Bontsha Batho Gore O a Ba Kgatlhegela—Ka go Ela Dilo Tlhoko
1 Jehofa Modimo le Keresete Jesu ba na le bokgoni jwa go lemoga gore batho ba tlhoka eng le go ba thusa. (2 Ditir. 16:9; Mar. 6:34) Fa re lemoga gore batho ba re kopanang le bone mo bodireding ba tshwenyegile ka eng, re ka nna ra kgona go dira gore molaetsa wa rona wa dikgang tse di molemo e nne o o buang ka dilo tseo tse ba amegileng ka tsone.
2 Ela Dilo Tlhoko: Jesu e ne e le motho yo o elang dilo tlhoko. (Mar. 12:41-43; Luke 19:1-6) Ka tsela e e tshwanang, fa re kokota mo ntlong ya motho re bo re bona mekgabisa mengwe ya dilo tsa bodumedi, moano mongwe o kgomareditswe mo koloing kgotsa re bona dilo tse bana ba tshamekang ka tsone, re ka nna ra dirisa dilo tseno go neela bosupi jo bo nang le matswela jwa dikgang tse di molemo.
3 Tebego ya sefatlhego sa motho le tsela e a itshwarang ka yone di ka nna tsa re lemotsha kafa a ikutlwang ka gone. (Dia. 15:13) Gongwe o tlhoka go gomodiwa ka ntlha ya go bo a tlhokafaletswe ke mongwe kgotsa a hutsafaditswe ke sengwe. Motho yoo a ka itumela tota fa re mmalela temana nngwe e e buang ka bothata jwa gagwe. (Dia. 16:24) A mong wa ntlo o itlhaganeletse go ya golo gongwe kgotsa o tshwere ngwana yo o lelang? Fa e le gore go ntse jalo, go ka nna molemo go mo etela mo nakong e e tlang. Go akanyetsa maemo a batho le go ba ‘bontsha gore re ba utlwela botlhoko’ go ka nna ga dira gore ba reetse fa re boa re ba etela gape.—1 Pet. 3:8.
4 Dira Gore Se o Se Buang se Tshwanele Maemo: Moaposetoloi Paulo o ne a ela tlhoko gore motse wa Athena o ne o na le sebeso se e neng e le sa “Modimo O o Sa Itsiweng.” Seno se ne sa ama tsela e a neng a tlile go e dirisa go bolelela batho ba teng dikgang tse di molemo, ka gonne o ne a re: “Se lo se nayang boineelo jwa bomodimo lo sa se itse, ke sone se ke lo bolelelang ka sone.” Tsela e e botlhale e Paulo a neng a buisana le bone ka yone e ne ya dira gore bangwe ba bone ba reetse molaetsa wa Bogosi ba bo ba nne badumedi.—Dit. 17:23, 34.
5 Ka tsela e e tshwanang, fa re ela dilo tlhoko, re tla kgona go lemoga dilo tse motho a ka tswang a tshwenyegile ka tsone mme ka go dira jalo, re tla kgona go dira gore molaetsa wa rona o dumalane le maemo a gagwe. Dirisa dipotso tse di tla dirang gore mong wa ntlo a tlhalose maikutlo a gagwe. Akanya ka ditemana tse o ka di dirisang tse di tla dirang gore a kgatlhege. (Dia. 20:5) Go ela dilo tlhoko le go bontsha batho ba bangwe gore re ba kgatlhegela ka tsela ya mmatota go tla re thusa gore re ba bolelele dikgang tse di molemo ka botswerere.