Ba ba Thusang ba ba Tlhokang ba Tla Segofadiwa

Batho ba le bantsi gompieno ba tlhoka dijo e bile ga ba na ko ba ka robalang teng. Batho bangwe ga ba akanye gore go tla tsamaya go nna botoka. Modimo o tla re segofatsa jang fa re thusa batho ba ba tlhokang?

DIKWALO TSE DI BOITSHEPO TSONE TSA RENG?

“Yo o utlwelang motho wa maemo a a kwa tlase botlhoko o adima Jehofa, mme O tla duela tsela e a neng a mo tshwere ka yone.”—DIANE 19:17.

GO THUSA BA BA TLHOKANG GO KAYA ENG?

Jesu o ile a bua ka monna mongwe yo o neng a tlhasetswe ke magodu a bo a mo tlogela gore a swe. (Luke 10:29-37) Monna mongwe o ne a ema, a bo a thusa monna yono yo o neng a gobetse botlhoko. O ile a dira seno le fa gone ba ne ba sa tswe mo lotsong lo lo tshwanang.

Monna yono o ile a mo direla sengwe le sengwe se a neng a se tlhoka, a bo a mo gomotsa le go mo kgothatsa.

Jesu o batla gore re ithute eng mo sekaing seno? O batla gore re dire sotlhe se re ka se kgonang go thusa ba bangwe. (Diane 14:31) Dikwalo Tse di Boitshepo di bontsha gore mo nakong e e sa fediseng pelo, Modimo o tlile go fedisa dilo tsotlhe tse di re utlwisang botlhoko. Mme gone re ka ipotsa gore, Modimo o tlile go dira seo jang le gone leng? Setlhogo se se latelang se tla re bolelela gore ke masego afe a Modimo a tla re nayang one.