BASHA BA BOTSA JAANA
Baebele e ka Nthusa Jang?—Karolo 1: Itse Baebele ya Gago
“Ke lekile go bala Baebele mme ke tswafisiwa ke gore e kima!”—Briana, 15.
A le wena o ikutlwa jalo? Setlhogo seno se tlile go go thusa!
Goreng ke tshwanetse go bala Baebele?
A le wena o mongwe wa batho ba ba sa kgatlhiweng ke go bala Baebele? Gongwe o ikutlwa jalo ka gonne Baebele ke buka e tona e e se nang ditshwantsho. E ka tswa e sa ntshe bodutu jaaka thelebishene le dibidio tse o a tleng o di lebe.
A re re o mo tseleng mme o bona lebokoso le legolo la bogologolo, a ga o kitla o batla go itse gore go na le eng mo teng?
Baebele e tshwana le lebokoso leo. E na le dilo tsa botlhokwa tse di ka go thusang
Go dira ditshwetso tse di siameng
Go utlwana le batsadi ba gago
Go nna le ditsala tse di siameng
Go sa tshwenyege thata
A buka eno ya bogologolo e ka re thusa le gompieno? Ee, ka gonne e “tlhotlheleditswe ke Modimo.” (2 Timotheo 3:16) Seo se raya gore kgakololo ya Baebele e kwa Modimong.
Baebele e tshwana le lebokoso le le nang le dilo tsa botlhokwa thata
Nka simolola jang go bala Baebele?
O ka e bala go tloga kwa tshimologong. Fa o dira jalo o tla kgona go tlhaloganya molaetsa wa Baebele. Go na le ditsela tse dintsi tsa go bala Baebele. A re bone di le pedi fela:
O ka bala dibuka tsotlhe tse 66 tsa Baebele, go tloga ka Genesise go fitlha ka Tshenolo.
O ka e bala go ya ka tatelano ya ditiragalo tse go buiwang ka tsone.
Kakantsho: Karolo 4 ya Kaedi ya go Ithuta Lefoko la Modimo e tlhalosa ditiragalo tsa botshelo jwa ga Jesu go ya ka tatelano ya tsone.
Tsela e nngwe ya go simolola go bala Baebele ke ka go tlhopha kgaolo ya Baebele e e tsamaisanang le bothata jo o nang le jone. Ka sekai:
Fa o batla ditsala tse o ka di tshepang, bala ka Jonathane le Dafide. (1 Samuele kgaolo 18-20) Go tswa foo, dirisa porojeke e e reng “Tsela ya go Bona Ditsala Tsa Boammaaruri” gore o bone gore o ka ithuta eng mo go Jonathane le Dafide.
Fa o batla go ithuta gore o se ka wa raelesega ka bonako, bala ka se Josefa a ileng a se dira fa a raelwa. (Genesise kgaolo 39) Go tswa foo, dirisa porojeke e e reng “Kafa o ka Emelanang le Thaelo ka Gone . . . Josefa—Karolo 1” le ya “O ne A Latofadiwa ka Maaka! Josefa—Karolo 2” go bona gore o ka ithuta eng mo go ene.
Fa o batla go itse gore thapelo e ka go thusa jang, bala ka se se ileng sa diragalela Nehemia. (Nehemia kgaolo 2) Go tswa foo, dirisa porojeke e e reng “Modimo O ne A Araba Thapelo ya Gagwe” go bona gore o ka ithuta eng mo go Nehemia.
Kakantsho: Fa o bala Baebele, dula mo go se nang modumo gone gore o se ka wa iteega tsebe.
Tsela ya boraro ya go bala Baebele ke go tlhopha buka nngwe ya Baebele, ka sekai buka ya pesalema, o bo o e bala, go tswa foo, o bo o bona gore o ka e dirisa jang. Fa o sena go e bala, ipotse dipotso tseno:
Goreng Jehofa a tsentse buka eno mo Baebeleng?
E nthuta eng ka botho jwa ga Jehofa le tsela e a dirang dilo ka yone?
Nka dirisa jang tshedimosetso eno mo botshelong jwa me?
Kakantsho: Dirisa Baebele ya Study Edition go bona dibidio, dimmapa le dintlha tse dingwe tse di ka go thusang gore o tlhaloganye Baebele sentle.