Dikgakololo Tsa Kopano

Dinako Tsa Thulaganyo: Dikgoro tsa lefelo la kopano di tla bulwa ka 7:00 a.m. Mo malatsing otlhe a mararo, mmino o tla simolola ka 9:00 a.m. Ka nako eo, rotlhe re tshwanetse go nna mo mannong a rona gore thulaganyo e simolole ka seriti. Pina e e konelang le thapelo di tla itsisiwe mo e ka nnang ka 4:35 p.m. ka Labotlhano le ka Matlhatso mme ka Sontaga thulaganyo e tla konelwa mo e ka nnang ka 3:25 p.m.

‘Bakang Jehofa ka Pina’: Batho ba Modimo mo metlheng e e fetileng ba ne ba baka Jehofa ka pina, e bile mmino e sa ntse e le karolo e e botlhokwa ya kobamelo ya boammaaruri gompieno. (Pes. 28:7) Thulaganyo nngwe le nngwe ya kopano ya tikologo e tla simolola ka mmino o o rulagantsweng. Ono ga se mmino fela o o lelelang kwa tlase mme o diretswe go re ruta ka ga Jehofa le go mo obamela. Ka jalo, fa modulasetulo a itsise gore mmino o tloga o simolola, seo se bontsha gore ke nako ya gore re nne fa fatshe mme re o reetse ka tsela e e bontshang gore re a o anaanela. Fa re dira jalo re tla bo re bontsha gore re anaanela matsapa a setlhopha se se rulaganyang mmino se a tsayang. Gabedi mo ngwageng bakaulengwe le bokgaitsadi ba dirisa madi a bone go ya kwa Patterson, New York, go rulaganya mmino ono o o monate gore re o itumelele. Fa re sena go reetsa mmino ono, mongwe le mongwe wa rona o tshwanetse go baka Jehofa ka go opela dipina tsa Bogosi.

Mafelo a go Phaka Dikoloi: Mo mafelong otlhe a kopano a re tla bong re neilwe tetla ya go laola lefelo la go phaka dikoloi, dikoloi di tla phaka mo go lone kwantle ga tuelo, ka jalo ope fela yo o tlang a ka phaka mo go lone. Gantsi mafelo a go phaka dikoloi ga a mantsi, ka jalo, re tshwanetse go leka thata go tsamaya mmogo ka dikoloi.

Go Boloka Manno: Fa dikgoro tsa lefelo la kopano di bulwa moso mongwe le mongwe, tsweetswee, lo se ka lwa itlhaganelela kwa mannong a lo a ratang e kete lo gaisana le batho ba bangwe ba ba tlileng kopanong. Moya wa go intsha setlhabelo o o re tlhotlheletsang go batlela ba bangwe se se molemo o bontsha gore re Bakeresete ba boammaaruri mme o tlhotlheletsa batho ba ba lebileng gore ba bake Modimo. (Joh. 13:34, 35; 1 Bakor. 13:5; 1 Pet. 2:12) O ka bolokela fela batho ba o nnang le bone mo ntlong kgotsa ba o tsamayang le bone ka koloi manno kgotsa ba o ithutang Baebele le bone. Batho ba ba godileng le ba ba bokoa ba beetswe manno a a kgethegileng. E re ka manno ano a lekanyeditswe, batho ba ba godileng kgotsa ba ba bokoa ba ka nna le motho a le mongwe kgotsa ba le babedi fela ba ba ba thusang.

Moaparo o o Rulagantsweng Sentle: Moaparo wa rona ka nako ya kopano o tshwanetse go nna o o siameng le o o rulagantsweng sentle, e se ka ya nna wa ditaele tse di feteletseng tse di tlwaelegileng tsa lefatshe. (1 Tim. 2:9) Tota le fa re tsena kgotsa re tswa mo hoteleng le ka nako ya fa re iketlile pele le morago ga thulaganyo, re batla go tila go apara ka go latlhelela fela kgotsa go apara ka tsela e e botlhaswa. Fa re dira jalo, re tla nna motlotlo go tsenya dibetšhe tsa rona tsa kopano mme re ka se ka ra tlhabiwa ke ditlhong go neela bosupi fa re nna le tshono ya go dira jalo. Tsela e re lebegang ka yone le boitshwaro jwa rona jo bo molemo fa re le kwa dikopanong tse di tlang, e ka se ka ya ngoka fela batho ba ba dipelo di phepa gore ba reetse molaetsa wa Baebele o o bolokang matshelo mme gape e tla dira gore Jehofa a ipele.—Sefa. 3:17.

