BOTSHELO JWA BOKERESETE

Karolo e Ntšha ya Pokano ya Botshelo le Bodiredi

Go simolola ka January 2018, go tla nna le karolo e ntšha mo pokanong ya Botshelo le Bodiredi. Karolo eno e tla akaretsa dintlha, ditshwantsho le dibidio tse di tlhagang mo Baebeleng ya Study Edition ya Thanolo ya Lefatshe le Lesha ya Dikwalo Tse di Boitshepo ya Seesemane e e mo jw.org, le fa gone e ise e nne teng ka puo ya lona. Ga go pelaelo gore tshedimosetso eno e tla dira gore o itumelele go baakanyetsa dipokano. Sa botlhokwa le go feta, e kete karolo eno e ka dira gore o atamalane thata le Rraarona yo o lorato e bong Jehofa!

DINTLHA TSA GO ITHUTA

Dintlha tseno di re thusa go tlhaloganya setso, lefelo le tshedimosetso e e oketsegileng ka ditemana di le dintsi tsa Baebele.

Mathaio 12:20

Mogala wa lodi o o ntshang mosi: Malapa a le mantsi a ne a dirisa lobone lo lo dirilweng ka letsopa mme go ne go tshelwa oli ya motlhware mo go lone. Mo teng ga lobone loo, go ne go tsenngwa mogala o o neng o monya oli eo gore kgabo ya molelo e nne e tuka. Mafoko a Segerika a a reng ‘mogala wa lodi o o ntshang mosi’ a ka tswa a kaya mogala o o ntshang mosi ka gonne go sa ntse go na le tlhasenyana mme gone e tloga e tima. Boporofeti jo bo mo go Isaia 42:3 bo ne bo bua ka tsela e Jesu a neng a tla utlwela batho botlhoko ka yone; o ne a se kitla a dira gore batho ba maemo a a kwa tlase ba felelwe ke tsholofelo.

Mathaio 26:13

Ammaaruri: Lefoko la Segerika le le reng a·menʹ le ranotswe go tswa mo lefokong la Sehebera ʼa·menʹ le le kayang “a go nne jalo.” Gantsi Jesu o ne a dirisa lefoko leno pele a umaka tsholofetso nngwe kgotsa boporofeti bongwe, ka go dira jalo a gatelela gore se a se buang se tlile go diragala. Go dumelwa gore mo Baebeleng yotlhe, Jesu ke ene fela motho yo o neng a dirisa lefoko “ammaaruri” kgotsa amen fa a ne a solofetsa motho sengwe kgotsa a bua ka boporofeti bongwe. Fa lefoko leno le boaboelediwa, jaaka go dirilwe mo Efangeleng ya ga Johane, mafoko ao a balega jaana: “Ammaaruri ammaaruri.”—Joh 1:51.

DIBIDIO LE DITSHWANTSHO

Karolo eno e na le ditshwantsho le dibidio tse di re thusang go tlhaloganya ditemana dingwe tsa Baebele.

Bethefage, Thaba ya Lotlhware le Jerusalema

Bidio eno e bontsha tsela e e tsenang ka Jerusalema go tswa kwa botlhaba, go tswa kwa motseng wa et-Tur (o go akanngwang gore ke motse o mo Baebeleng o bidiwang Bethefage) go fitlha kwa godimo ga Thaba ya Lotlhware. Motse wa Bethani o ka fa botlhaba jwa Bethefage le kwa botlhaba jwa Thaba ya Lotlhware. Fa Jesu le barutwa ba gagwe ba ne ba le kwa Jerusalema, gantsi ba ne ba robala kwa Bethani e gompieno e bidiwang ka leina la Searabia go twe ke el-ʽAzariyeh (El ʽEizariya) e e kayang “Lefelo la ga Lasaro.” Go bonala Jesu a ne a robala kwa legaeng la ga Maratha, Marea le Lasaro. (Mat 21:17; Mar 11:11; Luk 21:37; Joh 11:1) Fa Jesu a ne a ya gae kwa Jerusalema, a ka tswa a ne a tsamaya ka tsela e e tshwanang le e e mo bidiong eno. Ka Nisane 9, 33 C.E., fa Jesu a ne a palame esele a tlhatloga Thaba ya Lotlhware a ya kwa Jerusalema, a ka tswa a ne a tswa kwa Bethefage a dirisa tsela e e yang kwa Jerusalema.

Tsela e e tswang kwa Bethani e ya kwa Bethefage
Bethefage
Thaba ya Lotlhware
Mokgatšha wa Kiderona
Thaba e Tempele e neng e agilwe mo go yone

Sepekere mo Seretheng

Setshwantsho seno ke sa sepekere se se boleele jwa disentimetara di le 11,5 se tsene mo seretheng sa motho. Lerapo leno le ile la fitlhelwa ka 1968 fa baithutamarope ba ne ba epa kwa bokone jwa Jerusalema mme go akanngwa gore ke la nako ya puso ya Baroma. Le naya bosupi jwa gore dipekere di ka tswa di ne di dirisiwa go kokotela motho mo paleng fa a bolawa. Sepekere seno se ka tswa se tshwana le se masole a Roma a ileng a se dirisa go kokotela Jesu Keresete mo paleng. Lerapo leno le ile la fitlhelwa mo lebokosong le le neng le dirisiwa go tsenya marapo a motho fa setopo se sena go bola. Seno se bontsha gore motho yo o neng a bolaetswe mo koteng o ne a ka kgona go fitlhwa.—Mat 27:35.