Dikopano Tsa Rona Tsa Kgaolo—Bosupi jo bo Maatla Jwa Boammaaruri
1. Meletlo e Baiseraele ba neng ba nna le yone mo ngwageng e ne e ba bulela ditshono dife tsa go tlhatlhanya le go tlotla ka boammaaruri jwa botlhokwa jwa dilo tsa semoya?
1 Baiseraele ba bogologolo ba ne ba kopana gararo mo ngwageng go tshwara meletlo ya ngwaga le ngwaga. Le fa go ne go tshwanetse go ya banna fela, gantsi malapa otlhe a ne a tsaya loeto go ya Jerusalema go ya go ipelela dikopano tseno tse di itumedisang. (Dute. 16:15, 16) Ditiragalo tseno di ne di bula tshono ya go tlhatlhanya le go tlotla ka dilo tsa botlhokwa tsa semoya tsa boammaaruri. Bongwe jwa boammaaruri joo ke bofe? Bongwe jwa jone ke gore Jehofa ke motlamedi yo o pelotshweu le yo o lorato. (Dute. 15:4, 5) Se sengwe gape ke gore go ka lebiwa kwa go ene go bona kgakololo le tshireletso. (Dute. 32:9, 10) Gape Baiseraele ba ne ba ka tlhatlhanya ka ntlha ya botlhokwa ya gore e re ka e le batho ba ba bidiwang ka leina la ga Jehofa, ba tshwanetse go bontsha tshiamo ya gagwe mo tseleng ya bone ya botshelo. (Dute. 7:6, 11) Le rona gompieno kopano ya kgaolo e re solegela molemo ka tsela e e tshwanang.
2. Thulaganyo ya kopano ya kgaolo e tla re thusa jang go tlhaloganya boammaaruri botoka?
2 Thulaganyo E e Re Thusang go Tlhaloganya Boammaaruri Botoka: Kwa dikopanong tsa rona tsa kgaolo, re itumelela dipuo, diterama, dipontsho le dipotsolotso tse di nayang lesedi ka boammaaruri jwa botlhokwa jwa Baebele. (Joh. 17:17) Go setse go dirilwe tiro e ntsi malebana le kopano e e tlang. Mokgatlho wa ga Jehofa o rulagantse thulaganyo e e rulaganyeditsweng go bua ka dilo tse di tlhokegang mo tshimong ya lefatshe lotlhe. (Math. 24:45-47) A o swegaswega go bona le go utlwa gore go tlile go buiwa ka eng?
3. Ke eng se re tshwanetseng gore re se dire gore re solegelwe molemo ke thulaganyo?
3 Boammaaruri ke gore re tla solegelwa molemo thata fa re ka nna gone le go tlhoma mogopolo ka malatsi ao a mararo. Fa o ise o dire jalo, bua le mothapi wa gago ka go tsaya malatsi kwa tirong. Dira dithulaganyo tsa go bona nako e e lekaneng ya go ikhutsa bosigo bongwe le bongwe gore o kgone go nna o tsogile ka nako ya thulaganyo. Ba le bantsi ba lemogile gore go leba sebui le go tsaya dintlha tse di khutshwane go ba thusa go nna ba tlhwaile tsebe. O se ka wa letlelela selula ya gago kgotsa pager go itaya ba bangwe tsebe. Tila go bua, go romela melaetsa, go ja, kgotsa go nwa ka nako ya lenaneo.
4. Batsadi ba ka thusa jang bana ba bone gore ba solegelwe molemo kwa kopanong?
4 Mo dingwageng tsa Sabata, fa malapa a Baiseraele a ne a kopane mmogo go tla go utlwa molao o o neng o balwa mo Modirong wa Diobo, ba ne ba na le bana “ba bannye” ba bone “gore ba reetse le gore ba ithute.” (Dute. 31:12) Ruri go a kgothatsa go bona malapa a ntse mmogo ka nako ya kopano le bana ba tsogile e bile ba reeditse ka tlhoafalo! Leba ditlha tsa gago maitseboa mangwe le mangwe le go tlotla mmogo ka dintlha tsa thulaganyo tse segolobogolo o ileng wa di itumelela. “Boeleele bo bofeletswe mo pelong ya mosimane,” ka jalo, batsadi ba dira sentle fa ba laola bana ba bone go akaretsa le ba ba leng mo dingwageng tsa bolesome ka nako ya dijo tsa motshegare le fa ba le kwa dihoteleng, go na le go ba ‘tlogelela fela.’—Dia. 22:15; 29:15.
