Tlhoafalela se se Molemo!

¹ Jaaka fa re tsena mo pakeng ya Segopotso ya 2003, re na le mabaka a le mantsi a go “tlhoafalela se se molemo.” (1 Pet. 3:13) Lebaka le le botlhokwa thata mo go one ke setlhabelo sa thekololo sa ga Jesu Keresete. (Math. 20:28; Joh. 3:16) Moaposetoloi Petere o ne a kwala jaana malebana le seno: “Lo ne lwa gololwa mo mokgweng wa lona wa boitshwaro o o se nang maungo . . . e se ka dilo tse di senyegang, ka selefera kgotsa gouta. Mme e ne e le ka madi a a tlhokegang, a a tshwanang le a kwanyana e e se nang molato e bile e se na selabe, one a ga Keresete.” (1 Pet. 1:18, 19) Re ikutlwa re patelesega go nna re tshwaregile ka go dira se se molemo e le go bontsha gore re leboga lorato lo logolo lo re lo bontshitsweng, le gore re lemoga gore Jesu ‘o ne a ineela ka ntlha ya rona gore a re golole mo mofuteng mongwe le mongwe wa go tlhoka molao a ba a intlafaletsa setlhopha sa batho ba ka tsela e e kgethegileng e leng ba gagwe, ba ba tlhoafaletseng ditiro tse di molemo.’—Tito 2:14; 2 Bakor. 5:14, 15.

² Fa re dira se se itumedisang mo matlhong a Modimo, re itumelela botsalano jo bo molemo le ene e bile o tla re tlhokomela ka lorato. Petere o ne a tswelela go bua jaana: “Yo o ka ratang botshelo a ba a bona malatsi a a molemo, . . . a a furalele se se bosula mme a dire se se molemo; a a senke kagiso mme a e latelele. Gonne matlho a ga Jehofa a mo basiaming, le ditsebe tsa gagwe di ntlheng ya mekokotlelo ya bone.” (1 Pet. 3:10-12) Mo dinakong tseno tse di kotsi, a bo go itumedisa jang ne go itse gore Jehofa o re tlhokometse e bile o iketleeleditse go re thusa, go re “sireletsa jaaka thaka ya leitlho la gagwe.”—Dute. 32:10; 2 Ditir. 16:9.

³ Le fa Bakeresete ba bogologolo ba Petere a neng a ba kwalela ba ne ba lebane le diteko, ba ne ba tlhoafetse thata mme ba ne ba bolela dikgang tse di molemo gotlhe mo ba neng ba kgona teng. (1 Pet. 1:6; 4:12) Go ntse jalo le ka batho ba Modimo gompieno. Le fa re tshela mo ‘dinakong tsa mathata tse go leng boima go lebana le tsone,’ re tlhotlheletsega go dira thato ya Modimo ka tlhoafalo ka gonne re anaanela molemo wa ga Jehofa. (2 Tim. 3:1; Pes. 145:7) A re sekasekeng dingwe tsa ditiro tse di molemo tse re tla bong re tshwaregile ka tsone mo pakeng eno ya Segopotso.

⁴ Laletsa ba Bangwe Gore ba Tle Segopotsong: Tsela e nngwe e re ka bontshang ka yone gore re anaanela mpho e kgolo ya thekololo ke gore re nne gone mo segopotsong se se ketekwang ngwaga le ngwaga sa loso lwa ga Jesu, se monongwaga se tla ketekiwang ka Laboraro, April 16, fa letsatsi le sena go phirima. (Luke 22:19, 20) Ngogola, mo diphuthegong di le 94 600 lefatshe ka bophara tse di neng tsa bega, re ne ra nna le palogotlhe ya batho ba le 15 597 746 ba ba neng ba tla Segopotsong! Ba ne ba feta ba ngwagatlola ka palo e e fetang 220 000.

