Phatwe e Tla Nna Kgwedi E e Sa Lebalesegeng ya Tirelo!

1. Ke letsholo lefe le le kgethegileng le le tla dirwang mo lefatsheng lotlhe fa re ntse re atamela bowelo jwa ngwaga wa bo100 fa e sale Bogosi bo tlhomiwa?

¹ Bowelo jwa ngwaga wa bo100 fa e sale Bogosi jwa Modimo bo tlhomiwa bo ntse bo atamela. A bo go tshwanela jang ne gore re tlotlomatse Jehofa ka go nna le letsholo le le kgethegileng! Mo kgweding ya Phatwe re tla nna le seabe mo letsholong le le tla bong le dirwa mo lefatsheng lotlhe la go tsamaisa pampitshana e ntšha ya setlhogo se se reng Re ka Bona Kae Dikarabo Tsa Dipotso Tse di Botlhokwa ka Botshelo? Pampitshana eno e kgothaletsa babadi go batla dikarabo mo Baebeleng e bile e tlhalosa kafa jw.org/tn e ka ba thusang ka teng.

2. Re ka nna le seabe jang fa go tla bo go ‘tlhabiwa mokgosi o mogolo wa go baka Jehofa’ ka Phatwe?

² Mokgosi o Mogolo wa Pako: E le go thusa baboledi go oketsa bodiredi jwa bone, go dirilwe thulaganyo e e kgethegileng go thusa bape fela ba ba ka ratang go tsaya bobulatsela jo bo thusang ka Phatwe. Mo kgweding eo, baboledi ba ba kolobeditsweng ba tla letlelelwa go tsaya bobulatsela jo bo thusang jwa diura di le 30. E re ka kgwedi ya Phatwe e na le boLabotlhano, boMatlhatso le boSontaga ba le batlhano, baboledi ba le bantsi ba ba dirang tiro ya boitshediso kgotsa ba ba yang sekolong mo gare ga beke, ba tla kgona go tsaya bobulatsela jo bo thusang. Fa e le gore o na le thuto ya Baebele e e gatetseng pele kgotsa ngwana yo o ka ratang go nna mmoledi, bua le morulaganyi mo setlhopheng sa bagolwane ntle le go senya nako. A bo go tla re kgothatsa jang ne fa bano ba ka simolola go dira le rona e le baboledi mo kgweding eno ya letsholo le le sa lebalesegeng! Le fa babulatsela ba ka metlha ba le bantsi ba tsaya malatsi a boikhutso ka Phatwe fa ba sena go fitlhelela diura tse ba di tlhokang mo ngwageng, go ka nna ga kgonega gore ba fetole thulaganyo ya bone gore ba nne le seabe ka botlalo mo letsholong leno le le kgethegileng. Jaanong ke nako ya gore malapa a tlotle kafa a tla nnang le seabe ka teng fa go tla bo go ‘tlhabiwa mokgosi o mogolo wa go baka Jehofa’ ka Phatwe.—Esera 3:11; Dia. 15:22.

3. Ke eng se re se solofetseng mo letsholong leno le le kgethegileng?

³ Le fa re ile ra nna le matsholo a a tshwanang le leno mo nakong e e fetileng, re solofela gore leno e tla nna le le sa lebalesegeng. A re ka fitlhelela ditlhora tse disha tsa diura, tsa baboledi le tsa babulatsela ba ba thusang ka Phatwe? Fa re ntse re ya kwa bowelong jwa ngwaga wa tirelo wa 2014, e kete Jehofa a ka segofatsa maiteko a batho ba gagwe mo lefatsheng lotlhe gore kgwedi ya Phatwe e nne kgwedi e mo go yone go neetsweng bosupi jo bogolo go feta le fa e le leng pele!—Math. 24:14.