5. Boitshwaro jwa rona jo bo molemo bo ka kgabisa jang boammaaruri fa re le kwa dihoteleng?
5 Boitshwaro Jwa Rona jo bo Molemo bo Kgabisa Boammaaruri: Boitshwaro jwa rona jo bo molemo fa re le mo kopanong bo kgabisa boammaaruri. (Tito 2:10) Badiri ba dihotele ba kgona go lemoga fa setlhopha sa batho se ikobela melao ya hotele le go bontsha bopelotelele le go nna pelontle mo badiring. (Bakol. 4:6) Fa baemedi ba lekala ba ne ba buisana le motsamaisi wa hotele nngwe ngogola, o ne a ba bolelela jaana: “Re rata gore batho ba lona ba nne ba tla mo hoteleng ya rona ka ntlha ya bomolemo jwa bone. Ba itshwere sentle e bile ba pelonomi, mme ka metlha ba tlotla badiri le lefelo la rona.”
6. Re ka kgabisa jang boammaaruri ka tsela e re aparang ka yone fa re le mo lefelong la kopano?
6 Go tsenya dibetšhe tsa kopano ga go bontshe fela gore re na le kopano e bile ga go dire fela gore bakaulengwe ba bangwe ba re lemoge mme gape go naya batho ba ba re lebileng bosupi. Batho ba ba nnang mo lefelong le kopano e tshwaretsweng mo go lone ba tla bona gore batho ba ba tsentseng dibetšhe ba apere sentle le ka boingotlo, e seng ka tsela e e tlhakatlhakaneng le e e kgopisang e e tlwaelegileng mo lefatsheng. (1 Tim. 2:9, 10) Ka jalo, re tshwanetse go ela tlhoko tsela e re ipaakanyang le go apara ka yone fa re le mo lefelong la kopano, go akaretsa le fa re tsena kwa dihoteleng. Go goroga re apere marokgwe a makhutshwane le dikipa ga go na seriti. Le fa kopano e le mo setediamong se se bulegileng, tsela e re aparang ka yone e tshwanetse go nna le seriti. Fa e le gore re tlhopha go fetola diaparo morago ga thulaganyo e le gore re ye kwa resetšhurenteng, re tshwanetse go gakologelwa gore re sa ntse re le batlakopanong, ka jalo ga re a tshwanela go apara ka tsela e e botlhaswa.
7. Tsela e nngwe e re ka itumelelang kutlwano ya Bokeresete ka nako ya kopano ke efe?
7 Mo meletlong ya ngwaga le ngwaga, Baiseraele ba ne ba ipelela botsalano jo bo agang le baobamedimmogo go tswa kwa dikarolong tsa naga le lefatshe mme seno se ne se dira gore go nne le kutlwano. (Dit. 2:1, 5) Mo dikopanong tsa rona tsa kgaolo, bokaulengwe jwa rona jo bo tlhomologileng jwa Bokeresete bo bonadiwa ka botlalo. Gantsi karolo eno e e itumedisang ya paradaise ya rona ya semoya e kgatlha batho ba ba re lebileng. (Pes. 133:1) Go na le go tswa mo lefelong la kopano ka nako ya dijo tsa motshegare re ya go reka dijo, go ka nna molemo thata fa re ka itlela ka dijo tse di motlhoswana tsa motshegare mme re dirise nako eo go kopana le go tlotla le bakaulengwe le bokgaitsadi ba ba ntseng gaufi le rona!