⁵ Go tla tla ba le kae monongwaga? Seno se tla ikaega thata ka gore re leka ka natla go le kana kang go kgothatsa ba bangwe gore ba kopanele le rona. Simolola ka go dira lenaane la botlhe ba o tla ratang go ba laletsa. Ba ntlha mo lenaaneng leo e tshwanetse go nna ba lelapa la gago. Fa o na le molekane yo o sa dumeleng, mmolelele gore o rata thata gore a ye le wena kwa Segopotsong. Monna mongwe yo o sa dumeleng o ne a bolela se se neng sa dira gore a nne gone kwa Segopotsong ngogola, e ne e le go bona kafa go nna teng ga gagwe go neng go tla itumedisa mosadi wa gagwe ka teng. Ba ba latelang mo lenaaneng la gago e ka nna balosika, baagelani, badirimmogo le wena kgotsa ba o tsenang sekolo le bone. Tlhomamisega gore o laletsa ba o ithutang Baebele le bone.

⁶ Fa o sena go dira lenaane la gago, rulaganya nako ya gore o laletse mongwe le mongwe wa bone. Dirisa dipampitshana tsa taletso tsa Segopotso. Gore o thuse batho gore ba gakologelwe gore se tshwarwa leng le gore kae, kwala ka tsela e e bonalang sentle nako le lefelo le Segopotso se tla tshwarelwang kwa go lone fa tlase mo pampitshaneng ya taletso. Fa April 16 e ntse e atamela, gakolola botlhe ba ba mo lenaaneng la gago, ka go ya kwa go bone kgotsa ka go ba leletsa mogala. A re thuseng ba le bantsi ka mo re ka kgonang ka gone gore ba nne gone mo tiragalong eno e e boitshepotshepo.

⁷ Thusa ba ba Tlang Segopotsong: Ka dinako tsotlhe bosigo jwa Segopotso ke nako e e itumedisang thata. Re na le sebaka sa go amogela batho ba gantsi ba sa nneng gone mo dipokanong tsa rona. Rulaganya gore o goroge go sa le gale o bo o nne lobakanyana morago ga Segopotso fa maemo a lefelo la lona a letla. Leka go itsane le ba ba etileng. Ba bontshe lorato o bo o nne botsalano.—Bar. 12:13.

⁸ A go ka thusiwa bangwe ba ba tlileng Segopotsong gore ba gatele pele mo go golwanyane semoyeng ka go tshwarelwa thuto ya legae ya Baebele? Leka go tsaya maina le diaterese tsa baeti bape fela ba gone jaanong go se nang ope yo o ba etelang gore o kgone go ba thusa. Fa re ba thusa ka lorato, bangwe ba bone ba ka gatela pele gore ba bo ba tshwanelegele go nna baboledi ba ba sa kolobediwang pele ga Segopotso sa ngwaga o o tlang. Fa o boela kwa go ba ba neng ba tlile Segopotsong, ba laletse gore ba nne gone mo puong e e kgethegileng e e tla neelwang ka April 27.

⁹ A o Ka Nna Mmulatsela yo o Thusang Monongwaga? Ngwaga le ngwaga tlhoafalo ya rona mo go Jehofa e re tlhotlheletsa go iteka ka natla mo bodireding mo dikgweding tsa tirelo e e kgethegileng ya dilo tsa puso ya Modimo. Ka March le April 2002, ba le 14 186 ba ne ba nna babulatsela ba ba thusang mo Afrika Borwa le mo dinageng tse di tlhokomelwang ke lekala la rona. Eno ga se palo fela e e kwa godimo thata ya ba ba nnileng babulatsela mme e bontsha maiteko a kopanetsweng a a dirilweng ke diphuthego tsotlhe go rera dikgang tse di molemo ka tlhoafalo ka paka ya Segopotso.

