Go Naya Batho Taletso

1. Letsholo la taletso ya kopano le tla simolola leng?

¹ Fa o rulaganya go apeela ditsala kgotsa ba lelapa dijo tse di kgethegileng, tse di tlhokang matsapa a magolo le madi a mantsi, ga go pelaelo gore o tla ba laletsa ka matlhagatlhaga. Ka tsela e e tshwanang, go tsere matsapa go baakanyetsa moletlo wa semoya o re tla nnang le one kwa kopanong. Dibeke di le tharo pele ga kopano, Jehofa o re naya tshiamelo ya go laletsa batho ba bangwe go tla kopanong. Ke eng se se tla re thusang go laletsa batho ka matlhagatlhaga?

2. Ke eng se se tla re tlhotlheletsang go nna le seabe ka botlalo mo letsholong leno?

² Re tla tlhotlheletsega go nna le seabe ka botlalo mo letsholong leno fa re akanya kafa thuto e e lapolosang e Jehofa a re nayang yone kwa dikopanong tsa rona e re solegelang molemo ka gone. (Isa. 65:13, 14) Mme gape re tshwanetse go gakologelwa gore letsholo la rona la ngwaga le ngwaga le nna le diphelelo tse di molemo. (Bona lebokose le le reng “E Nna le Diphelelo Tse di Molemo.”) Bangwe ba batho ba re ba laletsang ba tla nna teng kwa kopanong. Le fa go ntse jalo, go sa kgathalesege gore ke batho ba le kae ba ba tla nnang teng kwa kopanong, maiteko a rona a magolo ka nako ya letsholo leno a tla baka Jehofa le go bontsha kafa a leng pelotshweu ka gone.—Pes. 145:3, 7; Tshen. 22:17.

3. Ditaletso di tla tsamaisiwa jang?

³ Setlhopha sengwe le sengwe sa bagolwane se tla bona kafa phuthego e ka kgonang go anamisa ditaletso ka gone le gore a ba ka di tlogela mo matlong a a se nang batho kgotsa go di tsamaisa mo bodireding jwa phatlalatsa mo tshimong ya bone. Ka mafelobeke go tshwanetse ga tsamaisiwa dimakasine mmogo le ditaletso fa go tshwanela. Fa letsholo le fela, a bo re tla itumela jang ne go itse gore re nnile le seabe ka matlhagatlhaga le gore re laleditse batho ba bantsi ka mo re ka kgonang ka teng gore ba itumelele moletlo wa semoya o Jehofa a re baakanyeditseng one!

E Nna le Diphelelo Tse di Molemo

Dingwaga di le mmalwa tse di fetileng fa kgaitsadi mongwe a le mo letsholong la go tsamaisa taletso, o ne a ipotsa gore a tota seno ga se matsapa a bophiri. O ne a re, ‘A tota batho ba tla tsibogela taletso ba bo ba tla kopanong?’ Mo mosong wa Matlhatso kwa kopanong, o ne a bona monna mongwe yo o neng a ntse gaufi le ene yo o tsenang kereke ya Baindia a bo a mo ikitsise. O ne a tlile kopanong ka gonne a neilwe taletso. O ne a botsa dipotso tse dintsi tse kgaitsadi a neng a kgona go di araba. O ne a re o itumelela kopano le gore o kgatlhilwe ke tsela e batho ba apereng ka yone le e ba itshwarang ka yone. Mo go lone letsatsi leo, kgaitsadi yono o ne a simolola go tlotla le banyalani ba ba neng ba bapile le ene. Le bone ba ne ba neilwe taletso e bile ba tlile kopanong ka bese. Ba ne ba itumelela kopano e bile ba batla go boa gape ka Sontaga. Ka jalo kgaitsadi o ne a lemoga gore letsholo la ngwaga le ngwaga la taletso le botlhokwa.
Kwa kopanong nngwe ya bosheng, monna le mosadi ba e leng babulatsela ba ka metlha ba ne ba ikitsise mo banyalaning bangwe ba ba godileng. Banyalani bano ba ne ba re ke la ntlha ba tla kopanong. Babulatsela ba ne ba ba botsa jaana: “Lo laleditswe ke mang?” Ba ne ba ba raya ba re: “Letsatsi lengwe fa re tsena kwa lapeng, re ne ra fitlhela taletso e tsentswe mo kgorong.” Ba ne ba bala taletso ba bo ba tlatsa setlankana se se ka fa morago. Batlakopanong bangwe ba ne ba naya banyalani bano dijo. Ba ne ba itumelela kopano mo ba neng ba dira dithulaganyo tsa go boa mo letsatsing le le latelang. Go ne ga dirwa dithulaganyo tsa gore ba etelwe gore ba rutiwe Baebele.