O ka Agisanya Jang Pele le Mokaulengwe wa Gago?

A re re o nna kwa Galalea ka nako ya ga Jesu. O ile kwa Jerusalema go ya go keteka Moletlo wa Diobo. Motse wa Jerusalema o phophoma ka batho ba le bone ba tswang kgakala go tla go keteka moletlo ono. O mo tseleng go ya go ntshetsa Jehofa setlhabelo. O tsaya podi e o tlileng go e ntsha setlhabelo o bo o ralala motse o o phophomang ka batho o leba kwa tempeleng. Fa o fitlha kwa tempeleng, go tletse batho ba le bone ba tlileng go ntshetsa Jehofa ditlhabelo. Jaanong ke nako ya gore o neye baperesiti podi gore ba e ntshe setlhabelo. Ka yone nako eo, o gopola gore o kgopisitse mokaulengwe wa gago yo le ene a tlileng mo moletlong ono. Jesu o re bolelela se re tshwanetseng go se dira. (Bala Mathaio 5:24.) Wena le mokaulengwe yo o mo kgopisitseng lo ka dirang go latela taelo ya ga Jesu ya gore lo agisane pele? Re tlile go tlhalosa boemo jo re ka lebanang le jone mme tshwaya karabo e e siameng.

O TSHWANETSE . . .

• go bua le mokaulengwe wa gago fa o akanya gore se o se dirileng se mo kgopisitse

• go leka go mmontsha gore o kgopisega ka bonako kgotsa gore le ene go na le sengwe se se phoso se a se dirileng

• go mo reetsa ka kelotlhoko fa a tlhalosa maikutlo a gagwe le fa o ka tswa o sa mo tlhaloganye, go tswa foo, kopa maitshwarelo go bo o mo utlwisitse botlhoko, kgotsa mmolelele gore e ne e se maikaelelo a gago go mo utlwisa botlhoko

YO O KGOPISEGILENG O TSHWANETSE . . .

• go bolelela ba bangwe mo phuthegong ka se o se mo dirileng

• go go kgala ka se o se dirileng, a bue sengwe le sengwe se se diragetseng le go go dira gore o ipone molato

• go lemoga boikokobetso jwa gago le gore go go tsere bopelokgale go tla kwa go ene go mo kopa gore a go itshwarele

Le fa re sa tlhole re ntsha ditlhabelo tsa diphologolo, Jesu o ne a re ruta eng malebana le go dira kagiso le ba bangwe le tsela e go dira jalo go amang kobamelo ya rona ka yone?