A o Ne o ka Tima Lodi lo lo Kuang Mosi?

JESU KERESETE o ne a bolela mafoko a a molemo a Bogosi jwa Modimo mo bathong ba mefuta yotlhe. Ba bantsi mo go bone ba ne ba tshwenyegile, ba kgobegile marapo. Mme Jesu o ne a ba fa molaetsa o o kgothatsang. O ne a utlwela batho ba ba bogang botlhoko.

Mokwadi wa Efangele, Mathaio, o ne a gatelela bopelotlhomogi jwa ga Jesu ka go bua thata ka boperofeti jo bo kwadilweng ke Isaia. Mathaio o ne a kwala jaana fa a ne a nopola mafoko a Keresete a a diragaditseng: “Lotlhaka lo lo phitshegileng ga a ketla a lo roba, le lodi lo lo kuang mosi ga a ketla a lo tima, go tle go tsamaye a ntshetse katlholo phenyong.” (Mathaio 12:20; Isaia 42:3) Mafoko ano a kaya eng, mme Jesu o ne a diragatsa boperofeti jono jang?

Go Ela Boperofeti Tlhoko

Go tlwaelegile gore lotlhaka lo gola mo lefelong le le metsi mme e bile ga se semela se se thata se se tshelang nako e telele. “Lotlhaka lo lo phitshegileng” lo bokoa eleruri. Ka jalo go lebega lo emela batho ba ba bogang ba ba sotlegang jaaka monna yo o neng a na le letsogo le le omeletseng yo Jesu a neng a mo fodisa ka Sabata. (Mathaio 12:10-14) Jaanong go tweng ka se lodi lwa lebone le se emelang mo boperofeting?

Lebone le le neng le tlwaelegile la lekgolo la ntlha la dingwaga C.E. e ne e le sejana sa letsopa se se neng se tshwana le nkgwana se se neng se na le mokgothi wa segole. Gantsinyana, lebone le ne le tladiwa ka lookwane lwa motlhware. Lodi lo lo neng lo dirilwe ka kgobati lo ne lo gogela lookwane kwa godimo gore lebone le kgone go tswelela le tuka. Go phepafetse gore ‘lodi lo lo kuang mosi’ e ne e tla nna lo lo tlogang lo tima.

Jesu o ne a bolela molaetsa wa gagwe o o gomotsang mo bathong ba ba neng ba tshwantshediwa ke lotlhaka lo lo phitshegileng, ba ba neng ba gateletswe e bile ba sotlegile. Batho bano gape ba ne ba tshwana le lodi lo lo kuang mosi ka gore tlhase ya bone ya bofelo ya botshelo e ne e setse e batlile e timile. Ruri ba ne ba tshwenyegile e bile ba kgobegile marapo. Lefa go ntse jalo, Jesu ga a ka a senya lotlhaka lo lo phitshegileng loo lwa tshwantshetso lefa e le go tima lodi lwa tshwantshetso lo lo kuang mosi. Mafoko a gagwe a a lorato, a a bonolo a kutlwelobotlhoko ga a ka a tswelela pele a kgoba batho ba ba sotlegang marapo le go tswelela a ba tshwenya mo maikutlong. Go na le moo, dilo tse a neng a di bua le bone le tsela e a neng a dirisana le bone ka yone, di ne di ba itumedisa.—Mathaio 11:28-30.

Le gompieno batho ba bantsi ba tlhoka go utlwelwa botlhoko le go kgothadiwa ka gore ba lebana le mathata a a kgobang marapo. Le e leng batlhanka ba ga Jehofa ga ba kgone go itshoka ka dinako tsotlhe fa ba lebane le mathata. Ka dinako tse dingwe ba bangwe ba tshwana le lodi lo lo kuang mosi. Ka jalo Bakeresete ba tshwanetse go kgothatsa—ba futswela kgabo ya molelo, jaaka go ka tualo—ka jalo ba nonotshana.—Luke 22:32; Ditiro 11:23.

