A o Ka Bula Legae la Gago?
1 Mo lekgolong la ntlha la dingwaga, Bakeresete ba le bantsi ba ne ba bula magae a bone gore a dirisediwe go tshwara dipokano tsa phuthego. (1 Bakor. 16:19; Bakol. 4:15; File. 1, 2) Mo diphuthegong dingwe gompieno, ga go na mafelo a a lekaneng a ditlhopha tsa Thuto ya Buka ya Phuthego le dipokano tsa tirelo ya tshimo. Seno se ka dira gore ditlhopha dingwe tsa thuto ya buka di nne le batho ba le 30 kana go feta, e leng palo e ntsi go feta e e batlegang ya batho ba le 15.
2 Tshiamelo e e Molemo: A o setse o akanyeditse go bula legae la gago gore go tshwarelwe Thuto ya Buka ya Phuthego mo go lone? Kamore ya bogolo jo bo lekaneng e e phepa, e e nang le lesedi le le lekaneng le e e tsenang mowa o o phepa e siametse go nna lefelo la dipokano. Ke tshiamelo e e molemo gore go tshwarelwe thuto ya buka mo ga gago, e re ka thuto ya buka e le pokano ya phuthego e bile e le thulaganyo e Jehofa a e dirisang go ruta batho ba gagwe. Ba le bantsi ba bolela gore ba solegetswe molemo semoyeng ka go bula matlo a bone ka tsela eno.
3 Fa o akanya gore legae la gago le siametse seno, tsweetswee itsise bagolwane ka seno. Ba ka tswa ba batla mafelo a a oketsegileng. Fa go sa kgonege gore go tshwarelwe thuto ya buka mo legaeng la gago, a dipokano tsa tirelo ya tshimo di ka tshwarelwa gone? Tota le fa gone jaanong go sa tlhokege lefelo, bagolwane ba tla anaanela thata go itse gore legae la gago le gone. O ka itumelela tshiamelo eno mo nakong e e tlang.
4 Go Nna Maitseo: Fa re kokoane mo legaeng la mongwe, botlhe ba ba gone ba tshwanetse go tlotla dilwana tsa mong wa legae leo. Batsadi ba tshwanetse go tlhomamisa gore bana ba bone ba nna mo lefelong le thuto e tshwarelwang mo go lone, ba se ka ba tsena mo mafelong a mangwe a legae leo. Gape go tshwanetse ga akanyediwa baagelani, go elwe tlhoko gore ba se ka ba itewa tsebe go sa tlhokege.—2 Bakor. 6:3, 4; 1 Pet. 2:12.
5 Bahebera 13:16 e re kgothaletsa gore re se ka ra lebala “go dira molemo le go abalana dilo le ba bangwe, gonne Modimo o itumedisiwa thata ke ditlhabelo tse di ntseng jalo.” Go bula legae la gago gore go tshwarelwe pokano ya phuthego mo go lone ke tsela e e molemo ya go abelana le ba bangwe dilo tse di molemo le go “tlotla Jehofa ka dilo tsa gago tse di tlhwatlhwakgolo.”—Dia. 3:9.