8. Ke mabaka afe a a leng teng a go ithaopela go dira fa maemo a rona a re letla?
8 Gantsi batho ba ba re lebileng ba kgatlhiwa ke tsela e dikopano tsa rona di rulaganeng sentle ka yone, segolobogolo fa ba lemoga gore tiro yotlhe e dirilwe ke baithaopi. A o ka kgona go “ithaopa ka go rata” go dira tiro nngwe kwa kopanong? (Pes. 110:3) Gantsi ba lelapa botlhe ba ithaopela go dira tiro nngwe e le tsela ya go thapisa bana ba bone go thusa ba bangwe. Fa e le gore o ditlhong, go dira kwa kopanong ke tsela e e molemo ya go kopana le batlakopanong ba bangwe. Kgaitsadi mongwe o ne a re: “Ke ne ke sa itse ope kwa kopanong ntle le ba lelapa la me le ditsala. Mme fa ke ne ke thusa ka go phepafatsa ke ne ka kopana le bakaulengwe le bokgaitsadi ba bantsi. Go ne go itumedisa tota!” Go pitlologa ka go thusa kwa kopanong go lere boipelo jo bogolo. (2 Bakor. 6:12, 13) Fa e le gore ga o ise o tsamaye o ithaope, botsa bagolwane gore o ka dira jang gore o tshwanelegele go thusa.
9. Re tlile go laletsa batho ba bangwe jang go tla kopanong?
9 Laletsa Batho ba ba Bangwe go Utlwa Boammaaruri: Dibeke di le tharo pele kopano ya rona e simolola, jaaka mo dingwageng tse di fetileng, re tlile go nna le letsholo la go laletsa batho go tla kopanong. Diphuthego di ka rata go dira tshimo ya tsone yotlhe kafa di ka kgonang ka teng di laletsa batho. (Bona lebokoso “Re Tlile go Tsamaisa Dipampitshana Tsa Taletso Jang?”) Dipampitshana dipe fela tsa taletso tse di setseng di tshwanetse go isiwa kwa kopanong. Dipampitshana tseno di tlile go dirisiwa ke batlakopanong go neela bosupi ba se mo bodireding mo lefelong la kopano.
10. Anela maitemogelo a a bontshang gore letsholo la rona la ngwaga le ngwaga la go tsamaisa ditaletso le nna le matswela.
10 Batho ba arabela jang mo letsholo leno la ngwaga le ngwaga? Kwa kopanong nngwe, motlhokomedi o ne a thusa banyalani go bona manno. Ba ne ba mmolelela gore ba amogetse taletso mme e ne “ya ba kgatlha.” Ba ne ba kgweetsa sekgala sa dikilometara di le 320 gore ba nne teng! Mo maemong a mangwe, kgaitsadi yo o neng a rera ka ntlo le ntlo, o ne a naya monna mongwe taletso yo o neng a na le dipotso ka kopano. Ka jalo, o ne a ipha nako ya go tlotla le ene ka taletso. Malatsi a le mmalwa moragonyana fa kgaitsadi a le kwa kopanong, o ne a bona monna yoo le tsala ya gagwe ba tshwere nngwe ya dikgatiso tse di sa tswang go gololwa!
11. Ke ka ntlha yang fa go le botlhokwa go nna gone kwa dikopanong tsa rona tsa ngwaga le ngwaga tsa kgaolo?
11 Meletlo ya ngwaga le ngwaga e ne le thulaganyo e e lorato e e tswang kwa go Jehofa ya go thusa Baiseraele gore ba mo “direle ka go tlhoka molato le ka boammaaruri.” (Josh. 24:14) Ka tsela e e tshwanang go nna gone ga rona kwa dikopanong tsa kgaolo ngwaga le ngwaga go re thusa go “tsamaya mo boammaaruring” e bile ke karolo e e botlhokwa ya kobamelo ya rona. (3 Joh. 3) E kete Jehofa a ka segofatsa maiteko a batho botlhe ba ba ratang boammaaruri gore ba nne gone le go solegelwa molemo ka botlalo!
