Mokgele o o Molemolemo wa Ngwaga o Mosha wa Tirelo
1. Ke mokgele ofe o re ka o akanyetsang mo ngwageng o mosha wa tirelo?
1 Re tshwanetse go ipeela mekgele fa re batla go gatela pele semoyeng. O ipeetse mekgele efe mo ngwageng o mosha wa tirelo? Mokgele o o molemolemo ke go tsaya bobulatsela jo bo thusang ka kgwedi e le nngwe kgotsa go feta. E re ka tiro eno e e itumedisang gantsi e batla gore motho a rulaganye dilo go sa le gale, eno ke nako e e siameng ya go simolola go rulaganya. Ke ka ntlha yang fa re tshwanetse go akanyetsa go tsaya bobulatsela jo bo thusang jaaka mokgele?
2. Re na le mabaka afe a go akanyetsa bobulatsela jo bo thusang jaaka mokgele?
2 Mabaka a go Tsaya Bobulatsela jo bo Thusang: Go tsaya bobulatsela jo bo thusang go dira gore re itumedise Rraarona yo o kwa legodimong ka “botlalo segolo” ka go dirisa nako e e oketsegileng mo bodireding. (1 Bathes. 4:1) Fa re ntse re akanyetsa sotlhe se Jehofa a se re diretseng, re tlhotlheletsega go bolelela ba bangwe ka ene. (Pes. 34:1, 2) Jehofa o lemoga le go anaanela dilo tse re di dirang e le gore re dire mo go oketsegileng mo bodireding. (Baheb. 6:10) Go itse gore re itumedisa Jehofa ka tiro e re e dirang ka natla go re itumedisa thata.—1 Ditir. 29:9.
3, 4. Re solegelwa molemo jang ke go tsaya bobulatsela jo bo thusang?
3 Ka tlwaelo, fa o dira sengwe gantsi, go nna motlhofo e bile go itumedisa thata go se dira. Go dirisa nako e e oketsegileng mo bodireding go tla dira gore o itshepe fa o rera ka ntlo le ntlo. O tla nna le bokgoni jwa go simolola motlotlo le go dirisa Baebele. Fa o ntse o tlotla ka tumelo ya gago, e tla nonofa thata. Ba bantsi ba ba neng ba se na thuto ya Baebele e ba e tshwarang ba ile ba simolola go dira jalo fa ba tsere bobulatsela jo bo thusang.
4 Gape go tsaya bobulatsela jo bo thusang go ka go kgothatsa gore o se ka wa dira dilo tsa semoya seomodiro fela. Mokaulengwe mongwe yo e kileng ya bo e le mmulatsela wa ka metlha o ne a lemoga gore o ne a dirisa nako e ntsi mo tirong ya boitshediso mme o ne a swetsa ka gore a tseye bobulatsela jo bo thusang ka kgwedi e le nngwe. A re: “Ke ne ka gakgamadiwa ke gore kgwedi e le nngwe e ne ya ntlhotlheletsa semoyeng! Ke ne ka swetsa ka gore ke tswelele ka bobulatsela jo bo thusang, mme kgabagare ke ne ka nna mmulatsela wa ka metlha gape.”
5. Re ka kgona jang go fenya maikutlo a go inyatsa?
5 Fenya Dikgoreletsi: Bangwe ba okaoka go nna babulatsela ba ba thusang ka gonne ba akanya gore ga ba na bokgoni jaaka bareri. Fa o akanya gore o ka se tseye bobulatsela jo bo thusang ka ntlha ya seno, Jehofa a ka go thusa fela jaaka a ile a thusa Jeremia. (Jer. 1:6-10) Le fa Moshe a ne a le “molomo o bonya le loleme lo bonya,” Jehofa o ne a mo dirisa go dira thato ya gagwe. (Ekes. 4:10-12) Fa o ikutlwa o inyatsa, kopa Jehofa gore a go neye bopelokgale.
6. Go ka kgonega jang go tsaya bobulatsela jo bo thusang le fa o na le mathata a botsogo kgotsa tiro e ntsi?
6 A o okaoka go tsaya bobulatsela jo bo thusang ka ntlha ya mathata a botsogo kgotsa tiro e ntsi? Fa o le bokoa, go bereka ka tsela e o e kgonang go ka dira gore o kgone go tsaya bobulatsela jo bo thusang. Fa o na le tiro e ntsi, gongwe o ka rulaganya gore o dire ditiro tse di seng botlhokwa thata mo kgweding e nngwe. Bangwe ba ba nang le tiro ya letsatsi lotlhe ba ile ba kgona go reka nako ya go nna babulatsela ba ba thusang ka go tsaya letsatsi le le lengwe kgotsa a mabedi a boikhutso.—Bakol. 4:5.
