Lebokoso la Dipotso

◼ Ke dikgatiso dife tse pedi tse di tshwanetseng go ithutiwa le batho ba ba kgatlhegang?

Buka ya Baebele e Ruta Eng? ke yone buka ya konokono e re e dirisang go simolola le go tshwara dithuto tsa magae tsa Baebele. Le fa go se molato go dirisa kgatiso e sele, e e jaaka pampitshana e e tshwanelang go simolola thuto, dira maiteko a gore lo fetele ka bonako jo bo kgonegang mo bukeng ya Baebele e Ruta Eng? Go nnile le matswela a a itumedisang fa go dirisiwa buka ya Baebele e Ruta Eng? go simolola dithuto.

Fa lo feditse go bala buka ya Baebele e Ruta Eng? mme moithuti a gatela pele lo ka ithuta buka ya Obamela Modimo. (Bakol. 2:7) Tsebe ya 2 ya buka eo e tlhalosa maikaelelo a yone jaana: “Baebele e rotloetsa botlhe ba ba ratang Modimo gore ba ‘tshware ka . . . mogopolo se e leng bogodimo le boteng’ jwa boammaaruri jwa gagwe jo bo tlhwatlhwakgolo. (Baefeso 3:18) Buka eno e baakanyeditswe sone seo. Re solofela gore e tla go thusa go gola semoyeng, le gore o tlhomelelwe sentle go tsamaya mo tseleng e tshesane e e isang kwa botshelong mo lefatsheng le lesha la Modimo la tshiamo.”

Fa moithuti a tshwanelega go ka kolobediwa pele a fetsa go ithuta dibuka tseno ka bobedi, thuto e tshwanetse go tswelela pele go fitlha a fetsa go bala buka ya bobedi. Le fa moithuti a setse a kolobeditswe motshwari wa thuto a ka bega nako, loeto la go boela le thuto ya legae ya Baebele. Mmoledi yo o tsamayang le motshwari wa thuto mme a nna le seabe mo thutong le ene a ka bega nako eo.