Solegelwa Molemo ka Botlalo ke Dipokano Tsa Tirelo ya Tshimo
1. Dipokano tsa tirelo ya tshimo di ka re thusa jang?
1 Dipokano tse di rutang tsa tirelo ya tshimo di re kgothatsa tota le go re naya tshedimosetso e e molemo pele ga re ya kwa bodireding. Di re thusa go rera le setlhopha gore re kgone go bereka mmogo le ba bangwe go tshegetsana le go thapisiwa. (Dia. 27:17; Mor. 4:9, 10) Re ka dira eng gore re solegelwe molemo ka botlalo mo dipokanong tseno?
2. Ke dilo dife tse motshwari wa pokano ya tshimo a ka di sekasekang?
2 Motshwari wa Pokano ya Tirelo ya Tshimo: Ga go a rulaganngwa tshedimosetso e e rileng e e tshwanetseng go sekasekiwa go sa le gale mo dipokanong tseno. Ka jalo, o tshwanetse go baakanyetsa sentle fa o tlile go tshwara pokano eno. O se ka wa rulaganya fela go sekaseka temana ya letsatsi ka metlha, le fa gone o ka nna wa tlhopha go e akaretsa mo motlotlong fa e amana le bodiredi. Dira gore pokano eno e rute, mme e se ka ya nna e e raraaneng. Ga go tlhokege gore o boeletse dintlha di le dintsi tse di rutang go tswa mo dikgatisong tse di farologaneng. Kgothaletsa baboledi go dirisa Baebele. Akanya gore o ka thusa jang ba ba neelang bosupi ka letsatsi leo. Ka sekai, o ka tlotla kgotsa wa dira pontsho ka puisano nngwe. O ka nna wa tlhopha go sekaseka ntlha nngwe mo bukeng ya Go Fetolana, buka ya Sekolo sa Bodiredi kgotsa mo puong nngwe mo Pokanong ya bosheng ya Tirelo. Ka dinako tse dingwe, o ka nna wa sekaseka kafa o rarabololang ka gone bothata bongwe jo bo ka tlhagang mo tshimong ya lona kgotsa o ka nna wa tlotla kafa go ka tsosiwang kgatlhego le go simolola dithuto tsa Baebele ka gone, segolobogolo fa baboledi ba le bantsi ba tla bo ba dira maeto a go boela. Le fa o ka tswa o sekaseka eng, nna matlhagatlhaga mme o kgothatse.
3. Pokano ya tirelo ya tshimo e tshwanetse go tsaya nako e kana kang mme go tshwanetse ga dirwa eng ka nako eo?
3 Simolola pokano ya tirelo ya tshimo ka nako, le fa o itse gore bangwe ba tla nna thari. Dira dilo ka botlhale fa o rulaganya ditlhopha mme o abele ba ba tlhokang go bereka tshimo mo ba tla berekang teng. Pokano eno ga e a tshwanela go tsaya metsotso e e fetang 10 go ya go 15 mme e tshwanetse go tsaya nako e khutshwane go feta eo fa e tshwarwa morago ga pokano ya phuthego. Pele o konela pokano, botlhe ba tshwanetse go itse gore ba tlile go bereka le bomang le gore ba tlile go bereka kae. Pokano eno e tshwanetse go konelwa ka thapelo.
4. Ke eng se se tla thusang botlhe go solegelwa molemo ka botlalo mo dipokanong tsa tirelo ya tshimo?
4 Lo ka Thusa: Fela jaaka go ntse ka dipokano tsa phuthego, re bontsha gore re tlotla Jehofa le go akanyetsa ba bangwe ka go fitlha ka nako. Nna le seabe mo motlotlong. O ka nna wa dumela gore motshwari wa pokano ya tshimo a go abele go bereka le mongwe, kgotsa o ka nna wa tlhopha go itirela dithulaganyo pele ga pokano. Fa o batla go itirela dithulaganyo tsa gago, leka go ‘pitlologa’ ka go bereka le baboledi ba ba farologaneng, go na le go bereka le ditsala tsa gago nako le nako. (2 Bakor. 6:11-13) Fa pokano e setse e fedile, tila go fetola dithulaganyo mme lo tsamaye ka bonako go ya tshimong.
5. Boikaelelo jwa dipokano tsa tirelo ya tshimo ke bofe?
5 Boikaelelo jwa dipokano tsa tirelo ya tshimo bo tshwana le jwa dipokano tse dingwe tsa phuthego. Di rulagantswe gore re ‘akanyetsane gore re tlhotlheletsane mo loratong le mo ditirong tse di molemo.’ (Baheb. 10:24, 25) Fa re leka go solegelwa molemo ke dipokano tseno, re tla thusiwa go diragatsa bodiredi jwa rona—‘tiro e e molemo’ eleruri!