Jaaka Bakeresete, re batla go aga ba bangwe. Ga re kake ra leka go koafatsa motho ope yo o batlang go thusiwa semoyeng fela ka bomo. Eleruri, re eletsa go etsa sekao sa ga Jesu fa re nonotsha ba bangwe. (Bahebere 12:1-3; 1 Petere 2:21) Boammaaruri jwa lebaka la gore re ka kgona go kgoba mongwe yo o batlang kgothatso marapo re sa tlhokomele, ke lebaka le le molemo la gore re tlhokomele thata tsela e re dirisanang le ba bangwe ka yone. Ruri ga re batle go ‘tima lodi lo lo kuang mosi.’ Re ka thusiwa ke dikaelo dife tsa Dikwalo mo go seno?

Matswela a go Kgala

Fa Mokeresete a ‘tshwarwa mo tlolong nngwe, ba semoya ba tshwanetse go sokolola yo o ntseng jalo ka mowa wa bonolo.’ (Bagalatia 6:1) Lefa go ntse jalo, a go tla bo go tshwanetse go senka makoa a batho ba bangwe le go batla go a baakanya nako le nako fa re bona sebaka sa go dira jalo? Kgotsa a go tla bo go siame go ba pateletsa go dira dilo tse di botoka ka go kaya gore ga ba iteke ka mo go lekaneng, gongwe re dira gore ba ikutlwe ba le molato? Ga go na sepe se se supang gore Jesu o ne a dira sepe sa mofuta oo. Lefa re ikaelela go thusa ba bangwe gore ba tokafatse, batho ba ba kgalwang ba ka nna ba ikutlwa ba kgobegile marapo go na le go nonotshiwa. Le e leng gone go kgalwa mo go ka thusang go ka kgoba marapo thata fa go dirwa ka tsela e e feteletseng. Fa Mokeresete yo o kelotlhoko a tlhola a kgalwa, o ka nna a itlhoboga mme a re, ‘E le gore motho o tla bo a itshwenyetsang a re o a iteka?’ Eleruri, o ka nna a itlhobogela ruri.

Lefa gone go naya kgakololo ya Dikwalo go le botlhokwa, bagolwane ba ba tlhomilweng kgotsa batho ba bangwe mo phuthegong ga ba a tshwanelwa go itsiwe e le batho ba mofuta oo. Dipokano tsa Bokeresete ga di tshwarelwe go naya le go amogela kgakololo fela. Go na le moo, re kopana mmogo ka metlha gore re agane le go kgothatsana gore batho botlhe ba ipelele bokopano le go bo ba direla Modimo ka boitshepo. (Baroma 1:11, 12; Bahebere 10:24, 25) A bo go le molemo jang ne fa re lemoga pharologano magareng ga phoso e e masisi le go tlhoka go itekanela, gore ke go supa botlhale le lorato go di itlhokomolosa!—Moreri 3:1, 7; Bakolosa 3:13.

Batho ba arabela ka bonako fa ba kgothadiwa go na le fa ba kgalwa. Totatota, fa batho ba ikutlwa ba kgalwa ka tsela e e sa siamang, ba ka nna ba ngaparela thata mokgwa wa bone o o kgalwang! Mme fa ba akgolwa ka mo go tshwanetseng, ba a kgothala, mme ba rotloetsega go tokafatsa. (Diane 12:18) Ka jalo, jaaka Jesu, a re kgothatseng ba bangwe mme le ka motlha re se ka ra tima “lodi lo lo kuang mosi.”

Go Tweng ka go Tshwantshanya Batho?

Fa motho a utlwa maitemogelo a a molemo a Bakeresete ba bangwe o ka kgothala eleruri. Jesu ka boene o ne a itumela fa a ne a utlwa gore barutwa ba gagwe ba ne ba atlegile fa ba ne ba rera molaetsa wa Bogosi. (Luke 10:17-21) Ka tsela e e tshwanang, fa re utlwa ka tsela e ba bangwe ba atlegang ka yone, ka sekao se se molemo, kgotsa ka bothokgami jwa ba bangwe mo tumelong, re a kgothadiwa mme re ikutlwa re ikemiseditse go feta le eleng pele go ngaparela tsela ya rona ya Bokeresete.

