Basha—Balang Lefoko la Modimo!

¹ Bosha ke nako ya dikgwetlho le ya go dira ditshwetso tse dikgolo. Bontsi jwa lona basha ba Bakeresete, letsatsi le letsatsi lo lebana le kgatelelo ya gore lo tlole melao ya Modimo ya boitsholo. Fa lo simolola go itirela ditshwetso malebana le thuto, tiro ya boitshediso le lenyalo, lo tshwanetse lwa bo lo setse lo ipeetse mekgele ya semoya. Ke ka tsela eno fela lo ka kgonang go dira ditshwetso tse dingwe tse di tla lo solegelang molemo mo botshelong jotlhe jwa lona. Mekgele e e tlhomameng ya semoya e tla go thusa go dira dilo ka tsela e e botlhale le gore tsela ya gago e atlege. Fa o bala le go tlhatlhanya ka Lefoko la Modimo ka metlha, o tla tlhotlheletsega go tshela tumalanong le kgakololo ya lone e e tlhotlheleditsweng, mme dilo tse di siameng tse o lekang ka natla go di dira di tla atlega.—Josh. 1:8; Pes. 1:2, 3.

² Go Tla go Solegela Molemo Jang? Lefatshe la ga Satane le tletse ka dilo tse di ka gogelang motho gore a dire se se bosula. (1 Joh. 2:15, 16) O ka tswa o itse ka baithuti mmogo le wena kgotsa bangwe ba ba lekanang le wena ka dingwaga ba ba ileng ba tlhagelwa ke masetlapelo ka gonne ba ile ba ineela go tlhotlhelediwa ke balekane. Go reetsa kgakololo ya Baebele go tla nonotsha boitsholo le bomoya jwa gago gore o gane go dira boleo. Mo godimo ga moo, kgakololo ya Lefoko la Modimo e ka go thusa gore o tile dirai tsa ga Satane tse di bofitlha. (2 Bakor. 2:11; Baheb. 5:14) Go tsamaya mo ditseleng tsa Modimo go tla go itumedisa tota—go go kgotsofatse mo tseleng ya gago ya botshelo.—Pes. 119:1, 9, 11.

³ Melaometheo e e sa fetogeng ya Lefoko la Modimo e gaisa botlhale jwa motho kgakala. (Pes. 119:98-100) Go itse melaometheo ya Baebele le go tlhatlhanya ka maikaelelo a ga Jehofa a a senotsweng mmogo le go rapela go tswa pelong go ka go thusa gore o nne le botsalano jo bo gaufi le Mokwadi wa Baebele yo o botlhale go gaisa, Jehofa Modimo. O solofetsa jaana: “Ke tla dira gore o nne le temogo ke bo ke go rute tsela e o tshwanetseng go tsamaya mo go yone. Ke tla naya kgakololo ke go beile leitlho.”—Pes. 32:8.

⁴ Iphe Nako Ya go E Bala: Mosha mongwe wa Mokeresete o ne a ipeela mokgele wa go bala Baebele yotlhe, mme o ne a e fetsa mo lobakeng lwa ngwaga. O ne a solegelwa molemo jang? O gakologelwa jaana: “Ke ne ka ithuta go le gontsi ka Jehofa—ke ithuta ka dilo tse di neng tsa dira gore ke atamalane thata le ene le go dira gore ke batle go mmoifa botshelo jotlhe jwa me.” (Jak. 4:8) A o setse o badile Baebele yotlhe? Fa go sa nna jalo, ke eng fa o sa ipeele mokgele wa go dira jalo? Ruri Jehofa o tla segofatsa maiteko a gago, mme o tla nna le matswela a magolo.