[Mafoko a setshwantsho mo go tsebe 3]
Boitshwaro jwa rona jo bo molemo fa re le mo lefelong la kopano bo kgabisa boammaaruri
[Mafoko a setshwantsho mo go tsebe 4]
Dibeke di le tharo pele kopano ya rona e simolola, re tlile go nna le letsholo la go laletsa batho go tla kopanong
[Lebokose mo go tsebe 5]
Dikgakololo Tsa Kopano ya Kgaolo ya 2012
◼ Dinako Tsa Thulaganyo: Thulaganyo e tla simolola ka 9:00 a.m. mo malatsing otlhe a le mararo. Dikgoro di tla bulwa ka 7:00 a.m. Fa go itsisiwe mmino o o simololang thulaganyo, rotlhe re tshwanetse go nna fa fatshe gore thulaganyo e tle e simolole ka mokgwa o o nang le seriti. Thulaganyo e tla konela ka 4:35 p.m. ka Labotlhano le ka Matlhatso mme ka Sontaga e tla konela ka 3:20 p.m.
◼ Mafelo a go Phaka Dikoloi: Mo mafelong otlhe a kopano a re tla bong re neilwe tetla ya go laola lefelo la go phaka dikoloi, dikoloi di tla phaka mo go lone kwantle ga tuelo mme ba ba tlang go sa le gale ke bone ba ba tla kgonang go phaka mo go lone. E re ka gantsi mafelo a go phaka dikoloi a tla bo a se mantsi, re tshwanetse go leka thata go tsamaya mmogo mo dikoloing.
◼ Marobalo: Diforomo tsa Special Needs Room Request (CO-5) di gone fa baboledi ba ba batlang go kopa marobalo ba di batla. Komiti ya Tirelo ya Phuthego e tshwanetse go sekaseka gore a baboledi ba a tshwanelega, e dirisa dikaelo tse di mo foromong eno le tse di mo lekwalong la December 14, 2010, le le kwaletsweng ditlhopha tsotlhe tsa bagolwane. Thulaganyo eno e diretswe fela baboledi ba ba nang le boemo jo bo siameng mo phuthegong le bana ba bone ba ba maitseo.
◼ Go Boloka Manno: O ka bolokela fela batho ba o tsamayang le bone ka koloi manno kgotsa ba o nnang le bone mo ntlong e le nngwe kgotsa le ba gone jaanong o ithutang Baebele le bone.—1 Bakor. 13:5.
◼ Dijo Tsa Motshegare: Tsweetswee itleleng ka dijo go na le go tswa mo lefelong la kopano go ya go di reka ka nako ya boikhutso. Lo ka nna lwa dirisa khulara e nnye e lo ka kgonang go e baya ka fa tlase ga setulo. Dikhulara tse dikgolo tse di dirisediwang dipikiniki di tshwanetse go bewa mo lefelong le batlhokomedi ba lo kaeleng gore lo di beye gone. Dilwana tsa galase le bojalwa ga di a letlelelwa mo lefelong la kopano.
◼ Meneelo: Re ka bontsha gore re anaanela go bo re baakanyeditswe kopano ka go ntshetsa tiro ya lefatshe lotlhe meneelo ka go rata kwa Holong ya rona ya Bogosi kgotsa kwa kopanong. Fa e le gore lo ka rata go ntsha moneelo ka tšheke, dirang dituelo go “Christian Congregation of Jehovah’s Witnesses of South Africa.” Mo dikopanong di le mmalwa go tla amogelwa meneelo ya dikarata tsa debit/credit mo godimo ga meneelo ya madi le ya ditšheke.
◼ Dikotsi le Maemo a Tshoganyetso: Fa go tlhaga maemo mangwe a tshoganyetso mo lefelong la kopano, tsweetswee bolelela motlhokomedi yo a leng gaufi mme ene o tla bolelela Lephata la Thuso ya Potlako ka bonako gore badiri ba rona ba ba tshwanelegang ba ba dirang mo lephateng leo ba sekaseke boemo go bona gore bo masisi go le kana kang le gore ba thuse.
