A o Ipaakanyeditse go Rera Le fa O se Mo Bodireding?
1. Ke sekai sefe se se bontshang gore go rera le fa o se mo bodireding go ka nna le matswela a a molemo?
1 Go rera le fa o se mo bodireding go ka nna le matswela thata. Baebele e na le dikai tse dintsi tsa batho ba ba ileng ba rera ba se mo bodireding mme ba nna le matswela a a molemo. (Joh. 4:7-15) Re ka dira eng gore re ipaakanyetse go rera ka mokgwa ono?
2. Go apara le go ipaakanya sentle go ka re thusa jang gore re kgone go neela bosupi?
2 Moaparo le go Ipaakanya: Go tlhokomela tsela e re aparang le go ipaakanya ka yone ka dinako tsotlhe go tla re thusa gore re kgone go bolelela ba bangwe ka tumelo ya rona re gololesegile. (1 Tim. 2:9, 10) Fa re akanya gore tsela e re apereng ka yone ga e a siama, go ka direga gore re ikgogone gore re se ka ra rera. Mme go farologana le moo, moaparo o o bothakga le o o phepa o ka dira gore batho ba ipotse dipotso. Ka sekai, banyalani bangwe ba Basupi ba ba neng ba apere sentle ba ne ba le mo loetong mme ba ntse gaufi le monna mongwe wa Momoseleme. E re ka monna yoo a ne a etse tlhoko tsela e ba neng ba apere ka yone o ne a ba botsa gore a ke Bakeresete. Seno se ne sa felela ka gore ba nne le motlotlo wa Baebele wa diura di le tharo.
3. O ile wa simolola jang motlotlo ka go latela sekao sa ga Jesu?
3 Go Simolola Metlotlo: Fa Jesu a ne a kopana le mosadi wa Mosamarea kwa sedibeng sa ga Jakobe, o ne a simolola motlotlo ka go kopa fela gore a mo nose metsi. Ka tsela e e tshwanang, re ka kgona go simolola motlotlo ka go bua sengwe se sekhutshwane kgotsa ka go botsa potso fela e e sa raraanang. Le fa ka dinako dingwe re ka okaoka, fa re ikaega ka thuso ya ga Jehofa re tla ‘nna le bopelokgale’ jwa go simolola motlotlo.—1 Bathes. 2:2.
4. Re ka ipaakanyetsa jang go neela bosupi re se mo bodireding?
4 Go Batla Ditsela: Baboledi ba le bantsi ba ile ba bona ditsela tsa go rera le fa ba se mo bodireding. Sekaseka maemo a gago mme o bo o akanya ka batho ba go ka diregang gore o kopane le bone letsatsi le letsatsi. Tsamaya o tshotse dikgatiso tse di tshwanetseng le Baebele e nnye. Nna kelotlhoko, mme o kgatlhegele batho ba ba go dikologileng. Fa o setse o akantse ka ditshono tse o ka nnang le tsone mo letsatsing, gongwe o ka ipaakanyetsa go neela bosupi jo bo molemo.—Bafil. 1:12-14; 1 Pet. 3:15.
5. Ke eng fa re tshwanetse go rulaganyetsa go rera re se mo bodireding?
5 Re na le mabaka a mabedi a go dirisa ditshono tsa go rera re se mo bodireding—lorato lo re ratang Modimo ka lone le lo re ratang baagelani ba rona ka lone. (Math. 22:37-39) E re ka tiro ya go rera e potlakile, re tshwanetse go rulaganyetsa go rera re se mo bodireding. Re tshwanetse go ipaakanyetsa go dirisa tshono nngwe le nngwe e re ka nnang le yone gore re rerele ba bangwe dikgang tse di molemo tsa Bogosi fa go sa ntse go na le nako.—Bar. 10:13, 14; 2 Tim. 4:2.