Didirisiwa Tsa Ileketeroniki: Fa thulaganyo e tsweletse, re ka bontsha gore re maitseo ka go dira gore difouno kgotsa didirisiwa tsa rona tsa ileketeroniki di se ka tsa itaya ba bangwe tsebe. Fa re dirisa dikhamera, di-tablet kgotsa didirisiwa tse dingwe, re tshwanetse go akanyetsa ba bangwe ka gore re se ka ra ba sira kgotsa ra ba itaya tsebe. Gape re bontsha maitseo ka go se romele melaetsa go sa tlhokege fa thulaganyo e tsweletse.

Dijo Tsa Motshegare: Tsweetswee itleleng dijo tse di motlhofo go na le go tswa mo lefelong la kopano go ya go di reka ka nako ya dijo tsa motshegare. Lo ka nna lwa dirisa khulara e nnye e lo ka kgonang go e baya ka fa tlase ga setulo. Dikhulara tse dikgolo tse di dirisediwang dipikiniki le dilwana tsa galase ga di a letlelelwa mo lefelong la kopano.

Meneelo: Re ka bontsha gore re anaanela dithulaganyo tsa kopano ka go ntshetsa tiro ya lefatshe lotlhe meneelo ka go rata kwa kopanong. Fa e le gore lo ka rata go ntsha moneelo ka tšheke, dirang dituelo go “Christian Congregation of Jehovah’s Witnesses of South Africa.” Meneelo e ka ntshiwa ka dikarata tsa debit kgotsa tsa credit.

Melemo: Fa e le gore o na le melemo e o e fiwang ke ngaka, tsweetswee tlhomamisa gore o tla ka e e lekaneng ka gonne go tla bo go se na epe kwa kopanong. Mamao a bolwetse jwa Sukiri le dinnale di tshwanetse go latlhelwa mo metomong ya matlakala ya dilo tse di kotsi mme e seng mo metomong e e mo mabaleng a kopano le mo dihoteleng.

Ditlhagiso Tsa Tshireletsego: Tsweetswee, nnang kelotlhoko thata go tila dikgobalo tse di ka bakwang ke go relela kgotsa go kgopiwa. Ngwaga le ngwaga go nna le dikgobalo tse di bakwang ke ditlhako, segolobogolo tsa direthe tse di kwa godimo. Go botoka go tlhopha ditlhako tse di bori, tse di go lekanang sentle tse di ka go letlang go tsamaya ka pabalesego mo ditselaneng tse di tlhatlogang, ditepisi le mo diforeimeng tsa tshipi tse di fa fatshe, jalo le jalo.

Diporema Tsa Bana le Ditulo Tsa Llono: Ga re a tshwanela go tla ka diporema tsa bana le ditulo tsa llono mo lefelong la kopano. Le fa go ntse jalo, ditulo tsa masea tse di lekanang mo setulong se se fa thoko ga sa batsadi di a amogelesega.

Dinkgisamonate: Dikopano tse dintsi tsa kgaolo di tshwarelwa mo mafelong a a tswalegileng a go sa tseneng moya mo go one. Ka jalo, re tla bo re bontsha lorato fa re ka fokotsa dinkgisamonate tse di nang le monko o o bogale tse di ka bakelang batho mathata a go hema le a mangwe.—1 Bakor. 10:24.

Diresetšhurente: Bontsha gore o tlotla leina la ga Jehofa ka go itshwara sentle kwa diresetšhurenteng. Apara ka tsela e e tshwanelang modiredi wa Mokeresete. Tlogelela motho yo o go thusang madinyana a tebogo fa go tlwaelegile go dira jalo.

Marobalo: Diforomo tsa Special Needs Room Request (CO-5) di gone fa baboledi ba ba batlang go kopa marobalo ba di batla. Komiti ya Tirelo ya Phuthego e tshwanetse go sekaseka gore a baboledi ba a tshwanelega, e dirisa dikaelo tse di mo foromong eno le tse di mo lekwalong la December 14, 2010, le le kwaletsweng ditlhopha tsotlhe tsa bagolwane. Thulaganyo eno e diretswe fela baboledi ba ba nang le boemo jo bo siameng mo phuthegong mmogo le bana ba bone ba ba maitseo.

Tirelo ya Boithaopo: Ope fela yo o batlang go ithaopa o tshwanetse go ya kwa Lefapheng la Tirelo ya Boithaopo kwa kopanong. Bana ba ba ka fa tlase ga dingwaga di le 16 le bone ba ka nna le seabe se segolo ka go bereka ka fa tlase ga kaelo ya motsadi kgotsa motlhokomedi mongwe yo o godileng yo batsadi ba mo kopileng.