◼ Melemo: Fa e le gore o tlhoka melemo e o e fiwang ke ngaka, tsweetswee tlhomamisa gore o tla ka e e lekaneng, e re ka go tla bo go se na epe kwa kopanong. Mamao a bolwetse jwa Diabetes le dinnale di tshwanetse go latlhelwa sentle mo metemeng ya matlakala ya dilo tse di kotsi mme e eseng mo metemeng e e mo mabaleng a kopano le mo dihoteleng
◼ Ditlhako: Ngwaga le ngwaga go nna le dikgobalo di le mmalwa tse di bakwang ke ditlhako tse re di rwalang. Go botoka go tlhopha ditlhako tse di bori, tse di go lekanang sentle tse di ka go letlang go tsamaya ka pabalesego mo ditepising, mo diforeiming tsa tshipi tse di fa fatshe, jalo le jalo.
◼ Diporema Tsa Bana: Diporema tsa bana ga di a tshwanela go tsenngwa mo holong ya kopano. Le fa go ntse jalo, ditulo tsa masea tse di ka lekanang mo setulong se se fa thoko ga tsa batsadi di a amogelesega.
◼ Dinkgisamonate: Dikopano di le dintsi tsa kgaolo di tshwarelwa mo mafelong a a tswalegileng a go sa tseneng moya mo go one. Ka jalo, re tla bo re bontsha lorato fa re ka fokotsa dinkgisamonate tse di nang le monko o o bogale tse di ka bakelang batho mathata a go hema le a mangwe a a amanang le gone.—1 Bakor. 10:24.
◼ Diforomo Tsa Tsweetswee Boela (S-43): Re tshwanetse go dirisa diforomo tsa Tsweetswee Boela (S-43) go kwala tshedimosetso malebana le ope fela yo o bontshang kgatlhego fa re rera re se mo bodireding ka nako ya kopano. Baboledi ba tshwanetse go tla ka foromo eno e le nngwe kgotsa di le pedi kwa kopanong. Diforomo tse di tladitsweng di ka isiwa kwa Lephateng la Dibuka kgotsa o ka di naya mokwaledi wa phuthego ya lona fa o boela kwa phuthegong ya lona.—Bona Tirelo ya Rona ya Bogosi ya May 2011 ts. 3.
◼ Diresetšhurente: Bontsha gore o tlotla leina la ga Jehofa ka go itshwara sentle kwa diresetšhurenteng. Go tlwaelegile gore motho a tlogele madinyana a tebogo a diperesente di le 10 go ya go 15.
◼ Tirelo ya Boithaopo: Ope fela yo o batlang o ithaopa o tshwanetse go ya kwa Lephateng la Tirelo ya Boithaopo kwa kopanong. Bana ba ba kafa tlase ga dingwaga di le 16 le bone ba ka nna le seabe se segolo ka go bereka kafa tlase ga kaelo ya motsadi kgotsa motlhokomedi kgotsa mongwe yo o godileng yo batsadi ba mo kopileng.
◼ Dipina: Diphuthego di ka nna tsa rata go ikatisetsa go sa le gale dipina tse di tla dirisiwang kwa kopanong. Dipina tsa Labotlhano: 52, 57, 113, 106, 116 le 98. Dipina tsa Matlhatso: 96, 68, 58, 67, 95 le 89. Dipina tsa Sontaga: 110, 61, 134, 73, 36 le 49.
[Lebokose mo go tsebe 4]
Re Tlile go Tsamaisa Dipampitshana Tsa Taletso Jang?
E le gore re dire tshimo ya rona yotlhe, re ka nna ra tshwanelwa ke go bua ka bokhutshwane. O ka nna wa re: “Dumela. Re laletsa batho mo lefatsheng lotlhe ka go ba naya taletso eno. Khopi ya gago ke eno. O tla bona dintlha tse di oketsegileng mo taletsong.” Nna matlhagatlhaga. Fa o tsamaisa ditaletso ka mafelobeke, gape o tshwanetse go tsamaisa dimakasine fa go tshwanela.