Tsayang Baporofeti e le Sekao—Joele
1. Re ka etsa boikokobetso jwa ga Joele jang fa re rera?
1 Moporofeti Joele e ne e le mang? O senola fela gore e ne e le “morwa Pethuele.” (Joele 1:1) Moporofeti yo o boikokobetso yono o bua thata ka molaetsa wa ga Jehofa, e seng ka seabe sa gagwe sa go nna morongwa. Ka tsela e e tshwanang, go na le go batla go newa tlotlo kgotsa go tuma fa re le mo bodireding, re bua thata ka Jehofa le ka Baebele. (1 Bakor. 9:16; 2 Bakor. 3:5) Mo godimo ga moo, molaetsa o re o bolelelang batho o a re nonotsha. Ke dikarolo dife tsa boporofeti jwa ga Joele tse di dirang gore re nne le tlhoafalo le tsholofelo gompieno?
2. Go nna gaufi ga letsatsi la ga Jehofa go tshwanetse ga re tlhotlheletsa go dira eng?
2 “Letsatsi la ga Jehofa le Gaufi.” (Joele 1:15): Le fa mafoko ano a ile a kwalwa dingwaga di le dikete tse di fetileng, re tshela mo metlheng ya go diragadiwa ga bofelo ga mafoko ao. Maemo a lefatshe a a ntseng a senyegela pele, go tsaya dilo motlhofo ga batho le kgobo e re lebanang le yone mo tshimong ya rona ke bosupi jo bo bonalang sentle jwa gore metlha ya bofelo ya tsamaiso eno ya dilo e gorogile. (2 Tim. 3:1-5; 2 Pet. 3:3, 4) Fa re akanya kafa bokhutlo bo leng gaufi ka teng, re na le mabaka a go dira gore bodiredi jwa rona bo tle pele mo matshelong a rona.—2 Pet. 3:11, 12.
3. Ke ka ntlha yang fa bodiredi bo le botlhokwa segolobogolo fa re ntse re atamela pitlagano e kgolo?
3 “Jehofa o Tla Nna Botshabelo Jwa Batho ba Gagwe.” (Joele 3:16): Go reketla go go tlhalosiwang mo temaneng eno go ka diragala fela ka nako ya fa Jehofa a diragatsa katlholo ya gagwe ka pitlagano e kgolo. Re gomodiwa ke go itse gore Jehofa o tla falotsa batlhanka ba gagwe ba ba ikanyegang ka nako eo. (Tshen. 7:9, 14) Fa re ntse re dira tiro ya go rera le go bona kafa Jehofa a re nonotshang ka teng, re godisa tumelo le tlhoafalo ya rona tse di tla re thusang ka nako ya pitlagano e kgolo e e tlang.
4. Ke ka ntlha yang fa re ka ipela le go leba isagwe ka tsholofelo?
4 Le fa molaetsa wa ga Joele o ile wa tlhalosiwa ke bangwe e le molaetsa o o lereng khutsafalo, o naya batho ba Modimo tsholofelo e e itumedisang ya poloko. (Joele 2:32) Ka jalo, mma re lebe isagwe ka tsholofelo mme re rere dikgang tse di molemo tsa Bogosi jwa Modimo ka tlhoafalo fa re ntse re akantse ka mafoko a a mo go Joele 2:23: “Ipeleng lo bo lo itumele mo go Jehofa Modimo wa lona.”