Mme gone, go tweng fa pego e ne e neelwa ka tsela e e ka supang gore, ‘Wena ga o dire sentle jaaka Bakeresete bano, le gore o tshwanetse gore o bo o dira botoka thata go feta jaaka o dira gone jaanong’? A go lebega motho yo o reeditseng seno a ka itshwenya ka go iteka ka thata gore a tokafatse? Go lebega a ka kgobega marapo fela kgotsa a itlhoboga, segolobogolo fa a tlhola a tshwantshanngwa le batho ba bangwe kgotsa go supiwa ka tsela nngwe gore o bapisiwa le bone. Seno se ka tshwana fela lefa motsadi a ka raya ngwana wa gagwe a re ‘Ke ka ntlha yang fa o sa tshwane le morwarrago?’ Kakgelo e e ntseng jalo e ka nna ya baka letlhoo kgotsa ya mo kgoba marapo mme ga go lebege e ka mo rotloetsa gore a itshware ka tsela epe e e botoka. Go tshwantshanya go dira se se tshwanang mo bagolong, e bile go ba dira gore ba tlhoe batho ba ba tshwantshanngwang le bone.

Ga re kake ra solofela gore batho botlhe ba direle Modimo ka selekanyo se se tshwanang. Mo go sengwe sa ditshwantsho tsa ga Jesu, morena mongwe o ne a naya batlhanka ba gagwe talente e le nngwe, tse pedi le tse tlhano tsa selefera. Ba ne ba di fiwa “mongwe le mongwe a neelwa ka fa nonofong ya gagwe.” Batlhanka ba babedi ba ba neng ba dira ka botlhale mme ba oketsa ditalente tsa bone ba ne ba akgolwa ka gore ba ne ba ikanyega, lefa gone tiro ya bone e tlisitse matswela a a sa tshwaneng.—Mathaio 25:14-30.

Moaposetoloi Paulo o ne a kwala jaana ka tshwanelo: “Mme a motho mongwe le mongwe a sekaseke e e leng tiro ya gagwe, foo o tlaa bona go ipelafatsa ka ga gagwe ka esi, e seng ka ga wa ga gabo.” (Bagalatia 6:4) Gore re nne batho ba ba kgothatsang ba bangwe ka boammaaruri, he, re tshwanetse go tila go ba tshwantshanya le ba bangwe ka tsela e e sa siamang.

Ditsela Tse re Ka Agang ka Tsone

Re ka dira jang gore re age ba ba kgobegileng marapo mme re tile go ‘tima lodi lo lo kuang mosi’? Ga go na tsela epe e e rileng e e tlhomilweng ya go naya kgothatso. Lefa go ntse jalo, go lebega mafoko a rona a ka aga batho ba bangwe fa re dirisa melaometheo ya Baebele. Mengwe ya yone ke efe?

Nna boikokobetso. Mo go Bafilipi 2:3 Paulo o ne a re kgothatsa gore re ‘se dire sepe ka go itira lekoko le fa e le ka go ipelafatsa.’ Go na le moo, re tshwanetse go bua le go itshwara ka boikokobetso. ‘Ka boikokobetso re tshwanetse go kaya ba bangwe ba re gaisa ka molemo.’ Paulo ga a ka a re ga re a tshwanela go ikakanyetsa. Mme gone, re tshwanetse go lemoga gore motho mongwe le mongwe o botoka mo go rona ka tsela nngwe. Lefoko la Segerika le le dirisitsweng fano jaaka “botoka” le kaya gore monna o “tlhokomologa ditshiamelo tsa gagwe, a bo a tlhoafalela go akanya ka dilo tse di molemo tse yo mongwe a mo gaisang ka tsone.” (New Testament Word Studies, ya ga John Albert Bengel, Bolumo 2, tsebe 432) Fa re dira seno mme re tsaya ba bangwe ba le botoka mo go rona, re tla dirisana le bone ka boikokobetso.

