Bolelang Kgalalelo ya ga Jehofa
1 Mopesalema o ne a bolela jaana: “Opelelang Jehofa, lona lotlhe batho ba lefatshe. . . . Bolelang kgalalelo ya gagwe mo ditšhabeng, ditiro tsa gagwe tse di gakgamatsang mo ditšhabeng tsotlhe.” Fa re tlhatlhanya ka se Jehofa a re diretseng sone, se a re direlang sone le se a sa ntseng a tla re direla sone, dipelo tsa rona di re tlhotlheletsa gore re bolele kgalalelo ya gagwe!—Pes. 96:1, 3.
2 Mo Bodireding Jwa Rona: Basupi ba ga Jehofa ba na le tshiamelo ya go bidiwa ka leina la Modimo le go le baka phatlalatsa mo lefatsheng lotlhe. (Mal. 1:11) Seno se farologana fela thata le se se dirwang ke baruti ba dikereke tse di ipolelang gore ke tsa Bokeresete, ba ka boikgodiso ba ntshang leina la Modimo mo dithanolong tsa bone tsa Baebele! Tiro ya go itsise ba bangwe ka leina la Modimo e potlakile ka gonne batho ba tshwanetse go bitsa leina leo ka tumelo gore ba bolokwe mo pitlaganong e kgolo e e tlang. (Bar. 10:13-15) Mo godimo ga moo, kagiso e e tla nnang teng mo lobopong lotlhe, go akaretsa le kagiso mo gare ga baagi botlhe ba lefatshe, e ikaegile ka go itshepisiwa ga leina la Modimo. Ee ruri, ditiro tsotlhe tsa Modimo di amana le leina la gagwe.
3 “Jehofa o mogolo e bile o tshwanelwa thata ke go bakwa.” Mme gore batho ba kgone go ‘galaletsa leina la ga Jehofa,’ ba tshwanetse go itse boammaaruri ka ene. (Pes. 96:4, 8) Le fa go ntse jalo, go na le bangwe ba ba sa dumeleng gore Modimo o teng. (Pes. 14:1) Bangwe ba mmua bosula ba re ga a na maatla, kgotsa ba re ga a na sepe le batho. Fa re ntse re thusa batho ba ba nang le dipelo tse di ikanyegang gore ba nne le kitso ya boammaaruri ka Mmopi, maikaelelo a gagwe le botho jwa gagwe jo bo kgatlhang, re a bo re galaletsa Jehofa.
4 Ka Boitshwaro Jwa Rona: Jehofa o a tlotlwa fa re tshela tumalanong le melao ya gagwe e e siameng. Ga a tlhokomologe boitshwaro jwa rona jo bo siameng. (1 Pet. 2:12) Ka sekai, fa re le phepa e bile re ipaakantse sentle, seno se ka nna sa dira gore batho bangwe ba re bue bontle e bile se ka nna sa re naya tshono ya go ba bolelela ka melemo ya go tshela ka melaometheo ya Lefoko la Modimo. (1 Tim. 2:9, 10) A bo re itumela jang ne fa batho ba bangwe ba ‘bona ditiro tsa rona tse di molemo ba bo ba galaletsa Rraarona yo o kwa legodimong’!—Math. 5:16.
5 E kete re ka galaletsa Modimo wa rona yo mogolo letsatsi le letsatsi ka mafoko le ka ditiro, ka gonne fa re dira jalo, re a bo re tsaya tsia mokgosi o o reng: “Opelelang Jehofa, bakang leina la gagwe. Bolelang dikgang tse di molemo tsa poloko ya gagwe letsatsi le letsatsi.”—Pes. 96:2.