LETLHOO LE KA FEDISIWA JANG?
2 | O Se Ka Wa Ipusolosetsa
Se Baebele e se Rutang:
“Lo se ka lwa busetsa ope bosula ka bosula. . . . Fa go kgonega, dirang sotlhe se lo ka se kgonang go agisana le batho botlhe. . . . Lo se ka lwa ipusolosetsa, . . . ka gonne go kwadilwe jaana: ‘“Ke tla busolosa; ke tla duela,” go bua Jehofa.’”—BAROMA 12:17-19.
Se e Se Kayang:
Nnete ke gore fa re sa tshwarwe sentle re a galefa mme gone Modimo ga a batle gore re ipusolosetse. Go na le moo, o re kopa gore re nne pelotelele ka gonne go ise go ye kae o tla fedisa bosula jotlhe.—Pesalema 37:7, 10.
Se o Ka se Dirang:
Fa batho ba ipusolosetsa, ga ba fedise letlhoo mme ba dira gore le gakale. Ka jalo fa mongwe a sa go tshware sentle kgotsa a go utlwisa botlhoko, o se ka wa ipusolosetsa. Fa mongwe a go utlwisa botlhoko leka go wela makgwafo o bo o bua le ene sentle. Ka dinako tse dingwe, go ka nna botoka go lebala se se diragatseng. (Diane 19:11) Mme gone ka dinako tse dingwe o ka tlhoka go bega se se go diragaletseng. Ka sekai, o ka nna wa tshwanelwa ke go begela mapodise kgotsa balaodi bangwe ba puso fa e le gore o tlhasetswe ke mongwe.
Go ipusolosetsa ga go thuse
O tshwanetse go dira eng fa e le gore ga lo kgone go rarabolola bothata joo? Kgotsa o ka dira eng fa e le gore o setse o lekile go rarabolola bothata ka tsela e e tla dirang gore go nne le kagiso mme ga o a atlega? O se ka wa ipusolosetsa. Go dira jalo go tla kgotletsa molelo. Fa o tlhopha go se ipusolosetse, o tla dira gore letlhoo le se ka la gakala. Ikanye tsela e Modimo a rarabololang mathata ka yone. “Mo ikanye, mme o tla go thusa.”—Pesalema 37:3-5.