Tlotla ba bangwe. Ka go itlhalosa ka bopeloephepa, re ka supa gore re tshepa badumedikarona e bile re ba leba jaaka batho ba ba eletsang go itumedisa Modimo. Mme a gotwe ba tlhoka thuso ya semoya. Fa go ntse jalo, a re ba thuseng ka tsela e e supang tlotlo le e e nang le seriti. Paulo o ne a baya kgang jaana: “Mo tlotlong, a mongwe a beye yo mongwe kwa pele.”—Baroma 12:10.

Nna moreetsi yo o molemo. Ee, gore re kgone go kgothatsa ba ba lebaganeng le mathata a a kgobang marapo, re tshwanetse go nna bareetsi ba ba molemo, e seng batho ba ba laelang gore go dirwe eng. Go na le go naya dikakantsho tse di lolea fela ka bonako, a re ipheng nako e e tlhokegang gore re neele dikaelo tsa Dikwalo tse ruri di thusang se motho yoo a se tlhokang. Fa re sa itse gore re reng, dipatlisiso tse re tla di dirang mo Baebeleng di tla re thusa go gomotsa le go nonotsha ba bangwe.

Supa lorato. Re tshwanetse gore re bo re rata batho ba re batlang go ba kgothatsa. Lorato lwa rona fa lo bontshiwa batlhankakarona ba ga Jehofa, lo tshwanetse go feta fela go ba direla dilo tse di molemo. Lo tshwanetse go akaretsa maikutlo a a boteng. Fa re rata batho ba ga Jehofa botlhe ka tsela e e ntseng jalo, mafoko a rona a tshwanetse go nna a a ba kgothatsang ka mmatota. Lefa re tlhoka go neela kakantsho gore go tokafadiwe golo gongwe, ga se gantsi se re tla se buang se tla se keng se tlhaloganngwe ka tsela e e tshwanetseng kgotsa se ka senyang, ka gore maikaelelo a rona e tla bo e se go tlhalosa ka fa rona re lebang dilo ka teng, mme e tla bo e le go thusa ka lorato. Paulo o ne a bolela jaana ka botswerere, “lorato lo a agelela.”—1 Bakorinthe 8:1; Bafilipi 2:4; 1 Petere 1:22.

Nna yo o Agang ka Metlha

Mo ‘metlheng eno ya bofelo’ e e tlhokofatsang, batho ba ga Jehofa ba lebagana le diteko tse dintsi. (2 Timotheo 3:1-5) Ga go gakgamatse go bo ka dinako tse dingwe ba sotliwa go fitlha fa go lebegang gore ga ba tlhole ba kgona go itshoka. Jaaka batlhanka ba ga Jehofa, ruri ga re batle go bua kgotsa go dira dilo tse di ka nnang tsa dira gore baobamedimmogo le rona ba ikutlwe jaaka e kete ke lodi lo lo kuang mosi lo lo tlogang lo tima.

A bo go le botlhokwa jang ne gore re kgothatsane! A re itekeng ka ditsela tsotlhe gore re age ba bangwe ka go nna boikokobetso le ka go tlotla baobamedimmogo ba ba kgobegileng marapo. E kete re ka reetsa ka kelotlhoko fa ba re tshololela mafatlha a bone mme ka metlha re batle ditsela tse re ka ba thusang ka tsone re ba tlhokomedisa Lefoko la Modimo, Baebele. Mo godimo ga tseo tsotlhe, a re supeng lorato, ka gonne leungo leno la moya o o boitshepo wa ga Jehofa, le tla re thusa go nonotshana. E kete le ka motlha re ka se ka ra bua kgotsa ra dira dilo ka tsela e e ka nnang ya ‘tima lodi lo lo kuang mosi.’