Dirisa Baebele ka Tsela e e Molemo
1. Ke eng se o ka se dirang fa o baakanyetsa bodiredi jwa tshimo?
1 Go sa kgathalesege gore re rulaganya go tsamaisa kgatiso efe mo bodireding, go molemo gore o tlhophe temana e e tla thusang motho gore a akanye e o tla e balelang batho ba ba go reetsang. (Baheb. 4:12) Go dirisa temana e e leng mo kgatisong e o tlileng go e tsamaisa go tla thusa go tsamaisa kgatiso eo kwantle ga bothata. Mo mafelong mangwe, baboledi ba go fitlhetse go le molemo gore ba tshware Baebele ka seatla fa ba tla ba lebane le motho yo ba tlileng go buisana le ene kgotsa fa ba bereka ka ntlo le ntlo.
2. (a) Re ka simolola motlotlo wa rona jang ka temana? (b) Ke ditlhogo dife tse di tswang mo Dikwalong tse di ka kgatlhang batho ba re kopanang le bone mo tshimong?
2 Simolola ka Temana: Baboledi bangwe ba simolola puisano ya bone ka go botsa mong wa ntlo potso e e motlhofo ka temana ya Baebele e ba tlileng go e bala e re morago ga foo ba e bale. Seno se dira gore ka bonako fela ba lebise tlhokomelo mo Lefokong la Modimo. A dingwe tsa ditsela tseno tsa go simolola motlotlo di ka nna le matswela mo tshimong ya lona?
◼ “Fa o ne o na le nonofo ya go dira jalo, a o ne o tla tlisa diphetogo tseno?” Bala Tshenolo 21:4.
◼ “Ke ka ntlha yang fa re tshela mo dinakong tsa mathata jaana?” Bala 2 Timotheo 3:1-5.
◼ “A o akanya gore lefelo le re nnang mo go lone e ne e ka nna lefelo le le molemo fa mongwe le mongwe a ne a latela kgakololo eno?” Bala Mathaio 7:12.
◼ “A o akanya gore bana ba gago ba ne ba ka itumelela maemo a a tlhalositsweng mono?” Bala Pesalema 37:10, 11.
◼ “A o akanya gore maemo a a tlhalosiwang fano a tla tsamaya a direga?” Bala Isaia 33:24.
◼ “A o ne o itse ka phetogo e e tlhalosiwang fano e e tlileng go direga mo pusong?” Bala Daniele 2:44.
◼ “A o kile wa ikutlwa o batla go botsa Modimo potso eno?” Bala Jobe 21:7.
◼ “A go ka direga gore re boe re bone baratiwa ba rona ba ba suleng?” Bala Johane 5:28, 29.
◼ “A baswi ba itse se batshedi ba se dirang?” Bala Moreri 9:5.
3. Re ka thusa batho jang gore ba tlhaloganye ditemana tsa Baebele tse re di balang?
3 Tlhalosa, Tshwantsha, O bo O Bontshe Kafa Temana e Dirang ka Gone: Fa motho a batla go tlotla le wena, o se ka wa tlotla le ene ka bonako fela. Dirisa nako go tlhalosa, go tshwantsha le go bontsha kafa temana e o e badileng e dirang ka gone e le gore motho a kgone go e tlhaloganya. (Neh. 8:8) Fa batho ba tlhaloganya le go amogela se Lefoko la Modimo le se rutang, le ka kgona go tlisa diphetogo tse di molemo tota mo matshelong a bone.—1 Bathes. 2:13.
4. Re ka dirisa jang Baebele ka tsela e e molemo fa re dira maeto a go boela?
4 Nna o dirise Baebele ka tsela e e molemo fa o ntse o boela kwa mothong yo o bontshitseng kgatlhego. O ka nna wa dirisa one mokgwa ono fa o dira maeto a go boela: (1) Tlhopha temana e e tshwanelang. (2) Mmotse potso e e bonolo e e tla dirang gore a ntshe maikutlo a gagwe ka temana eo. Morago ga moo o bo o e bala. (3) E tlhalose, o tshwantshe o bo o bontshe kafa temana eo e dirang ka gone. Leka go dira gore ka dinako tsotlhe fa o etela motho yoo a ithute sengwe se sesha mo Lefokong la Modimo. Go ise go ye kae o ka nna wa bo o setse o tshwara thuto ya Baebele!