¹⁰ Phuthego nngwe ya baboledi ba le 107 le babulatsela ba ka metlha ba le 9 e boletse gore e ne ya nna le “kgwedi e e molemo thata” ka April wa ngwaga o o fetileng, gonne ba ne ba nna le babulatsela ba ba thusang ba le 53 go akaretsa le bagolwane botlhe le batlhanka ba bodiredi. Bagolwane ba ne ba dirang gore bakaulengwe ba tlhagafalele go tsaya bobulatsela jo bo thusang ka kgwedi eo? Ba ne ba simolola go sa le gale thata, ba kgothatsa ba le bantsi ka mo ba ka kgonang ka gone gore ba ikwadise. Dipokano tsa tirelo ya tshimo di ne di tshwarwa ka dinako tse di farologaneng mo letsatsing go thusa botlhe mo phuthegong gore ba kgone go tswela tshimong. Go ne ga gatelelwa thata gore go neelwe bosupi ka thelefouno, segolobogolo ba ba bokoa mo mmeleng.

¹¹ Kgaitsadi mongwe wa dingwaga tse 86, yo o sa kgoneng go tsamaya ka gonne a na le mathata a botsogo, o ne a ikwadisetsa bobulatsela jo bo thusang. O ne a simolola mo mosong go neela bosupi ka thelefouno, ka diura di le mmalwa, a ntse fa tafoleng mo ntlwaneng ya boapeelo, a bo a ikhutsa lobakanyana mme morago ga moo a bo a boa a tswelela gape ka go neela bosupi. Mongwe wa batho ba a neng a buisana nabo o ne a tlhokafaletswe ke monna le ke bomorwawe ba babedi ba dingwaga tsa bolesome dingwaga tse pedi tse di fetileng mme o ne a sa tlhaloganye gore ke ka ntlha yang fa Modimo a letlelela dilo tse di ntseng jalo tse di boikepo go direga. Go ne ga neelwa bosupi ka tsela e e molemo mme ga simololwa thuto ya Baebele. Go neela bosupi ka thelefouno mo maitseboeng le ka dinako tse dingwe ke tsela e e nang le matswela ya go ikgolaganya le batho ba ba nnang mo dikagong kgotsa mo mafelong a go leng thata go tsena mo go one. Gape go dira gore baboledi ba kgone go buisana le batho ba ba seong mo gae motshegare.

¹² Bagolwane ba ne ba konela pego ya bone ka go re: “Re nnile le nako e e monate tota e bile re lebogela tshiamelo le masego a Jehofa a a neileng mongwe le mongwe wa rona.” Fa go rulaganngwa dilo sentle, phuthego ya lona le yone e ka itumelela masego a a ntseng jalo.

¹³ Lekang go Dira Gore Botlhe ba Nne le Seabe mo Bodireding: Lorato lo re ratang Modimo le moagelani ka lone lo re tlhotlheletsa gore re ithekele nako kgwedi le kgwedi gore re bolelele ba bangwe dikgang tse di molemo. (Math. 22:37-39) Balebedi ba Thuto ya Buka ya Phuthego le bathusi ba bone ba tshwanetse go leka go thusa ba ba leng mo ditlhopheng tsa bone go nna le seabe mo bodireding kgwedi le kgwedi. Tsela e e molemo ya go dira seno ke gore ba rulaganye go sa le gale le batho ba ba mo setlhopheng sa bone ba ba tla ratang go dira le bone mo bodireding. Go na le gore ba dire seno fa kgwedi e fela, ba tshwanetse go simolola go sa le gale. Seno se tla ba naya ditshono di le dintsi tsa gore ba ba thuse ka lorato.

¹⁴ A go na le baboledi ba ba bokoa mo mmeleng mo setlhopheng sa lona sa thuto ya buka ba ba go fitlhelang go le thata go nna le seabe mo bodireding? Fa bangwe ba le mo legaeng la batsofe kgotsa ba sa kgone go tswa mo magaeng a bone, go a utlwala gore ga ba ka ke ba kgona go neela bosupi ka tsela e ba batlang ka yone. Mme le fa go ntse jalo, fa ba dirisa tshono e e seng kalo e ba e bonang go dira gore lesedi la bone le phatsime, ba ka nna ba tlhotlheletsa ba ba bonang ditiro tsa bone tse di molemo gore ba kgatlhegele boammaaruri tota. (Math. 5:16) Balebedi ba thuto ya buka ba tshwanetse go tlhomamisega gore batho bano baa itse gore ba ka kgona go bega tiro ya bone ya tshimo ka dikarolwana tsa metsotso e le 15. Fa baboledi bano ba ba ikanyegang ba kgona go bega nako e ba e dirisitseng ba neela bosupi, seno se a ba kgothatsa e bile se dira gore ba itumele ba bo ba kgotsofale. Gape go thusa go dira gore pego ya lefatshe lotlhe ya ditiro tsa batho ba Modimo e bo e le boammaaruri.

