulaganyang gore ba nne le seabe le lona ka metlha mo bodireding jwa tshimo.
4 Dirang gore ba anaanele tiro ya go rera ka gore lo beele nako kwa thoko mo thutong ya lelapa ya beke le beke go baakanyetsa dipuisano tse di nang le matswela le go di ikatisetsa. Thapisang mongwe le mongwe wa bana ba lona mo bodireding, lo ba thuse go gatela pele go ya ka dingwaga le bokgoni jwa bone. Fa lo boa kwa tshimong, tlotlang le bone gore ba tlhalose gore ba iponetse molemo wa ga Jehofa jang ka bobone. Ba tlotleleng maitemogelo a a nonotshang tumelo. Fa malapa a “utlwile gore Morena o pelonomi,” a tla atamelana thata le Jehofa, mme seno se tla ba nonotsha gore ba gane “bosula jotlhe.”—1 Pet. 2:1-3.
5 Kwa Dipokanong: A bo go le molemo thata jang ne fa maloko a lelapa a thusana gore a nne gone kwa dipokanong tsotlhe tsa phuthego, segolobogolo fa mongwe wa bone a ikutlwa a lapile, a kgobegile marapo kana a imelwa! Kgaitsadi mongwe yo mosha o ne a akgela jaana: “Fa rre a boa kwa tirong, o tla a lapile. Mme ke mmolelela ntlha nngwe e e molemo e go tlileng go tlotliwa ka yone kwa dipokanong mo maitseboeng ao, mme seno se mo tlhotlheletsa go ya dipokanong. Mme le nna fa ke ikutlwa ke lapile, o nkgothaletsa go ya.”—Baheb. 10:24, 25.
6 Go Dira Dilo Mmogo: Malapa a tshwanetse go dira dilo mmogo, jaaka go thusana ka ditiro tsa mo ntlong. Gape a tshwanetse go beela nako kwa thoko ya boitlosobodutu jo bo tlhophilweng sentle. Go ya pikiniking, go itlhabisa phefo, go tshameka le go etela ba losika kana ditsala go ka dira gore lo nne le dinako tse di itumedisang thata le dilo tse di molemo tse lo ka nnang lo di gakologelwa.—Mor. 3:4.
7 Malapa a a nonofileng a Bakeresete a kgona go fenya dikgwetlho tsa letsatsi le letsatsi tse di gwetlhang bomoya jwa bone. Ka go atamelana thata le Jehofa, ba kgona go nna le maatla a a re nayang one.—Baef. 6:10.