Diane 16:3—“Neela Jehofa Ditiro Tsa Gago”

“Bolelela Jehofa sepe fela se o se dirang, mme dithulaganyo tsa gago di tla atlega.”​—Diane 16:3, Baebele ya Thanolo ya Lefatshe le Lesha.

“Neela Jehofa ditiro tsa gago, mme maikaelelo a gago a tlaa tlhomama.”​—Diane 16:3, Baebele e e Boitshepo.

Se Diane 16:3 e se Kayang

Seane seno se netefaletsa batho ba ba obamelang Modimo wa boammaaruri gore, maikaelelo a bone a tla atlega fa ba ikanya Modimo, e bile ba latela kaelo ya gagwe.

“Bolelela Jehofa sepe fela se o se dirang.” Pele ga baobamedi ba ga Jehofaa ba dira ditshwetso, ba kopa kaelo mo go ene ka boikokobetso. (Jakobe 1:5) Goreng ba dira jalo? Lebaka lengwe ke gore batho ga ba kgone go laola se se diragalang mo matshelong a bone. (Moreri 9:11; Jakobe 4:13-15) Gape ga ba na botlhale jwa go diragatsa maikaelelo a bone. Ka ntlha ya seo, batho ba le bantsi ba bona go le botlhale go bolelela Jehofa se ba batlang go se dira. Ba dira jalo ka go rapela ba kopa kaelo kwa Modimong, le go dira tumalanong le thato ya gagwe, e e tlhalositsweng mo Lefokong la gagwe e leng Baebele.​—Diane 3:5, 6; 2 Timotheo 3:16, 17.

Polelwana e e reng, “neela Jehofa ditiro tsa gago,” e ka kaya gore “pitikololela ditiro tsa gago mo go Jehofa.” Go ya ka tshupiso nngwe, ntlha eno e bua ka “monna yo o rweleng morwalo o o bokete, yo o neelang motho yo mongwe yo o maatla go mo gaisa morwalo oo.” Batho ba ba ikaegang ka Modimo ba ka tshepa gore o tla ba thusa le go ba tshegetsa.​—Pesalema 37:5; 55:22.

Fa temana eno e re “sepe fela se o se dirang,” ga e kaye gore Modimo o tla segofatsa dithulaganyo tsotlhe tse batho ba di dirang. Fa motho a batla gore Jehofa a segofatse dithulaganyo tsa gagwe, o tshwanetse go dira dilo tse di tsamaisanang le melao ya Modimo le thato ya gagwe. (Pesalema 127:1; 1 Johane 5:14) Modimo ga a segofatse motho yo o sa mo reetseng. Tota e bile, “o kgoreletsa maano a batho ba ba bosula.” (Pesalema 146:9) Go na le moo, o tshegetsa batho ba ba mo ikobelang le ba ba tlotlang melao ya gagwe e e mo Baebeleng.​—Pesalema 37:23.

“Mme dithulaganyo tsa gago di tla atlega.” Dithanolo tse dingwe di ranola polelwana eno di re “maikaelelo a gago a tlaa tlhomama.” Mo Dikwalong Tsa Sehebera kgotsa tse di tlwaelegileng e le Tesetamente e Kgologolo, gantsi lefoko go “tlhomama” le ka tlhalosa go thaya motheo, mme le dirisiwa go bontsha gore dilo tse Jehofa a di bopileng di tlhomame. (Diane 3:19; Jeremia 10:12) Ka jalo, go ka twe Modimo o tla tlhomamisa maikaelelo a batho ba ba dirang se a se bonang se siame, a ba thusa gore ba tshele botshelo jo bo tlhomameng le jo bo itumetseng.​—Pesalema 20:4; Diane 12:3.

Se go Buiwang ka Sone mo go Diane 16:3

Seane seno se kwadilwe ke Kgosi Solomone, yo o kwadileng dikgaolo tse dintsi mo bukeng ya Diane. Modimo ke ene a neng a mo neile botlhale jwa gore a kgone go bua diane tse dintsintsi.​—1 Dikgosi 4:29, 32; 10:23, 24.

Mo go kgaolo 16, Solomone o simolola kgaolo eno ka go baka Modimo ka ntlha ya botlhale jwa Gagwe, le go bontsha gore Modimo o tlhoile batho ba ba ikgogomosang. (Diane 16:1-5) Go tswa foo, kgaolo eno e thusa mmadi go tlhaloganya sengwe se se boammaaruri se re se balang mo bukeng ya Diane gangwe le gape, e leng gore: Batho ba ka nna botlhale le go atlega fa ba le boikokobetso e bile ba letla Modimo go kaela dikgato tsa bone. (Diane 16:3, 6-8, 18-23) Boammaaruri jono bo nna bo boaboelediwa mo Baebeleng.​—Pesalema 1:1-3; Isaia 26:3; Jeremia 17:7, 8; 1 Johane 3:22.

Leba bidio eno e khutshwane gore o bone se se mo bukeng ya Diane.