¹⁵ Basha ba ba Tshwaregileng ka go Dira se se Molemo! A bo go itumedisa jang ne go bona basha ba Bakeresete ba dirisa maatla le nonofo ya bone mo tirong ya ga Jehofa! (Dia. 20:29) Fa o le mosha, o ka bontsha jang tlhoafalo ya gago ka Jehofa mo dikgweding tseno tse di kgethegileng tsa tirelo?

¹⁶ Fa e le gore ga o ise o nne mmoledi yo o sa kolobediwang mo phuthegong, a o ka gagamalela tshiamelo eo? Ipotse dipotso tse di latelang: ‘A ke na le kitso ya motheo ya boammaaruri jwa Baebele? A ke batla go nna le seabe mo tirelong ya Bogosi? A ke tlhoma sekao ka tsela e ke itshwarang ka yone? A ke kgona go tlhalosa tumelo ya me ka go bolelela ba bangwe dikgang tse di molemo? A ke tlhotlheletsega go tswa pelong go dira jalo?’ Fa e le gore o araba dipotso tseno ka ee, buisana le batsadi ba gago gore o ka rata go nna mmoledi. Batsadi ba gago ba ka buisana le mongwe wa bagolwane ba ba mo komiting ya tirelo.

¹⁷ Fa o setse o le mmoledi wa dikgang tse di molemo, a o ka sola nako ya fa dikolo di tswetse molemo ka go oketsa seabe sa gago mo bodireding? Basha ba le bantsi ba ba kolobeditsweng ba ile ba kgona go tsaya bobulatsela jo bo thusang ka ntlha ya go bo ba ne ba itiretse thulaganyo e e molemo e bile batsadi ba bone le batho ba bangwe ba ne ba ba thusa. Fa o sa kgone go bula tsela, he ikemisetse go oketsa seabe sa gago mo bodireding jwa tshimo. Ipeele mokgele. Mo godimo ga go ipeela mokgele wa go dira diura tse di rileng mo bodireding jwa tshimo, ipeele mokgele o mongwe gape o o malebana le boleng jwa bodiredi jwa gago. Gongwe o ka leka go bala temana mo ntlong nngwe le nngwe, wa leka go tokafatsa tsela e o dirang maeto a go boela ka yone, wa simolola thuto ya Baebele, kgotsa wa oketsa bodiredi jwa gago gore bo akaretse go neela bosupi ka thelefouno kgotsa bo akaretse karolo nngwe ya tirelo. Go tweng ka go ipeela mokgele wa go kopa moagelani, mongwe yo o tsenang sekolo le ene kgotsa wa losika gore a ye le wena kwa Segopotsong monongwaga? Fa o nna le seabe ka botlalo mo ditirong tsa puso ya Modimo seno se tla go leretse boitumelo e bile o tla kgothatsa ba bangwe mo phuthegong.—1 Bathes. 5:11.

¹⁸ Thusa Ba ba Sa Tswang go Kopanela Gore ba Gatele Pele: Mo ngwageng o o fetileng wa tirelo, go ne ga tshwarwa palogare ya dithuto tsa Baebele di le 90 000 kgwedi le kgwedi mo Afrika Borwa, Botswana, Lesotho, Namibia, St. Helena, le Swaziland. Fa nako e ntse e ya, ba le bantsi ba baithuti bano ba tla gatela pele go ya bokgakaleng jwa gore ba ineele le go kolobediwa. Le fa go ntse jalo, pele ga ba fitlhelela mokgele oo, re tshwanetse go ba thusa gore ba tshwanelege go nna baboledi ba dikgang tse di molemo. Eno ke kgato e e botlhokwa thata ya go ruta batho ba ba sa tswang go kopanela gore ba nne balatedi ba ga Jesu Keresete. (Math. 9:9; Luke 6:40) A o na le moithuti wa Baebele yo o siametseng go tsaya kgato eo?

