Boroutšhara jo Bosha jo bo Tla Tsamaisiwang!
1. Re tla tsamaisa eng ka November mme boikaelelo jwa kgatiso eno ke bofe?
1 Kwa Kopanong ya Kgaolo ya rona ya “Nnang lo Disitse!” ka 2009 go ile ga gololwa boroutšhara jwa setlhogo se se reng Baebele—E na Le Molaetsa Ofe? Ka November diphuthego tsotlhe go ralala lefatshe di tla tsamaisa boroutšhara jono lekgetlho la ntlha. Kgatiso eno e tla solegela batho molemo jang mo tshimong ya rona? Batho ba le bantsi, segolobogolo ba ba seng mo madumeding a Bokeresete, ga ba itse go le kalo ka Baebele. Ka jalo, mo tsebeng 3, boroutšhara jono bo tlhalosa gore bo diretswe go go thusa “go tlhaloganya se o tlhokang go se itse ka Baebele.”
2. Re ka tsamaisa jang boroutšhara jono?
2 Ditsela Tsa go bo Tsamaisa: Re ka bua sengwe se se jaaka seno: “Re ka rata go utlwa gore o akanya eng ka seno. [Bala 2 Timotheo 3:16.] Batho ba le bantsi ba re kopanang le bone ba dumalana le mafoko ano; ba bangwe ba akanya gore Baebele ke buka fela e e molemo. Wena o akanya eng ka Baebele? [Mo letle gore a arabe.] Le fa re ka tswa re dumela eng, go na le mabaka a a utlwalang a go bo re tshwanetse go sekaseka Baebele ka borona. [Bala serapa se se kwa godimo mo tsebe 3.] Fa o ntse o bala tshobokanyo e e kgatlhang ya Baebele e e mo boroutšhareng jono, o tla bona sengwe se se kgatlhang: Baebele e na le setlhogo se le sengwe le molaetsa o le mongwe.”
3. Ke puisano efe e nngwe e re ka e dirisang, segolobogolo mo tshimong e batho ba le bantsi e seng ba madumedi a Bokeresete?
3 Tsela e nngwe e re ka bo tsamaisang ka yone ke eno, segolobogolo fa re rera mo mafelong a go nang le batho ba madumedi a e seng a Bokeresete: “Re ka rata go utlwa gore o ikutlwa jang ka se se tlhalosiwang mo Dikwalong (kgotsa buka eno e e boitshepo). [Bala Pesalema 37:11.] O akanya gore lefatshe le tla nna jang fa boporofeti jono bo setse bo diragaditswe? [Mo letle gore a arabe.] Seno ke sekai sa tsholofelo le kgomotso e batho ba ditso tsotlhe le ditumelo tsotlhe ba ka e amogelang go tswa mo Baebeleng.” Bala serapa se se kwa godimo mo tsebe 3 mme o bo o tsamaisa boroutšhara.
4. Re ka dirisa jang boroutšhara jono go simolola thuto ya Baebele?
4 Simolola Thuto ya Baebele: Fa re boela re ka gopotsa mong wa ntlo ka se re tlotlileng ka sone mo nakong e e fetileng mme re bo re tlotla ka serapa se le sengwe kgotsa di le pedi tse di buang ka se re tlotlileng ka sone, re dirisa dipotso tse di kwa bofelong jwa karolo e re e tlhophileng. Kgotsa fa re batla go buelela buka ya Baebele e Ruta Eng? ka tlhamalalo, re ka bala le ene tsebe e e ka fa morago ya boroutšhara mme re bo re mo naya buka, go tswa foo re bo re mmotsa gore ke setlhogo sefe se a se kgatlhegelang mme re bo re tlotla ka serapa se le sengwe kgotsa di le pedi tsa kgaolo eo. E kete rotlhe re ka nna le seabe ka botlalo go tsamaisa boroutšhara jono ka November!