Itsise Boammaaruri Kaga Jesu
1 Bakeresete ba ba tloditsweng “ba na le tiro ya go naya bosupi ka Jesu” mme ba e dira ba thusiwa ke ditsala tsa bone tsa dinku tse dingwe. (Tshen. 12:17) Eno ke tiro ya botlhokwa e re ka poloko e ka bonwa fela ka ene.—Joh. 17:3; Dit. 4:12.
2 ‘Tsela, Boammaaruri le Botshelo’: Jesu o ile a re: “Ke nna tsela le boammaaruri le botshelo. Ga go na ope yo o tlang kwa go Rara fa e se ka nna.” (Joh. 14:6) Ke ka Jesu fela, yo e leng “tsela,” re ka kgonang go atamela Modimo ka thapelo le go nna le kamano ya botsala le Ene. (Joh. 15:16) Jesu ke “boammaaruri” ka gonne dipolelelopele tse di fitlhelwang mo Dikwalong Tsa Sehebera di ne tsa diragadiwa mo go ene. (Joh. 1:17; Bakol. 2:16, 17) Ee, boikaelelo jwa konokono jwa dipolelelopele tsa boammaaruri ke go senola seabe sa gagwe sa botlhokwa mo go diragadiweng ga boikaelelo jwa Modimo. (Tshen. 19:10) Mo godimo ga moo, Jesu ke “botshelo.” Rotlhe re tshwanetse go dumela mo setlhabelong sa gagwe sa thekololo fa e le gore re batla go bona mpho ya botshelo jo bo sa khutleng.—Joh. 3:16, 36; Baheb. 2:9.
3 Tlhogo le Kgosi e e Busang: Gape batho ba tshwanetse go itse gore Jehofa o neile Morwawe maatla a magolo a go laola. Jesu o tlhomilwe go nna Kgosi ya Bogosi jwa Modimo—‘mme ditšhaba di utlwa ene.’ (Gen. 49:10) Mo godimo ga moo, Jehofa o mo tlhomile go nna Tlhogo ya phuthego. (Baef. 1:22, 23) Re tshwanetse go thusa batho ba re ithutang Baebele le bone go tlhaloganya tsela e Jesu a kaelang phuthego ka yone le tsela e a dirisang “motlhanka yo o boikanyego le yo o botlhale” ka yone go aba ‘dijo ka nako e e tshwanetseng.’—Math. 24:45-47.
4 Moperesiti yo Mogolo yo o Kutlwelobotlhoko: E re ka Jesu a ile a lebana le diteko le go bogisiwa fa a le mo lefatsheng, “o kgona go tswa ba ba lekwang thuso.” (Baheb. 2:17, 18) A bo go itumedisa jang ne mo bathong ba ba sa itekanelang go itse gore Jesu o ba utlwela botlhoko ka makoa a bone le gore o a ba rapelela! (Bar. 8:34) Ka setlhabelo sa ga Jesu le ka tiro ya gagwe ya go nna Moperesiti yo Mogolo, re kgona go atamela Jehofa “ka kgololesego ya go bua” gore re “bone thuso ka nako e e tshwanetseng.”—Baheb. 4:15, 16.
5 E kete maiteko a rona a go thusa batho ba bangwe go itse boammaaruri kaga Jesu a ka ba tlhotlheletsa go mo ikobela le go mo direla mmogo le rona.—Joh. 14:15, 21.