¹⁹ Fa o sa tlhomamisege ka kgatelo pele ya moithuti wa gago, kopa molebedi wa gago wa thuto ya buka kgotsa molebedi wa tirelo gore a go thuse. Gongwe o ka mo kopa gore a nne gone ka nako ya thuto. Bakaulengwe bano ba na le maitemogelo a a botlhokwa a ba ka kgonang go a dirisa go go thusa go bona gore moithuti o gatetse pele jang semoyeng. Ba ka nna ba bo ba na le dikakantsho tse di ka thusang moithuti go tswelela a gatela pele semoyeng.

²⁰ Fa moithuti wa gago a bolela gore o rata go nna mmoledi yo o sa kolobediwang mme o akanya gore o a tshwanelega, buisana le molebedi yo o okamelang. O tla rulaganya gore bagolwane ba babedi ba kopane le wena le moithuti go bona gore a o a tshwanelega, ba dirisa dintlha tse di mo bukeng ya Bodihedi Jwa Rona tsebe 98-9. (Bona Tora ya Tebelo ya November 15, 1988, tsebe 17.) Fa moithuti a tshwanelega go nna mmoledi, o tshwanetse go simolola go mo thapisa di tloga fela. Fa a sena go tlisa pego ya tirelo ya tshimo, phuthego e tla itsisiwe gore moithuti yoo ke mmoledi yo o sa kolobediwang. Re solofela gore baboledi ba le bantsi ba ba sa tswang go kopanela, ba basha le ba bagolo, ba tla fitlhelela kgato eno e e botlhokwa mo dikgweding tseno tse di kgethegileng tsa tirelo.

²¹ Go Rulaganya Dilo go re Thusa go Fitlhelela se se Molemolemo: Go rulaganyetsa dilo kwa pele go tla thusa gore ditiro tsa rona tsa puso ya Modimo di atlege ka paka eno ya Segopotso. (Dia. 21:5) Go na le dilo di le dintsi tse bagolwane ba tshwanetseng go di ela tlhoko.

²² Go thusa phuthego gore e kgone go fitlhelela go le gontsi mo bodireding jwa tshimo, bagolwane ba tshwanetse go dira dithulaganyo tse di tshwanetseng gore go tshwarwe dipokano tsa tirelo ya tshimo beke yotlhe le ka mafelobeke. Molebedi wa tirelo o tshwanetse go di goga kwa pele mo go direng dithulaganyo tseno. A go ka rulaganngwa dipokano tse di oketsegileng mo mosong, motshegare kgotsa maitseboa? Phuthego e tshwanetse go itsisiwe ka dithulaganyo tseno. Go ka nna molemo gore thulaganyo eo e bewe mo lomating lwa dikitsiso.

²³ Bagolwane ba tshwanetse go tlhomamisa gore dithulaganyo tsa Segopotso di dirilwe go sa le gale pele ga April 16. Dithulaganyo tseno di akaretsa go buisana le diphuthego tse dingwe tse di tla dirisang Holo ya Bogosi, go phepafatsa Holo ya Bogosi, go tlhopha batlhokomedi le ba ba tsamaisang ditshwantshetso le go bona gore a ditshwantshetso di teng. Phuthego e tshwanetse ya itsisiwe nako ya Segopotso le lefelo le se tla tshwarelwang kwa go lone le diphetogo dipe tsa thulaganyo ya dipokano tsa beke eo. Go dira dilo tseno ka tlhoafalo go tla thusa gore tiragalo eno e “diragale ka mokgwa o montle le ka thulaganyo.”—1 Bakor. 14:40.