7. Ke ka ntlha yang fa go le molemo go rapelela kgang ya go tsaya bobulatsela jo bo thusang?
7 Kafa o ka Dirang ka Gone: Rapela ka kgang ya gore o batla go tsaya bobulatsela jo bo thusang. Kopa Jehofa gore a segofatse maiteko a gago a go atolosa bodiredi jwa gago. (Bar. 12:11, 12) A ka go thusa go dira ditshwetso tse di botlhale malebana le kafa o ka fetolang thulaganyo ya gago ka gone. (Jak. 1:5) Fa o se na keletso ya go bula tsela, kopa Jehofa gore a go thuse go itumelela tiro ya go rera.—Luke 10:1, 17.
8. Go dirisa Diane 15:22 go ka go thusa jang go tsaya bobulatsela jo bo thusang?
8 Tlotlang jaaka lelapa ka mokgele wa go tsaya bobulatsela jo bo thusang. (Dia. 15:22) Gongwe leloko le le lengwe la lelapa le ka tsaya bobulatsela jo bo thusang ka go thusiwa ke maloko a mangwe mo lelapeng. Tlotla le ba bangwe mo phuthegong gore o eletsa go bula tsela, segolobogolo ba ba nang le maemo a a tshwanang le a gago. Seno se ka dira gore o tlhagafalele go tsaya bobulatsela jo bo thusang.
9. Ke dikgwedi dife tse o ka di tlhophang go tsaya bobulatsela jo bo thusang?
9 Fa o ntse o sekaseka thulaganyo ya gago ya bodiredi ya ngwaga o mosha wa tirelo, o akanya gore o ka tsaya bobulatsela jo bo thusang leng? Fa o bereka letsatsi lotlhe kgotsa o tsena sekolo, o ka nna wa rata go akanyetsa dikgwedi tse di nang le malatsi a boikhutso kgotsa tse di nang le boMatlhatso ba le batlhano kgotsa boSontaga ba le batlhano. Ka sekai, September, December, March, le August di na le mafelobeke a le matlhano a a tletseng. Kgwedi ya May e na le boMatlhatso ba le batlhano mme June e na le boSontaga ba le batlhano. Fa o na le mathata a botsogo, akanyetsa dikgwedi tse gantsi di nang le maemo a a siameng a bosa. Gape o ka nna wa akanyetsa go bula tsela ka kgwedi e molebedi wa potologo a tlileng go etela phuthego ya lona ka yone. Ka nako ya loeto lwa gagwe, o tla nna le tshiamelo e nngwe ya go nna gone mo karolong ya ntlha ya pokano e e tla tshwarwang le babulatsela ba ka metlha. E re ka Segopotso se tla nna ka March 22 ngwaga o o tlang, March, April le May ke dikgwedi tse di siameng tsa go bula tsela. Fa o setse o tlhophile kgwedi kgotsa dikgwedi tse o batlang go tsaya bobulatsela jo bo thusang ka tsone, simolola go kwala thulaganyo e e tla dirang gore o kgone go fitlhelela diura tse di tlhokegang.
10. O ka dira eng fa o sa kgone go tsaya bobulatsela jo bo thusang?
10 Tota le fa o akanya gore o ka se kgone go tsaya bobulatsela jo bo thusang mo ngwageng o o tlang wa tirelo, o sa ntse o ka nna le moya wa bobulatsela. Tswelela pele o dira sotlhe se o ka se kgonang mo bodireding, o tlhomamisegile gore Jehofa o itumelela go dira ga gago ka bojotlhe mo tirelong ya gagwe. (Bagal. 6:4) Tshegetsa le go kgothatsa ba ba kgonang go tsaya bobulatsela jo bo thusang. Gongwe o ka fetola thulaganyo ya gago gore o bereke le ba ba tsereng bobulatsela mo bodireding ka letsatsi lengwe mo gare ga beke.
11. Ke ka ntlha yang fa re tshwanetse go leba dinako e le tse di potlakileng?
11 Batho ba ga Jehofa ba itse gore dinako di potlakile. Go na le tiro e e tshwanetseng go dirwa—go rera dikgang tse di molemo. Matshelo a batho a mo kotsing, mme nako e e setseng e khutshwafetse. (1 Bakor. 7:29-31) Go rata Modimo le moagelani go tla re tlhotlheletsa go dira sotlhe se re ka se kgonang mo bodireding. Fa re iteka le go rulaganya dilo sentle, re ka kgona go tsaya bobulatsela jo bo thusang ka kgwedi e le nngwe mo ngwageng o mosha wa tirelo—e leng mokgele o o molemolemo eleruri!