Kafa o ka Dirang ka Gone Gore Batho Ba o Ba Tsamaiseditseng Dimakasine ba Nne Dithuto Tsa Baebele
1. Boikaelelo jwa rona ke bofe fa re tsamaisa dimakasine?
1 Gantsi ka Matlhatso re tsamaisa dimakasine tsa Tora ya Tebelo le Tsogang! mo bodireding. Le fa go ntse jalo, seno ke kgato ya ntlha fela ya go fitlhelela mokgele wa rona wa go ruta batho ba ba peloephepa boammaaruri. Go na le dikakantsho dingwe fa tlase fano tsa kafa re ka tsamaisang ka gone buka ya Baebele e Ruta Eng? fa re boela le go simolola thuto ya Baebele. Dikakantsho tseno di ka dirwa gore di tshwanele tshimo ya lona e bile o ka di bua ka mafoko a gago. Ikutlwe o gololesegile go dirisa tsela e nngwe fa e le gore e na le matswela fa o e dirisa.
2. Re ka dirisa jang ditsebe tsa ntlha mo bukeng ya Baebele e Ruta Eng? go simolola thuto ya Baebele?
2 Dirisa Ditsebe Tsa Ntlha: Fa o boela, o ka nna wa re: “Dimakasine tse ke go tlogeletseng tsone di lebisa motho kwa Baebeleng. Ela tlhoko lebaka la go bo go bala Baebele go le botlhokwa thata.” Bala Isaia 48:17, 18; Johane 17:3; kgotsa temana e nngwe e e tshwanelang. Morago ga moo fa o sena go buelela buka ya Baebele e Ruta Eng? le go e neela mong wa ntlo, o ka tswelela jaana:
◼ “Baebele e re naya tsholofelo ya mmatota ka isagwe.” Bontsha mong wa ntlo tsebe 4-5 o bo o mmotsa jaana, “Mo dilong tse re di solofediwang mono ke sefe se o neng o ka rata go bona se diragadiwa?” Bontsha mong wa ntlo kgaolo e e tlotlang ka se Dikwalo di se solofetsang malebana le se a se tlhophileng o bo o sekaseka ka bokhutshwane serapa se le sengwe kgotsa di le pedi fa mong wa ntlo a dumela.
◼ Kgotsa o ka nna wa re, “Baebele e araba bontsi jwa dipotso tse di botlhokwa thata ka botshelo.” Bontsha mong wa ntlo tsebe 6 o bo o mmotsa gore a o kile a ipotsa nngwe ya dipotso tse di kwa tlase mo tsebeng eo. Bula kgaolo e e arabang potso eo o bo o tlotla ka bokhutshwane ka serapa se le sengwe kgotsa di le pedi.
◼ Kgotsa o ka nna wa mmontsha dingwe tsa ditlhogo tsa diteng o bo o mmotsa gore ke setlhogo sefe se se mo kgatlhang. Bula kgaolo eo o bo o mmontsha ka bokhutshwane kafa thuto ya Baebele e tshwarwang ka gone.
3. Re ka simolola jang thuto ya Baebele fa re sena go tsamaisa dimakasine tse di tlotlang ka (a) maemo a lefatshe a a senyegelang pele? (b) lelapa? (c) gore re ka ikanya Baebele?
3 Botsa Potso mo Loetong Lwa Ntlha: Mokgwa o mongwe ke gore mo loetong lwa ntlha o theye motheo wa go dira loeto lwa go boela. Fa mong wa ntlo a sena go amogela dimakasine, botsa potso o bo o mo solofetsa gore o tla e araba mo loetong lwa gago lo lo latelang. Leka go dira dithulaganyo tse di tlhomameng tsa go boela, mme o tlhomamise gore o boela ka yone nako eo. (Math. 5:37) Fa o boela, gakolola mong wa ntlo potso, o bo o bala le go tlotla ka bokhutshwane ka karabo e e tswang mo bukeng ya Baebele e Ruta Eng? Mo neele buka gore a kgone go tsamaisana le wena. Dikai dingwe ke tseno.
◼ Fa makasine o o o tsamaisitseng o tlotla ka maemo a lefatshe a a senyegelang pele, o ka nna wa re, “Mo nakong e e latelang re tla tlotla ka karabo e e tswang mo Baebeleng ya potso eno, Ke diphetogo dife tse Modimo a tla di lereng mo lefatsheng?” Dirisa tsebe 4-5 fa o boela. Kgotsa o ka nna wa botsa potso eno, “A masetlapelo ke thato ya Modimo?” Mo loetong lwa go boela, bontsha mong wa ntlo serapa 7-8 mo kgaolong ya 1.
◼ Fa makasine o o o tsamaisitseng o tlotla ka lelapa, pele ga o tsamaya o ka nna wa botsa potso eno, “Ke eng se leloko lengwe le lengwe la lelapa le ka se dirang go dira gore botshelo jwa lelapa e nne jo bo itumedisang?” Fa o boela tlotla ka serapa 4 mo kgaolong ya 14.
◼ Fa makasine o o o tsamaisitseng o tlotla ka go ikanya Baebele, o ka nna wa botsa potso eno gore lo tle lo tlotle ka yone fa o boela, “A Baebele e boammaaruri fa e bua ka dilo tsa saense?” Mo loetong lwa go boela, sekaseka serapa 8 mo kgaolong ya 2.
4. Re tshwanetse go dira eng fa mong wa ntlo a sa amogele buka ya Baebele e Ruta Eng?
4 Kwa bofelong jwa puisano nngwe le nngwe, botsa potso e nngwe e e tla arabiwang mo loetong lo lo latelang. Fa go setse go simolotswe thuto ya ka metlha, ithuteng buka ka go latelana ga dikgaolo go tloga kwa tshimologong go ya kwa bofelong. Go tweng fa mong wa ntlo a sa amogele buka ya Baebele e Ruta Eng? O sa ntse o ka tswelela o mo tlisetsa dimakasine le go tshwara motlotlo wa Baebele le ene. Fa o ntse o leka go dira gore a kgatlhege, fa nako e ntse e ya a ka amogela thuto ya Baebele.
5. Ke ka ntlha yang fa re tshwanetse go leka go dira se se fetang fela go tlogelela batho dimakasine?
5 Tora ya Tebelo le Tsogang! di ka kgothaletsa motho go ithuta se totatota Baebele e se rutang. Ka jalo, dira boiteko jo bo kgethegileng jwa go simolola thuto ya Baebele le batho ba ba amogelang dimakasine. Ka tsela eno, re tla ikobela taelo ya ga Jesu ya go ‘dira barutwa, re ba rute.’—Math. 28:19, 20.