²⁴ Ditlhogo tsa malapa di ka nna tsa rata gore di dirise bontlhanngwe jwa nako ya tsone ya thuto ya lelapa go tlotla kafa lelapa le ka nnang le seabe ka gone mo tirong e e oketsegileng ya paka ya Segopotso. A lelapa la gago lotlhe le ka kgona go tsaya bobulatsela jo bo thusang? Kgotsa a ba lelapa ba ka tshegetsa leloko le le lengwe kgotsa go feta gore ba dire jalo? Fa seo se sa kgonege, itlhomeleng mekgele e e rileng lo le lelapa go dirisa nako e e oketsegileng mo bodireding. A go na le mongwe mo lelapeng yo o saleng mmotlana yo, ka go kgothadiwa le go thusiwa go se kae, a ka tshwanelegang go nna mmoledi yo o sa kolobediwang? Lelapa la gago le ka kgona go laletsa batho ba le kae monongwaga go tla Segopotsong? Go rulaganya dilo sentle go tla leretse ba lelapa la gago boitumelo jo bogolo le masego a mantsi.

²⁵ Dirisa Nako e e Setseng ka Botlalo: Fa moaposetoloi Petere a ne a kwalela Bakeresete ba lekgolo la ntlha la dingwaga, o ne a ba gakolola ka tsela e dinako di potlakileng ka yone ka gonne bokhutlo jwa tsamaiso ya dilo ya Sejuda bo ne bo atametse. (1 Pet. 4:7) Gompieno bosupi jotlhe bo bontsha gore bokhutlo jwa tsamaiso eno ya dilo ya lefatshe lotlhe bo gaufi. Tsela e re tshelang ka yone letsatsi le letsatsi e tshwanetse ya bontsha gore re tlhatswegile pelo ka seno. Jaaka batlhanka ba ba tlhoafetseng ba ga Jehofa, re tshwanetse ra tlhoma mogopolo wa rona mo tirong e e potlakileng ya go bolela dikgang tse di molemo.—Tito 2:13, 14.

²⁶ Eno ke nako ya gore re tlhoafale le go tsaya kgato! Tlhatlhanya ka se Jehofa a se go diretseng wena le ba lelapa la gago mmogo le phuthego. Le fa re ka se kgone go duela Jehofa ka ntlha ya ditsela di le dintsi tse a re thusitseng ka tsone, gone re ka kgona go mo obamela ka moya otlhe. (Pes. 116:12-14) Jehofa o tla re segofaletsa maiteko a re a dirang ka natla. (Dia. 10:22) E kete rotlhe re ka “tlhoafalela se se molemo” ka nako eno e e kgethegileng ya tiro e e oketsegileng, “gore mo dilong tsotlhe Modimo a galalediwe ka Jesu Keresete.”—1 Pet. 3:13; 4:11.

[Box on page 3]

Ba ba Nnileng Gone mo Segopotsong mo Lefatsheng Lotlhe

1999 14 088 751

2000 14 872 086

2001 15 374 986

2002 15 597 746

[Box on page 4]

O Tla Laletsa Mang go Tla Segopotsong?

□ Ba lelapa le ba losika

□ Baagelani le batho ba o ba tlwaetseng

□ Badirimmogo le wena le ba o tsenang sekolo le bone

□ Batho ba o boelang kwa go bone le ba o ithutang Baebele le bone

[Box on page 5]

Thusa ba ba Tlileng Segopotsong

□ Ba amogele ka tsela e e lorato

□ Ba etele go ba thusa

□ Ba kope go ithuta Baebele le bone

□ Ba laletse go tla puong e e kgethegileng

[Box on page 6]

Mekgele ya Gago ke Efe mo Pakeng ya Segopotso?

□ Go dira gore mongwe yo o mo laleditseng a nne gone mo Segopotsong

□ Go tshwanelega go nna mmoledi wa dikgang tse di molemo

□ Go dirisa diura tse di rileng mo bodireding

□ Go tokafatsa karolo nngwe ya bodiredi jwa gago

□ Go nna mmulatsela yo o thusang